“Makasine e Itlhommeng Pele”

Na u se u kile ua bala makasine ea Tsoha!? U ka beha kopi eo u e tšoereng ka letsohong la hao boemong bofe? Na u fumana e e-na le lihlooho tse rutang, tse fupulitsoeng hantle le tse hlakisitsoeng hamolemo?

Mongoli ea ikemetseng oa Nigeria, Afrika, o ile a ngola: “Ke bala Tsoha! kamehla, le hoja ke se e mong oa Lipaki tsa Jehova. Tsoha! ke makasine e itlhommeng pele. Ke mohloli oa ka oa likhopolo tsa boqapi. Bokantle ba eona bo hapa tlhokomelo ’me bo fehla takatso e matla ka ho ’mali ea se nang leeme ea hore a phetle maqephe a eona. Tokollo e ’ngoe le e ’ngoe e bontša bokhoni bo tsotehang; leqephe le leng le le leng le bontša bokhabane ba bongoli. Ka lihlooho tsa eona tse nakong le tse ngotsoeng ka bokheleke, tokollo e ’ngoe le e ’ngoe e fana ka boitsebiso bo monate ba boleng bo phahameng le ba bohlokoahali.”

Re u khothalletsa hore u hlahlobe lihlooho tse koping ena ea Tsoha! Haeba u rata ho fumana kopi e ’ngoe, ka kōpo etsa kōpo e joalo ka lengolo le eang ho Watch Tower, Private Bag X2067, Krugersdorp, 1740, South Africa, kapa atereseng e loketseng ho tse thathamisitsoeng leqepheng la 5. Re tla thabela ho u romella kopi e ’ngoe kapa, haeba u kōpa, re re motho e mong a u etele lelapeng la hao ho tla hlahloba le uena se boleloang ke linako tseo re phelang ho tsona.