Davida le Goliathe

BAFILISTA ba boela ba tl’o loantša Baiseraele. Baholoane ba Davida ba bararo joale ba lebothong la Saule. Joale ka letsatsi le leng Jese o re ho Davida: ‘Ak’u isetse baholoane ba hao lijo-thollo le bohobe. U bone hore na ba ntse ba phela joang.’

Ha Davida a fihla kampong ea masole, o mathela moleng oa ntoa ho ea sheba baholoane ba hae. Goliathe, senatla sa Mofilista oa tsoa hore a tl’o soma Baiseraele. Esale a ntse a ba soma hoseng le mantsiboea ka matsatsi a 40. Oa hoeletsa o re: ‘Khethang monna ea ka loanang le ’na. Ha a ka hlōla ’me a mpolaea, re tla ba makhoba a lōna. Empa ha ke hlōla ’me ke mo bolaea, le tla ba makhoba a rōna. E-bang sebete ho khetha motho ea ka loanang le ’na.’

Davida o botsa masole a mang o re: ‘Monna ea tla bolaea Mofilista eo ’me a lokolle Iseraele masoabing aa o tla fumana eng?’

Masole a re: ‘Saule o tla mo fa maruo a mangata. ’Me o tla mo nyalisa morali oa hae.’

Empa Baiseraele bohle ba tšaba Goliathe hobane ke senatlahali. O bolelele ba limithara tse ka bang tharo, ebile o na le lesole le mo nketseng thebe.

Masole a mang a ea ho Morena Saule a mo bolella hore Davida o batla ho loantša Goliathe. Empa Saule o re ho Davida: ‘U ke ke ua loantša Mofilista eo. U sa ntse u le moshemane feela, ’me eena e bile lesole bophelo bohle ba hae.’ Davida o arabela ka ho re: ‘Ke ile ka bolaea bere le tau tse neng li nkile linku tsa Ntate. ’Me Mofilista eo o tla ba joaloka e ’ngoe ea tsona. Jehova o tla nthusa.’ Joale Saule o re: ‘Tsamaea, ’me e se eka Jehova a ka ba le uena.’

Davida o theohela nōkeng ’me o nka majoe a mahlano a boreleli, o a kenya ka mokotleng. Joale o nka letjeketjane la hae ’me o il’o teana le senatla seo. Ha Goliathe a mo bona, ha a lumele seo a se bonang. O nahana hore o tla bolaea Davida habonolo feela.

Goliathe o re: ‘Atamela feela u tl’u bone; ke tla fa linonyana le liphoofolo setopo sa hao hore li se je.’ Empa Davida o re: ‘U tla ho ’na ka sabole, lerumo le tsenene, empa ’na ke tla ho uena ka lebitso la Jehova. Kajeno lena Jehova o tla nehelana ka uena matsohong a ka ’me ke tla u bolaea.’

Eaba Davida o mathela ho Goliathe. O ntša lejoe ka mokotleng oa hae, o le kenya letjeketjaneng ’me o le betsa ka matla a hae kaofela. Lejoe leo le toba phatleng ea Goliathe hantle, ’me o oela fatše oa shoa! Ha Bafilista ba bona hore ’mampoli oa bona o oele, kaofela baa khutla ’me baa baleha. Baiseraele baa ba lelekisa ’me ba hlōla ntoa.