Keta-pele

Lipaki tsa Jehova ke batho ba tsejoang hohle. Boboleli ba bona le tsela ea bona ea ho rapela li kenelletse lihlopheng tsa bochaba le tsa merabe lefatšeng ka bophara ’me e bile li amohetsoe ke bacha le ba seng ba hōlile, boemong bo bong le bo bong ba moruo le ba thuto. Cheseho ea bona e le bahoeletsi ba ’Muso oa Molimo e khahlile esita le batho ba ratang ho ba ntša liphoso. Ho ratana ha bona ho etsa hore batho ba bang bao eseng Lipaki ba lakatse eka batho ba eketsehileng ba ka ba etsisa.

Leha ho le joalo, ba bangata ba ntse ba ipotsa, ‘Hantle-ntle Lipaki tsa Jehova ke bo-mang?’ Ba bang ba ngotse ka tsona, hangata ba sa bontše leeme. Mohlomong ba ne ba sa hlokomele linnete tsohle. Ka sebele ha ho motho ea tsebang histori ea tsona ea kajeno ho li feta. Bahatisi ba buka ena ba lekile ho ngola lintlha kamoo li leng ka teng le ho fana ka histori e tšepahalang. Ho bohle ba hlokomelang se boleloang ke Bibele esale pele ka mehla ea qetello, histori ena ea batho ba lumelang le ba bolelang ka matla se boleloang ke Bibele e tla ba e ruisang tsebo haholo.

Bahatisi