Bohlale bo Mabapi le Pelo le Bophelo bo Botle

“Pelo e nang le khutso ke bophelo ba sebōpuoa sa nama.”—LIPROVERBIA 14:30.

“Pelo e thabileng ke moriana o motle.”—LIPROVERBIA 17:22.

● Mantsoe ao a bonolo empa e le a matla a ile a buuoa ke Morena Solomone oa Iseraele hoo e ka bang lilemong tse likete tse tharo tse fetileng.a Empa na ehlile ke ’nete? Lefapha la kajeno la bongaka le re’ng ka taba ee?

Ha e bapisa lipelo tsa batho ba khutsitseng le ba tloaetseng ho halefa, khatiso ea Journal of the American College of Cardiology e re: “Liphuputso tsa morao-rao li bontša hore ho na le kamano e kotsi pakeng tsa ho halefa, lehloeo haesitana le CHD [lefu la pelo].” Kahoo Journal ena e re: “Ho atleha ho thibela CHD le ho e phekola ha ho akarelletse feela pheko e tloaelehileng ea meriana le ea ho ikoetlisa ’mele empa ho akarelletsa ho laola kelello tabeng ea khalefo le lehloeo.” Ka mantsoe a bonolo, pelo e khutsitseng e ntlafatsa bophelo ba ’mele, feela joalokaha Bibele e bontša.

Ka ho tšoanang, pelo e thabileng e tlisa liphello tse molemo. Dr. Derek Cox, ea boholong lefapheng la bophelo bo botle Scotland, o ile a bua tjena tlalehong ea BBC ea Litaba: “Haeba u le motho ea thabileng ho ka etsahala hore u se ke ua kula joaloka batho ba sa thabang.” Tlaleho eona eo e ile ea re: “Batho ba thabileng ba sireletseha haholoanyane hore ba se ke ba tšoaroa ke lintho tse kang lefu la pelo le setorouku.”

Ke hobane’ng ha bohlale ba Solomone—re se re sa re letho ka bangoli ba bang ba Bibele—bo ipakile bo nepahetse hakaalo esita le pele batho ka kakaretso ba tseba taba eo? Karabo e bonolo. “Molimo a tsoela pele ho fa Solomone bohlale le kutloisiso ka tekanyo e khōlō haholo.” (1 Marena 4:29) Ho feta moo, bohlale boo bo tlalehiloe ka puo e hlakileng e le hore bo ka tsoela bohle molemo. Ebile ha bo lefelloe!

Na u ka itloaetsa ho bala Bibele letsatsi le leng le le leng? Batho ba limilione ba ile ba thaba haholo ha ba fumana hore “ha bohlale bo kena ka pelong ea hao le tsebo e e-ba e khahlisang moeeng oa hao, matla a ho nahana a tla u lebela, temoho e tla u sireletsa.” (Liproverbia 2:10, 11) Na seo hase se khothatsang?

[Mongolo o botlaaseng ba leqephe]