Ntoa Khahlanong le Likoluoa e Hlōtsoe
BOITEKO ba Machaba a Kopaneng le ba mebuso ka bomong ba ho fokotsa liphello tsa likoluoa tsa tlhaho ka sebele bo lokela ho rorisoa. Merero e kang ea International Decade for Natural Disaster Reduction e fana ka maikutlo a hore ha ho hlokahale hore moloko oa batho o ikutloe o hloka mokhoa oa ho ithusa ha o tobane le litlokotsi tse kang tseo. Haeba batho ka bomong, mekhatlo le mebuso ba nka mehato e loketseng, bophelo bo ka pholosoa.
Sena se thahasellisa haholo hobane Bibele e re bolella hore haufinyane ho tla ba le phetoho e khōlō bolebeling ba puso holim’a moloko oa batho. Ho tloha mehleng ea Jesu, Bakreste ba ’nile ba rapela Thapelo ea Morena (“Ntat’a Rōna”), e akarelletsang mantsoe a reng: “Ho tle ’muso oa hao; thato ea hao e etsoe lefatšeng, joalo ka ha e etsoa leholimong.” (Mattheu 6:9, 10) ’Muso oa Molimo ke puso ea sebele. Ho latela boprofeta ba Bibele, haufinyane “o tla robaka o felise mebuso eo [ea batho] kaofela, empa oona o tla ba teng ka ho sa feleng.” (Daniele 2:44) Ak’u nahane feela moloko oohle oa batho o le ka tlas’a puso e le ’ngoe e phethahetseng. Seo e tla ba phetoho e kaakang!
Haeba mebuso ea kajeno e bona hore hoa hlokahala ho nka mehato e le hore likotsi tsa tlhaho ha li fetohe likoluoa tsa tlhaho, re ka kholiseha hore puso ea Molimo e tla tiisa hore bafo ba eona ho hang ha ba hlokofatsoe ka tsela ena. ’Muso oa Molimo o tla tlisa khotso e sa feleng polaneteng ena ka lekhetlo la pele ho tloha haesale Kaine a bolaea Abele. Tlas’a ’Muso oo, “ba bonolo ba tla rua lefatše, ba iketle khotsong e kholo.” (Pesaleme ea 37:11) ’Muso oo o tla ruta moloko oa batho e le hore ka kutloisiso ea sebele ‘batho bohle e tle e be ba rutoang ke Jehova, ’me khotso ea bona e tle e be e khaphatsehang.’—Esaia 54:13, NW.
Kajeno, boholo ba ba hlaseloang ke likoluoa tsa tlhaho ke mafutsana. Leha ho le joalo, ka bolebeli bo phethahetseng le thuto e loketseng, tlas’a ’Muso oa Molimo, moloko oa batho o ke ke oa hlokofatsoa ke bohloko ba bofutsana. Ha a profeta maemo a joalo ka tsela eo batho ba mehleng ea hae ba neng ba tla utloisisa, moprofeta Esaia o ile a ngola: “Jehova oa makhotla o tla etsetsa lichaba kaofela mokete oa lijo tse hlabosang, mokete oa liveine tse monate tse nkiloeng holim’a litšifa, mokete oa lijo tse hlabosang, tsa moko, oa liveine tse nkiloeng holim’a litšifa, tse hloekileng.” (Esaia 25:6) E, mokete oa semetletsa oa lintho tse monate! Ha a hlalosa bophelo tlas’a puso ea ’Muso ka ho eketsehileng, mopesaleme o ile a ngola: “Nala ea mabele e tla ba teng lefatšeng holim’a lithaba, liqoapi tsa ’ona li hoase joalo ka merokoli e lumang Lebanone; batho ba tla atleha metseng joalo ka limela tsa naha.”—Pesaleme ea 72:16.
Ka ho hlakileng, ntoa ea motho khahlanong le likoluoa tsa tlhaho e tla be e felile. Ka tataiso ea moea oa Molimo le ka bolebeli ba ’Muso oa Molimo, batho ba tšabang Molimo ba tla be ba hlōtse ntoa eo. Seo e tla ba tokoloho e kaakang!