Tataiso Bakeng Sa Balebeli Ba Sekolo
PHUTHEHONG ka ’ngoe, ho na le moholo ea khethiloeng hore e be Molebeli oa Sekolo sa Tšebeletso sa Puso ea Molimo. Haeba u filoe boikarabelo bona, ho chesehela ha hao sekolo le ho thahasella ha hao tsoelo-pele ea seithuti ka seng ho ka phetha karolo ea bohlokoa mabapi le seo sekolo se se finyellang sebakeng sa heno.
Karolo ea bohlokoa ea kabelo ea hao ke ho khanna Sekolo sa Tšebeletso sa Puso ea Molimo sa beke le beke phuthehong ea heno. Hopola hore ho phaella liithuting tse nang le likabelo ka nako leha e le efe, ho na le batho ba bang ba bang teng. Khanna sekolo ka tsela e tla etsa hore phutheho kaofela e fumane likhopotso tse susumetsang, tse sebetsang tseo bonyane li amanang le o mong oa merero ea sekolo sena e boletsoeng leqepheng la 5 ho ea ho la 8 bukeng ena.
Bontša thahasello ho liithuti kaofela, ho sa tsotellehe hore na li abetsoe ho fana ka likabelo tsa ’malo, ho etsa linehelano ka lipontšo kapa ho fana ka lipuo. Li thuse hore li se talime seo li se etsang e le kabelo feela empa e le monyetla oa ho etsa tsoelo-pele tšebeletsong ea tsona ho Jehova. Ho hlakile hore boiteko boo li bo etsang ka bomong ke karolo ea bohlokoa tsoelo-peleng ea tsona. Empa hape ke habohlokoa hore u bontše thahasello e mosa, u li thuse ho utloisisa bohlokoa ba lintlha tsa keletso le ho hlalosa kamoo li ka sebelisang keletso eo kateng. Ho finyella seo, mamela puo ka ’ngoe ka hloko e le hore u ka fana ka litlhaloso tse molemo.
Tiisa hore u qala sekolo le ho se phetha ka nako. Beha mohlala o motle ka ho etsa hore litlhaloso tsa hao li se ke tsa feta nako eo li e lekanyelitsoeng. Haeba seithuti se ja nako, uena kapa mothusi oa hao o lokela ho etsa tlhokomeliso e bontšang seo. Seithuti se lokela ho qetella poleloana ea sona ’me se tlohe sethaleng. Haeba puo e ’ngoe lenaneong e ja nako, khutsufatsa litlhaloso tsa hao ’me ka mor’a seboka u bue le mor’abo rōna ea jeleng nako ka taba eo.
Ha u le teng, u lokela ho khanna sekolo. Haeba ka linako tse ling u sa khone ho ba teng, moholo e mong ea khethiloeng esale pele ke sehlopha sa baholo o lokela ho khanna sekolo. Haeba u hloka thuso mabapi le ho etsa likemiso, ho ngola maqetšoana a likabelo le ho a aba, kapa ho hlophisa ba ka ithaopelang lipuo lenaneong, mohlanka ea sebeletsang ea abetsoeng ke sehlopha sa baholo a ka u thusa ka lintho tsena.
Ho Ngolisa Liithuti. Khothalletsa bahoeletsi bohle ho ngolisa sekolong. Ba bang ba kopanelang le phutheho ka mafolofolo ba ka ngolisa haeba ba lumellana le lithuto tsa Bibele ’me bophelo ba bona bo lumellana le melao-motheo ea Bokreste. Ha motho a lakatsa ho ngolisa, mo babatse ka mofuthu. Haeba motho eo e e-s’o be mohoeletsi, uena joaloka molebeli oa sekolo u lokela ho buisana le eena ka se hlokahalang hore a ngolise sekolong, ho molemo ho etsa sena motho ea mo khannelang thuto ea Bibele a le teng (kapa motsoali ea lumelang a le teng). Litlhokahalo tsena li tšoana le tsa motho ea batlang ho ba mohoeletsi ea sa kolobetsoang. Li fumanoa leqepheng la 97 ho ea ho la 99 bukeng ea Ho Hlophisetsoa ho Phetha Tšebeletso ea Rōna. Boloka lethathamo la bohle ba ngolisitseng sekolong le le nakong.
Ho Sebelisa Foromo ea Keletso. Foromo ea keletso ea seithuti ka seng e ka har’a buka ea sona, leqepheng la 79 ho ea ho la 81. Joalokaha mebala e bontša, ho ka sebelisoa ntlha leha e le efe ea keletso ho tloha ho ea 1 ho ea ho ea 17 ha seithuti se filoe kabelo ea ’malo. Bakeng sa linehelano tse etsoang ka mokhoa oa lipontšo, ho ka sebelisoa ntlha leha e le efe ea keletso ntle ho ea 7, 52 le ea 53. Keletso bakeng sa lipuo e akarelletsa lintlha kaofela ntle ho ea 7, 18 le ea 30.
Ha motho a abetsoe ntlha ea keletso, molebeli oa sekolo o lokela ho tiisa hore e ngotsoe ka pentšele tlas’a “Letsatsi la ho Abeloa Thuto” sebakeng se lokiselitsoeng hoo haufi le ntlha eo foromong ea keletso e leng bukeng ea seithuti. Ka mor’a hore seithuti se fane ka kabelo ea sona, se botse ka thōko hore na se entse boitlhakiso bo bontšitsoeng qetellong ea puisano ea ntlha eo ea keletso na. Haeba se bo entse, u lokela ho etsa letšoao lebokoseng le entsoeng foromong. Haeba u etsa tlhahiso ea hore se tsoele pele ho sebeletsa ntlheng e tšoanang ea keletso, ha ho hlokahale hore u ngole letho le eketsehileng foromong ea keletso; u se ke ua ngola letho sebakeng se sa ngoloang se reng “Letsatsi la ho Phethoa ha Thuto.” U lokela ho ngola sebakeng seo hafeela se se se loketse ho fetela ntlheng e ’ngoe. Ho phaella moo, leqepheng la 82 la buka ea seithuti, ka lehlakoreng le letšehali la karolo ea boemo ba puo bo sebelisitsoeng, ka mor’a puo ka ’ngoe ea seithuti ho lokela hore ho ngoloe letsatsi. Ho lokiselitsoe sebaka foromong ea keletso le lethathamong la maemo a puo, se lumellang hore boemo ka bong bo sebelisoe habeli. Liithuti li lokela ho ba le libuka tsa tsona nakong ea lenaneo.
Aba ntlha e le ’ngoe feela ea keletso ea puo ka nako. Ka tloaelo, ho molemo ho akaretsa lintlha tsa keletso ka tatellano eo li behiloeng ka eona. Leha ho le joalo, haeba liithuti tse ling li bontša bokhoni bo hlahelletseng, u ka ’na ua li khothalletsa hore li ithute le ho sebelisa lithuto tse ling ka botsona. Joale u ka li thusa lintlheng tseo u nahanang hore li tla tlatsetsa haholo tsoelo-peleng ea tsona joaloka libui le mesuoe e atlehang.
Esita le haeba e se e le lilemo tse ngata seithuti se ngolisitse sekolong, se ka rua molemo haholo ka ho ithuta le ho sebelisa thuto ka ’ngoe. Ho thusa liithuti tse nang le litlhoko tse khethehileng, u ka ’na ua li khethela litšoaneleho tse itseng tsa puo tseo li ka sebeletsang ho tsona ho e-na le ho latela lintlha tsa foromo ea keletso ka tatellano.
Ho Fana ka Keletso. Ha u fana ka keletso, sebelisa mehlala le melao-motheo ea Bibele hamolemo. Liithuti li lokela ho lemoha hore keletso e fanoeng le moea oo e fanoeng ka oona li laoloa ke melao-motheo e phahameng ea Lentsoe la Molimo.
Hopola hore u ‘mosebetsi-’moho’ le bara le barali beno. (2 Bakor. 1:24) Joaloka bona, u lokela ho tsoela pele u ikitlaetsa ho ntlafatsa joaloka sebui le mosuoe. Uena ka bouena ithute buka ea Rua Molemo Thutong ea Sekolo sa Tšebeletso sa Puso ea Molimo, u sebelise keletso ea eona ’me u behele ba bang mohlala o motle hore le bona ba etse se tšoanang.
Ha u ntse u etsa joalo, ikemisetse ho thusa liithuti hore li tsebe ho bala hantle, e be libui tse hloahloa le ho ba mesuoe e atlehang. Hore u finyelle seo, leka ho fana ka thuso leha e le efe e hlokahalang e le hore liithuti li utloisise litšoaneleho tse sa tšoaneng tsa puo, le hore na ke hobane’ng ha e le tsa bohlokoa le kamoo li ka li hlaolelang kateng. Buka ena e entsoe ka tsela e tla u thusa hore u etse joalo. Leha ho le joalo, ho tla hlokahala hore u etse ho eketsehileng ho feta feela ho bala mantsoe a leng bukeng. Bua ka mohopolo o hlalosoang ke mantsoe ana le kamoo o ka sebelisoang kateng.
Haeba seithuti se entse hantle ntlheng e itseng, se babatse. Ka bokhutšoanyane bolela hore na ke eng e entseng hore ntlha eo e atlehe kapa hore na ke hobane’ng ha seo se se entseng e le sa bohlokoa. Haeba se ka khona ho rua molemo ka ho lebisa tlhokomelo e eketsehileng tabeng e itseng, tiisa hore se utloisisa lebaka la seo. Bolela kamoo sena se ka finyelloang kateng. Toba taba ’me ka nako e tšoanang, u be mosa.
U elelloe hore ho ba bangata, hase ntho e bonolo ho phahama ho ea fana ka nehelano ka pel’a sehlopha. Haeba motho a nahana hore ha aa etsa hantle, a ka ’na a ipotsa hore na ebe hoa hlokahala hore a ’ne a leke. Etsisa Jesu, ea sa kang a silakanya “lehlaka le tletleraneng” leha e le ho tima “khoele ea lebone ea folakse e kunkelang.” (Mat. 12:20) Nahanela maikutlo a seithuti. Ha u fana ka keletso, tataisoa ke taba ea hore na seithuti se sa le secha kapa hore na ke mohoeletsi ea seng a e-na le phihlelo. Pabatso e mofuthu ea sebele e ka matlafatsa batho hore ba tsoele pele ho etsa sohle se matleng a bona.
Tšoara seithuti se seng le se seng ka tlhompho. Baroma 12:10 ea re bolella: “Etellang pele ho bontšaneng tlhompho.” Ee ke keletso e loketseng hakaakang bakeng sa moeletsi Sekolong sa Tšebeletso sa Puso ea Molimo! Haeba seithuti se u feta ka lilemo, sebelisa ka hloko tataiso e fanoeng ho 1 Timothea 5:1, 2. Leha ho le joalo, ho sa tsotellehe lilemo tsa motho, haeba keletso e akarelletsang ho etsa liphetoho mokhoeng oa hae oa ho etsa lintho e fanoa ka mosa, hangata ho ba bonolo hore a e amohele.—Liprov. 25:11.
Ha u fana ka keletso, hatisa sepheo sa koetliso eo ho seithuti. Sepheo seo hase feela hore se etse hantle e le hore se babatsoe le ho bolelloa hore se fetele ntlheng e latelang ea keletso. Sepheo hase ho ba sebui kapa mosuoe ea tla rorisoa ke batho. (Liprov. 25:27) Takatso ea rōna ke ho sebelisa mpho ea rōna ea ho bua bakeng sa ho rorisa Jehova le ho thusa ba bang ho mo tseba le ho mo rata. Koetliso ea rōna e etselitsoe ho re hlomella hore re hlokomele hantle mosebetsi o boletsoeng ho Matheu 24:14 le 28:19, 20. Ka mor’a nako e itseng, barab’abo rōna ba kolobelitsoeng ba tšoanelehang ba ka kōptjoa ho kopanela ho hlokomeleng “mohlape oa Molimo” e le libui tsa phatlalatsa le mesuoe.—1 Pet. 5:2, 3.
Etsa tlhahiso ea hore liithuti li bale puisano e leng bukeng bakeng sa ntlha ea tsona e latelang ea keletso matsatsing a seng makae ka mor’a hore li abeloe puo. Li khothalletse ho sebelisa seo li ithutang sona ha li lokisetsa lipuo tsa tsona tsa sekolo, moqoqong oa kamehla, ha li araba libokeng le tšebeletsong ea tšimo.
Ho Etsa Likabelo. Ka ho tloaelehileng sena se lokela ho etsoa bonyane libeke tse tharo esale pele. Likabelo tseo kaofela li lokela ho ngoloa haeba ho khoneha.
Lipuo tse akarelletsang ho ruta phutheho li lokela ho abeloa baholo, haholo-holo ba tla fana ka lipuo tse joalo ka katleho le bahlanka ba sebeletsang ba tsebang ho ruta.
Ha u etsa qeto ka hore na ke lipuo life tsa liithuti tseo u ka li abelang barab’abo rōna le hore na ke life tseo u ka li abelang baralib’abo rōna, latela litaelo tse fanoeng kemisong ea sekolo. Haeba ho e-na le barab’abo rōna ba seng bakae empa ho e-na le baralib’abo rōna ba bangata ba fanang ka lipuo tsa liithuti, ela hloko hore u nehe barab’abo rōna monyetla o lekaneng oa ho fana ka lipuo tse sa akarelletseng ’malo feela.
Nahanela maemo a batho ka bomong ha u etsa likabelo. Na hoa hlokahala ho abela moholo ea itseng kapa mohlanka ea sebeletsang ho fana ka puo sekolong bosiung boo a kentsoeng Sebokeng sa Tšebeletso ka bona kapa bekeng eo a nang le puo ea phatlalatsa ka eona phuthehong? Na hoa hlokahala ho abela morali’abo rōna ea itseng ho etsa nehelano bosiung boo e mong oa bana ba hae ba banyenyane a etsang nehelano, eo ho neng ho ka hlokahala hore a mo thuse ka eona? Haholo-holo tabeng ea mocha kapa seithuti se e-s’o kolobetsoe, na taba eo e se loketse? Tiisa hore kabelo eo e loketse ntlha ea keletso eo seithuti se sebeletsang ho eona.
Bakeng sa likabelo tse fuoang baralib’abo rōna, hangata seithuti se ikhethela boemo ba puo tumellanong le litaelo tse leqepheng la 78 le la 82. Ba lokela ho abeloa mothusi a le mong, empa ho ka sebelisoa mothusi ea eketsehileng. Haeba seithuti se kōpa mothusi ea tla tšoaneleha ka ho khethehileng ho hlahisa boemo bo itseng, kōpo eo e lokela ho nahaneloa.
Litlelase Tse Eketsehileng. Haeba ho ngolisitse liithuti tse fetang 50, mohlomong u ka nahana ka ho sebelisa libaka tse eketsehileng bakeng sa lipuo tse fanoang ke liithuti. Ho latela tlhoko ea sebaka ka seng, ho ka sebelisoa tokisetso ena bakeng sa linehelano tsohle tsa liithuti kapa bakeng sa lipuo tse peli tsa ho qetela.
Tlelase ka ’ngoe e eketsehileng e lokela ho ba le moeletsi ea tšoanelehang, eo ho leng molemo hore e be moholo. Haeba ho hlokahala, mohlanka ea sebeletsang ea tšoanelehang hantle a ka ’na a tšoara molepo. Sehlopha sa baholo se lokela ho fana ka tumello bakeng sa baeletsi bana. Sebetsa haufi le bona e le hore ho ka fanoa ka tlhokomelo e eketsehileng ho liithuti ho sa tsotellehe sebaka seo li tla fana ka nehelano ea tsona e latelang ho sona.
Litlelase Tse Khethehileng Bakeng sa ho Bala. Haeba sehlopha sa baholo se hlokomela hore batho ba bangata ka phuthehong ba hloka thupelo ea motheo ea ho bala ka puo e buuoang ka phuthehong, u ka etsa litokisetso tsa sena nakong ea Sekolo sa Tšebeletso sa Puso ea Molimo. Thupelo ena e ka akarelletsa tsebo ea motheo ea ho bala le ho ngola, kapa sepheo sa eona e ka ba ho ntlafatsa ’malo.
Hase tlamo hore litlelase tse joalo li tšoaroe nakong e tšoanang le eo ho fanoang ka lipuo tsa seithuti Sekolong sa Tšebeletso sa Puso ea Molimo. E le hore ho fanoe ka thuso e lekaneng, ho ka ’na ha hlokahala nako e eketsehileng ho feta e ka bang teng nakong ea sekolo. Baholo ba sebaka ka seng ba ka etsa qeto mabapi le se hlokahalang le hore na thupelo e joalo e ka fanoa neng. Ho ea ka se hlokahalang, ho ka etsoa litokisetso bakeng sa thupelo ea sehlopha kapa bakeng sa thupelo e etsoang le motho ka mong.
Ho hlokahala mosuoe ea tšoanelehang. Ho molemo hore kabelo eo e fuoe mor’abo rōna ea tsebang ho bala hantle le ea tsebang puo ea moo hantle. Haeba mor’abo rōna a sa fumanehe, baholo ba ka kōpa morali’abo rōna ea tšoanelehang le ea behang mohlala hore a thuse. O lokela ho roala hloohong ha a ruta sehlopha.—1 Bakor. 11:3-10; 1 Tim. 2:11, 12.
Bukana ea Ikitlaelletse ho Bala le ho Ngola e se e fumaneha ka lipuo tse ngata. E etselitsoe ho ruta tsebo ea motheo ea ho bala le ho ngola. Ho ka ’na ha sebelisoa boitsebiso bo bong ba ho ruta, ho itšetlehile ka bokhoni ba ho bala ba ba ngolisitseng. Ha liithuti li hatetse pele ka ho lekaneng, li lokela ho khothalletsoa ho kopanela lenaneong le tloaelehileng la Sekolo sa Tšebeletso sa Puso ea Molimo.
Joaloka molebeli oa Sekolo sa Tšebeletso sa Puso ea Molimo, u ka etsa ho hongata ho ruisa phutheho molemo. Lokisetsa hantle, ’me tumellanong le keletso e ho Baroma 12:6-8, u hlokomele kabelo ea hao joaloka letlotlo la bohlokoa le tsoang ho Molimo.