Khaolo ea 22
Lebaka Leo ka Lona re sa Lokelang ho Bua Leshano
ARE re ngoanana o re ho ’mè oa hae: “E ’Mè, ke tla khutla kapele ha sekolo se tsoa.” Ebe joale oa itšalla, o ipapalla le metsoalle ea hae ’me hamorao o re ho ’mè oa hae: “Tichere e ile ea re ke sale ha sekolo se tsoa.” Na ho tla be ho loketse hore a bue joalo?—
Kapa mohlomong moshemane o re ho ntate oa hae: “Che Ntate, hase ’na ea rahetseng bolo ka tlung.” Empa ho thoe’ng haeba e hlile e le eena ea e rahileng? Na o tla be a fositse ha a re hase eena?—
Mosuoe e Moholo o ile a re bontša ntho e nepahetseng eo re lokelang ho e etsa. O ile a re: “Lentsoe la lōna E le mpe le bolele E, Che ea lōna, Che; hobane se fetang tsena se tsoa ho ea khopo.” (Matheu 5:37) Jesu o ne a bolela eng ka seo?— O ne a bolela hore re lokela ho etsa seo re se buang.
Ka Bibeleng ho na le pale e ’ngoe e bontšang bohlokoa ba ho bua ’nete. E bua ka batho ba babeli ba neng ba ipolela hore ke barutuoa ba Jesu. A re ke re bone se ileng sa etsahala.
Likhoeli tse ka tlaase ho tse peli ka mor’a lefu la Jesu, batho ba bangata ba tsoang libakeng tse hōle ba ile ba tla Jerusalema moketeng oa bohlokoa oa Bajuda o bitsoang Pentekonta. Moapostola Petrose o ile a fana ka puo e monate eo ho eona a ileng a bolella batho ka Jesu, eo Jehova a neng a mo tsositse bafung. Lena e ne e le lekhetlo la pele batho ba bangata ba tlileng Jerusalema ba utloa ka Jesu. Ba ile ba batla ho utloa ho eketsehileng. Kahoo, ba ile ba etsa’ng?
Ba ile ba lula teng nako e teletsana ho feta kamoo ba neng ba nahanne kateng. Empa ka mor’a nakoana, ba bang ba bona ba ile ba felloa ke chelete ’me ba hloka thuso e le hore ba ka reka lijo. Barutuoa ba Jerusalema ba ne ba batla ho thusa baeti bao. Kahoo, ba bangata ba ile ba rekisa lintho tseo ba nang le tsona ’me ba tlisa chelete ho baapostola ba Jesu. Kahoo baapostola ba ile ba fana ka chelete eo ho ba e hlokang.
Ananiase le mosali oa hae, Safira, bao e neng e le litho tsa phutheho ea Bokreste, Jerusalema, ba ile ba rekisa tšimo ea bona. Ho ne ho se motho ea itseng ba e rekise. Ke bona ba ileng ba iketsetsa qeto eo. Empa ha baa ka ba etsa seo hobane ba ne ba rata barutuoa ba bacha ba Jesu. Ha e le hantle, Ananiase le Safira ba ne ba batla hore batho ba bang ba nahane hore ba molemo ho feta kamoo ba leng kateng. Kahoo ba ile ba etsa qeto ea hore ba re ba fana ka chelete eohle ho thusa ba bang. Empa ha e le hantle ba ile ba fana ka karolo e itseng feela ea eona le hoja bona ba ne ba re ba fane ka chelete eohle. U nahana’ng ka seo?—
Ananiase o ile a ea ho baapostola. A ba fa chelete. Ke ’nete hore Molimo o ne a tseba hore ha a fane ka eona kaofela. Kahoo Molimo a senolela moapostola Petrose hore Ananiase ha a bue ’nete ka taba ena.
Eaba Petrose o re: ‘Ananiase, ke hobane’ng ha u lumeletse Satane hore a u etsise see? Tšimo e ne e le ea hao. Ho ne ho se letho le u tlamang hore u e rekise. Le ha u se u rekisitse tšimo, ho ne ho le ho uena ho ikhethela seo u tlang ho se etsa ka chelete eo. Joale ke hobane’ng ha u etsa eka u fana ka chelete eohle empa u fana ka karolo e itseng feela ea eona? Ka ho etsa sena ha u thetse rōna feela, empa u thetsa le Molimo.’
Ena e ne e le taba e tebileng haholo. Ananiase o ne a buile leshano! O ne a sa etsa seo a se buileng. O ne a mpa a iketsisa. Bibele e re bolella se ileng sa etsahala ka mor’a moo. E re: ‘Ha a utloa mantsoe a Petrose, Ananiase a oela fatše ’me a shoa.’ Molimo o ile a bolaea Ananiase! Ka mor’a moo, setopo sa hae se ile sa ntšetsoa ka ntle ’me a patoa.
Lihora tse ka bang tharo hamorao, Safira a fihla. O ne a sa tsebe se etsahaletseng monna oa hae. Kahoo Petrose a mo botsa: ‘Na le rekisitse tšimo ka chelete eo le re fileng eona?’
Safira a re: ‘E, re rekisitse tšimo ka chelete eo.’ Empa o ne a bua leshano! Ba ne ba ipoloketse chelete e ’ngoe eo ba e fumaneng ha ba rekisa tšimo. Kahoo Molimo a bolaea le Safira.—Liketso 5:1-11.
Re lokela ho ithuta eng ho se ileng sa etsahalla Ananiase le Safira?— Re ithuta hore Molimo ha a rate batho ba buang leshano. Kamehla o batla hore re bue ’nete. Empa batho ba bangata ba re ho lokile ho bua leshano. Na u nahana hore batho bao ba nepile?— Na u ne u tseba hore ho kula, bohloko le lefu lefatšeng li bile teng ka lebaka la ho bua leshano?—
Hopola hore Diabolose o ile a bua leshano ho mosali oa pele, Eva. O ile a re ha a na ho shoa haeba a sa mamele Molimo ’me a ja tholoana eo Molimo a itseng a se ke a e ja. Eva o ile a kholoa Diabolose ’me a ja tholoana eo. A ba a etsa hore Adama le eena a e je. Joale e ile ea e-ba baetsalibe, ’me bana bohle ba bona ba ne ba tla tsoaloa e le baetsalibe. ’Me kaha ke baetsalibe, bana bohle ba Adama baa sokola ebile baa shoa. Khathatso ee eohle e qalile joang?— E qalile ka ho bua leshano.
Ke ka hona Jesu a ileng a re Diabolose “o leshano ’me ke ntate oa leshano”! Ke eena motho oa pele oa ho bua leshano. Ha motho a bua leshano, o etsisa Diabolose ea qalileng ho bua leshano. Re lokela ho nahana ka sena haeba re ikutloa re lekeha ho bua leshano.—Johanne 8:44.
Ke maemong afe moo u ka ikutloang u lekeha hore u bue leshano?— Na ke ha u entse phoso e itseng?— Le hoja u sa etse ka boomo, u ka ’na ua roba ntho e itseng. Ha u botsoa ka eona, na u lokela ho re e robiloe ke ngoan’eno? Kapa na u lokela ho etsa eka ha u tsebe hore na ho tlile joang hore e robehe?—
Ho thoe’ng haeba u ne u lokela ho etsa mosebetsi oa sekolo hae, empa u sa o qeta? Na u lokela ho bolela hore u o qetile, le hoja u sa o qeta?— Re lokela ho hopola Ananiase le Safira. Ha baa ka ba bua ’nete e feletseng. ’Me Molimo o ile a bontša kamoo seo se neng se fosahetse kateng ka ho ba bolaea.
Kahoo ho sa tsotellehe hore na re entse’ng, kamehla ho bua leshano ho mpefatsa lintho, ’me re lokela ho bua ’nete feela. Bibele e re: ‘Le bue ’nete.’ E boetse e re: “Le se ke la bolellana leshano.” Jehova o bua ’nete kamehla, ’me o lebeletse hore le rōna re bue ’nete kamehla.—Baefese 4:25; Bakolose 3:9.
Re lokela ho bua ’nete kamehla. Ke taba eo ho buuoang ka eona ho Exoda 20:16; Liproverbia 6:16-19; 12:19; 14:5; 16:6; le Baheberu 4:13.
[Setšoantšo se leqepheng la 117]
Moshemane eo o entse’ng e phoso?
[Setšoantšo se leqepheng la 118]
Ananiase o bolella Petrose leshano lefe?
[Setšoantšo se leqepheng la 119]
Ho etsahala’ng ka Ananiase ka lebaka la ho bua leshano?
[Setšoantšo se leqepheng la 120]
Jesu o ile a re motho oa pele oa ho bua leshano ke mang, hona phello ea seo e bile efe?
[Setšoantšo se leqepheng la 121]
Ke maemong afe moo u ka ikutloang u lekeha hore u bue leshano?