Khaolo ea 5

“Enoa ke Mora oa Ka”

HA BANA ba etsa lintho tse ntle, batho ba ba hlokomelang baa thaba. Ha ngoanana a etsa ntho e ntle, ntate oa hae oa thaba ha a khona ho re ho batho ba bang: “Enoa ke morali oa ka.” Kapa haeba moshemane a etsa ntho e ntle, ntate ka thabo o ee a re: “Enoa ke mora oa ka.”

Jesu o etsa se khahlisang Ntate oa hae kamehla. Kahoo Ntate oa hae o motlotlo ka eena. Na u sa hopola hore na Ntate oa Jesu o ile a etsa’ng ka letsatsi le leng ha Jesu a ne a e-na le balateli ba hae ba bararo?— E, Molimo o ile a bua a le leholimong a re ho bona: “Enoa ke Mora oa ka, ea ratoang, eo ke mo amohetseng.”—Matheu 17:5.

Kamehla Jesu o thabela ho etsa lintho tse khahlisang Ntate oa hae. Na ua tseba hore na ke hobane’ng? Hobane o rata Ntate oa hae. Ha motho a etsa lintho hobane feela a tlamehile ho li etsa, ho bonahala ho le thata ho li etsa. Empa ha a ithaopela ho li etsa, ho ba bonolo. Na ua tseba hore na ho ithaopa ho bolela’ng?— Ho bolela ho etsa ntho e itseng ka ho rata.

Le pele Jesu a tla lefatšeng, o ne a ithaopela ho etsa ntho e ’ngoe le e ’ngoe eo Ntate oa hae a mo kōpang hore a e etse. O ne a etsa sena hobane a rata Ntate oa hae, Jehova Molimo. Jesu o ne a phela sebakeng se setle ka ho fetisisa leholimong le Ntate oa hae. Empa Molimo o ne a e-na le mosebetsi o khethehileng oo a neng a batla hore Jesu a o etse. E le hore Jesu a phethe mosebetsi oo, o ile a tlameha ho tloha leholimong. O ile a tlameha ho tsoaloa e le lesea lefatšeng. Jesu o ile a ithaopela ho etsa sena hobane Jehova a ne a batla hore a se etse.

E le hore a tsoaloe e le lesea lefatšeng, Jesu o ile a tlameha ho ba le ’mè. Na ua tseba hore na ’mè oa hae e ne e le mang?— Lebitso la hae e ne e le Maria. Jehova o ile a romela lengeloi la hae Gabriele ho tsoa leholimong hore le bue le Maria. Gabriele o ile a mo bolella hore o ne a tla ba le ngoana oa moshemane. Ngoana eo o ne a tla bitsoa Jesu. Joale ntate oa ngoana e ne e tla ba mang?— Lengeloi le ile la re Ntate oa ngoana e tla ba Jehova Molimo. Ke kahoo Jesu a neng a tla bitsoa Mora oa Molimo.

U nahana hore Maria o ile a ikutloa joang ka see?— Na o ile a re, “Ha ke batle ho ba ’mè oa Jesu”? Che, Maria o ne a ikemiselitse ho etsa seo Molimo a se batlang. Empa Mora oa Molimo ea leholimong o ne a tla tsoaloa e le lesea joang lefatšeng? Ho tsoaloa ha Jesu ho ile ha fapana joang le ha bana ba bang bohle? Na ua tseba?—

Molimo o ile a etsa batsoali ba rōna ba pele, Adama le Eva, e le hore ba ka kopana ka tsela e babatsehang. Ka mor’a moo, ngoana o ne a tla qala ho hōla ka hare ho ’mè oa hae. Batho ba bang ba re seo ke mohlolo! Kea kholoa le uena u lumellana le bona.

Joale Molimo o ile a etsa mohlolo o mong o babatsehang le ho feta. O ile a nka bophelo ba Mora oa hae leholimong a bo kenya ka ho Maria. Molimo o ne a e-s’o ka a etsa ntho e joalo pele, ’me le ka mor’a moo, ha a e-s’o ka a e etsa. Ka lebaka la mohlolo ona, Jesu o ile a qala ho hōla ka hare ho Maria feela joalokaha bana ba bang ba hōla ka hare ho bo-’mè ba bona. Ka mor’a moo, Maria o ile a nyaloa ke Josefa.

Ha ho fihla nako ea hore Jesu a tsoaloe, Maria le Josefa ba ne ba etetse motseng oa Bethlehema. Empa o ne o tletse batho hohle. Ho ne ho bile ho se na moo Maria le Josefa ba ka lulang teng, kahoo ba ile ba tlameha ho lula setaleng sa liphoofolo. Ha ba le moo Maria a ba le ngoana, ’me Jesu a behoa sejelong, joalokaha u bona mona. Sejelo ke sebaka se tšelang lijo tsa likhomo le liphoofolo tse ling ha li ja.

Bosiung boo Jesu a hlahileng ka bona ho ile ha etsahala lintho tse thabisang. Lengeloi le ile la itlhahisa ho balisa ba bang, haufi le Bethlehema. Le ile la ba bolella hore Jesu ke motho oa bohlokoa. Lengeloi le ile la re: ‘Bonang! ke le bolella litaba tse molemo tse tla thabisa batho. Kajeno ho tsoetsoe ea tlang ho pholosa batho.’—Luka 2:10, 11.

Lengeloi le ile la bolella balisa hore ba tla fumana Jesu Bethlehema, a robalitsoe ka sejelong. Eaba hona hoo, mangeloi a mang leholimong a ikopanya le lengeloi leo la pele ho roriseng Molimo. Mangeloi a ile a bina a re: ‘Khanya e isoe ho Molimo, ’me khotso e be har’a batho bao a khahloang ke bona lefatšeng.’—Luka 2:12-14.

Ha mangeloi a tloha, balisa ba ile ba ea Bethlehema ’me ba fumana Jesu. Ha ba fihla ba bolella Josefa le Maria litaba tsohle tse monate tseo ba li utloileng. Na u ka inahanela kamoo Maria a ileng a thaba kateng ha a ile a ithaopela ho ba ’mè oa Jesu?

Hamorao, Josefa le Maria ba ile ba nka Jesu ba ea motseng oa Nazaretha. Ke moo Jesu a hōletseng teng. Ha a se a hōlile, o ile a qalisa mosebetsi oa hae o moholo oa ho ruta. Ena e ne e le karolo ea mosebetsi oo Jehova Molimo a neng a batla hore Mora oa hae a o etse lefatšeng. Jesu o ile a ithaopela ho etsa mosebetsi oo hobane o ne a rata Ntate oa hae oa leholimo haholo.

Pele Jesu a qala mosebetsi oa hae e le Mosuoe e Moholo, o ile a kolobetsoa ke Johanne Mokolobetsi Nōkeng ea Jordane. Eaba ho etsahala ntho e ’ngoe e makatsang! Ha Jesu a e-tsoa ka metsing, Jehova a bua a le leholimong, a re: “Enoa ke Mora oa ka, ea ratoang, eo ke mo amohetseng.” (Matheu 3:17) Na ha u thabe ha batsoali ba hao ba u bolella hore baa u rata?— Re ka kholiseha hore Jesu le eena o ile a thaba.

Jesu o ne a etsa se nepahetseng kamehla. O ne a sa iketse eka ke motho e mong eo e seng eena. Ha aa ka a bolella batho hore eena ke Molimo. Lengeloi Gabriele le ile la bolella Maria hore Jesu o ne a tla bitsoa Mora oa Molimo. Jesu ka boeena o ile a re ke Mora oa Molimo. Ha aa ka a bolella batho hore eena o tseba ho feta Ntate oa hae. O ile a re: “Ntate o moholo ho ’na.”—Johanne 14:28.

Le ha Jesu a le leholimong, ha Ntate oa hae a mo fa mosebetsi hore a o etse, Jesu o ne a o etsa. O ne a sa re o tla o etsa ebe o iketsetsa ho hong ho fapaneng. O ne a rata Ntate oa hae. O ne a mamela seo Ntate oa hae a se buang. Joale ha Jesu a tla lefatšeng, o ile a etsa seo Ntate oa hae oa leholimo a mo rometseng ho tla se etsa. Ha aa ka a qeta nako ea hae a etsa ntho e ’ngoe e fapaneng. Ke kahoo Jehova a khahlisoang ke Mora enoa oa hae!

Akere le rōna re batla ho khahlisa Jehova?— Joale re lokela ho bontša hore re hlile re mamela Molimo, joalokaha Jesu a entse. Molimo o bua le rōna ka Bibele. Akere e tla ba ho fosahetseng hore re etse eka re mamela Molimo empa re lumela lintho tse khahlanong le Bibele re bile re li etsa?— Hape u hopole hore re tla thabela ho khahlisa Jehova haeba re hlile re mo rata.

Joale bala litemana tsena tse ling tsa Bibele tse re bontšang seo re lokelang ho se tseba le ho se lumela ka Jesu: Matheu 7:21-23; Johanne 4:25, 26; le 1 Timothea 2:5, 6.

[Setšoantšo se leqepheng la 33]

Lengeloi Gabriele le ile la re’ng ho Maria?

[Setšoantšo se leqepheng la 34]

Ke hobane’ng ha Jesu a behiloe ka sejelong?

[Setšoantšo se leqepheng la 35]

Le leng la mangeloi aa le ile la bolella balisa litaba life tse molemo?