Khaolo ea 80

Masaka a Linku le Molisa

JESU o Jerusalema ka nako ea Mokete oa Nehelo, kapa Hanukkah, mokete o ketekoang bakeng sa ho nehela tempele hape tšebeletsong ea Jehova. Ka 168 B.C.E., lilemo tse ka bang 200 pejana, Antiochus IV Epiphanes o ne a ile a hapa Jerusalema ’me a nyelisa tempele le aletare ea eona. Leha ho le joalo, lilemo tse tharo hamorao Jerusalema e ile ea haptjoa hape ’me tempele ea neheloa hape. Ka morao ho moo, ho ne ho tšoaroa mokete oa selemo le selemo oa ho nehela tempele hape.

Mokete ona oa Nehelo o etsoa ka la 25 Chislev, khoeli ea Sejode e tsamaisanang le karolo e qetellang ea Pulungoana le e qalang ea Tšitoe almanakeng ea rōna ea kajeno. Ka hona, ho setse matsatsi a fetang a lekholo pele ho Paseka ea bohlokoa ea 33 C.E. Kaha ke nakong ea serame, moapostola Johanne o e bitsa “mariha.”

Joale Jesu o sebelisa papiso eo ho eona a buang ka masaka a mararo a linku le karolo ea hae joaloka Molisa ea Molemo. Lesaka la pele la linku leo a buang ka lona le amana le tokisetso ea selekane sa Molao oa Moshe. Molao o ne o sebeletsa joaloka lekhoakhoa le arotseng Bajode liketsong tse silafatsang tsa batho bao ba neng ba se selekaneng sena se khethehileng le Molimo. Jesu oa hlalosa: “Ka ’nete-nete ke re ho lōna: Ea sa keneng ka monyako lesakeng la linku, a mpa a tlōlela teng kahosele, ke lesholu le senokoane. Empa ea kenang ka monyako, eena ke molisa oa linku.”

Ba bang ba ne ba ile ba tla ’me ba ipolela hore ke bo-Messia, kapa bo-Kreste, empa bona e ne e se molisa oa ’nete eo Jesu a tsoelang pele ho bua tjena ka eena: “Molebeli oa monyako o ee a ’mulele, ’me linku li utloe lentsoe la hae, ’me a bitse linku tsa hae ka mabitso a tsona, a li ise ka ntle. . . . Osele li ke ke tsa mo latela, empa li ka ’malehela, kahobane li sa tsebe lentsoe la osele.”

“Molebeli oa monyako” oa lesaka la pele la linku e ne e le Johanne Mokolobetsi. E le molebeli oa monyako, Johanne o ile a ‘bulela’ Jesu ka ho mo tsebahatsa ho linku tseo tsa tšoantšetso tseo a neng a tla li isa ka ntle makhulong. Linku tsena tseo Jesu a li bitsang ka mabitso le ho li isa ka ntle qetellong li lumelloa ho kena ka lesakeng le leng la linku, joalokaha a hlalosa: “Ka ’nete-nete ke re ho lōna: Ke ’na monyako oa linku,” ke hore monyako oa lesaka le lecha la linku. Ha Jesu a thea selekane se secha le barutuoa ba hae ’me ka Pentekonta e latelang a tšollela holim’a bona moea o halalelang o tsoang leholimong, ba lumelloa ho kena ka lesakeng lena le lecha la linku.

Ha a tsoela pele ho hlalosa karolo ea hae, Jesu o re: “Ke ’na monyako; ekare ha motho a kena ka ’na, o tla bolokeha; o tla ’ne a kene, a ’ne a tsoe, a bone makhulo. . . . ’Na, ke tlile hore li be le bophelo, li bo bone ka ho fetisisa. . . . Ke ’na molisa ea molemo, ke tseba linku tsa ka, le linku tsa ka lia ntseba, joale ka ha Ntate a ntseba, le ’na ke tseba Ntate; ’me ke beela linku bophelo ba ka.”

Haufinyane, Jesu o ne a sa tsoa khothatsa balateli ba hae, ka ho re: “Mohlatsoana, se tšabe, hobane ho khahlile Ntat’a lōna ho le fa ’muso.” Mohlatsoana ona, oo qetellong palo ea oona e etsang ba 144 000, o tla ka lesakeng lena la linku le lecha, kapa la bobeli. Empa Jesu o tsoela pele ho hlokomela: “Ke sa na le linku tse ling, tsee e seng tsa lesaka lena; le tsona e ka khona ke li tlise, ’me li tla utloa lentsoe la ka, ’me mohlape o tla ba mong, molisa le eena a be mong.”

Kaha “linku tse ling” hase “tsa lesaka lena,” e tlameha ho ba tsa lesaka le leng, la boraro. Masaka a mabeli a ho qetela, kapa masakana a linku, a na le tšepo e sa tšoaneng ea bophelo. “Mohlatsoana” ka lesakeng le leng o tla busa le Kreste leholimong, ’me “linku tse ling” ka lesakeng le leng li tla phela lefatšeng la Paradeise. Leha ho le joalo, ho sa tsotellehe ho ba ha tsona ka masakeng a mabeli, linku ha li na mōna, kapa hona hore li ikutloa li arohane, hobane joalokaha Jesu a bolela, li fetoha ‘mohlape o le mong’ tlas’a ‘molisa a le mong.’

Molisa ea Molemo, Jesu Kreste, ka ho  ithatela o fana ka bophelo ba hae bakeng sa masaka ana a mabeli a linku. O re: “Ke ’na ke bo beang ka ho rata ha ka; ke na le matla a ho bo bea, le matla a ho boela ke bo nka. Taelo eo ke e nkile ho Ntate.” Ha Jesu a bolela sena ha ba le phapang har’a Bajode.

Ba bangata har’a mokhopi ba re: “O na le modemona, oa hlanya; le mo mamella’ng na?” Empa ba bang baa arabela: “Litaba tseo hase tsa motho ea nang le modemona.” Joale, ka ho totobetseng ha ba khutlela morao likhoeling tse seng kae ha a ne a folisitse monna ea neng a tsoetsoe a foufetse, baa phaella: “Na modemona a ka tutubolla mahlo a lifofu na?” Johanne 10:1-22; 9:1-7; Luka 12:32; Tšenolo 14:1,3; 21:​3, 4; Pesaleme ea 37:⁠29.

▪ Mokete oa Nehelo ke eng, hona o ketekoa neng?

▪ Lesaka la pele la linku ke eng, ’me molebeli oa monyako oa lona ke mang?

▪ Molebeli oa monyako o bulela Molisa joang, ’me ka morao ho moo linku li lumelloa ho kena hokae?

▪ Ke bo-mang ba bōpang masaka a mabeli a Molisa ea Molemo, ’me ba fetoha mehlape e mekae?