Khaolo ea 42

Lebaka Leo re Lokelang ho Sebetsa ka Lona

HA E le ho sebetsa le ho bapala, u rata’ng haholo?— Ke ’nete hore ha ho letho le phoso ka ho bapala. Bibele e re Jerusalema e ne e “tlala bashanyana le banana ba bapalang mapatlelong a eona.”—Zakaria 8:5.

Mosuoe e Moholo o ne a thabela ho bona bana ba bapala. Pele a tla lefatšeng, o ile a re: “Ke ile ka ba mabapa le [Molimo] ke le mosebetsi ea hloahloa . . . ke ntse ke nyakaletse ka pel’a hae ka nako eohle.” Hlokomela hore Jesu o ne a sebetsa le Jehova leholimong. ’Me ha a ne a le moo, o ile a re: “Lintho tseo ke neng ke li rata li ne li le ho bara ba batho.” E, joalokaha re se re ithutile, Mosuoe e Moholo o ne a hlile a thahasella batho bohle, ho akarelletsa le bana.—Liproverbia 8:30, 31.

Na u nahana hore Jesu o ne a bapala ha e sa le ngoana?— Mohlomong o ne a bapala. Empa kaha e ne e bile “mosebetsi ea hloahloa” leholimong, na o ne a sebetsa le ha a le lefatšeng?— Jesu o ne a bitsoa “mora oa ’metli oa mapolanka.” Empa o ne a boetse a bitsoa “’metli oa mapolanka.” See se bontša’ng?— Se bontša hore e tlameha ebe Josefa, ea ileng a hōlisa Jesu e le mora oa hae, o ile a mo ruta. Kahoo Jesu le eena e ile ea e-ba ’metli oa mapolanka.—Matheu 13:55; Mareka 6:3.

Jesu e ne e le ’metli oa mofuta ofe oa mapolanka?— Kaha e ne e le mosebetsi ea hloahloa leholimong, na ha u nahane hore e ile ea e-ba ’metli ea hloahloa oa mapolanka lefatšeng?— Ak’u nahane kamoo mosebetsi oo oa ho betla mapolanka o neng o le boima kateng mehleng eo. Mohlomong Jesu o ne a lokela ho tsamaea sebaka se itseng ho ea rema sefate, a se khaole likoto, a se jare a ee le sona hae, ebe ke hona a betlang litafole, libenche le lintho tse ling ka sona.

Na u nahana hore Jesu o ne a thabela mosebetsi oo?— Na u ne u ka thaba haeba u ne u khona ho etsetsa batho ba bang litafole le litulo le lintho tse ling tse ntle hore ba li sebelise?— Bibele e re ho molemo hore motho “a thabe mesebetsing ea hae.” Ho sebetsa ho fa motho thabo e itseng eo a ke keng a e fumana ha a bapala.—Moeklesia 3:22.

Ha e le hantle, ho sebetsa ho re tsoela molemo kelellong le ’meleng. Bana ba bangata ba rata ho itulela feela ebe ba shebella TV kapa ba bapala lipapali tsa video. Baa nona ebile ha ba na matla, ’me ha ba hlile ha baa thaba. Ebile ha ba etse hore ba bang ba thabe. Re lokela ho etsa’ng hore re thabe?—

Khaolong ea 17 ea buka ena re ithutile hore ho fana le ho thusa ba bang ka ho ba etsetsa lintho ho tlisa thabo. (Liketso 20:35) Bibele e re Jehova ke “Molimo ea thabileng.” (1 Timothea 1:11) ’Me joalokaha re balile ho Liproverbia, Jesu o ne a “nyakaletse ka pel’a hae ka nako eohle.” Ke hobane’ng ha Jesu a ne a thabile?— O ile a bolela lebaka le leng ha a ne a re: “Ntate o ’nile a tsoela pele ho sebetsa ho fihlela joale, le ’na ke tsoela pele ho sebetsa.”—Johanne 5:17.

Ha Jesu a ne a le lefatšeng, ha aa ka a sebetsa e le ’metli oa mapolanka bophelo bohle ba hae. Jehova Molimo o ne a e-na le mosebetsi o khethehileng oo a neng a batla hore a o etse ha a le lefatšeng. Na ua tseba hore na e ne e le ofe?— Jesu o ile a re: ‘Ke lokela ho bolela litaba tse molemo tsa ’muso oa Molimo, hobane ke rometsoe sena.’ (Luka 4:43) Ka linako tse ling ha Jesu a ne a bolella batho, ba ne ba mo lumela ebe ba bolella ba bang lintho tseo a li buileng, joalokaha mosali enoa oa Mosamaria eo u mo bonang mona a ile a etsa.—Johanne 4:7-15, 27-30.

Jesu o ile a ikutloa joang ka ho etsa mosebetsi oo? Na u nahana hore o ne a batla ho o etsa?— Jesu o ile a re: “Lijo tsa ka ke hore ke etse thato ea ea nthomileng le hore ke qete mosebetsi oa hae.” (Johanne 4:34) U ikutloa joang ha u ja lijo tseo u li ratang?— Sena se u fa leseli la hore u bone kamoo Jesu a neng a rata kateng mosebetsi oo Molimo a neng a mo file oona hore a o etse.

Molimo o entse hore ho ithuta mosebetsi ho re thuse ho thaba. O re mpho eo A e fileng motho ke hore “a thabe mosebetsing oa hae o boima.” Kahoo haeba u ithuta ho sebetsa u sa le monyenyane, u tla thaba bophelong bohle ba hao.—Moeklesia 5:19.

Sena ha se bolele hore ngoana e monyenyane a ka etsa mosebetsi oa motho e moholo, empa kaofela ha rōna re ka etsa mosebetsi o itseng. Batsoali ba hao ba ka ’na ba ea mosebetsing letsatsi le leng le le leng e le hore ba fumane chelete ea hore lelapa leno le be le lijo le moo le lulang teng. Mohlomong ua tseba hore ho na le mosebetsi o mongata o lokelang ho etsoa lapeng ho boloka lelapa le le makhethe le hloekile.

Ke mosebetsi ofe oo u ka o etsang o tla tsoela lelapa lohle molemo?— U ka thusa ka ho teka tafole, ho hlatsoa lijana, ho qhala toti, ho hloekisa kamore ea hao le ho phutha lintho tseo u bapalang ka tsona. Mohlomong u se u ntse u etsa tse ling tsa lintho tsena. Ka sebele mosebetsi oo oa thusa ka lapeng.

A re ke re bone hore na mosebetsi o joalo o thusa joang. U lokela ho phutha lintho tseo u bapalang ka tsona ha u se u qetile ho bapala. U ne u ka re ke hobane’ng ha hoo e le habohlokoa?— Ho thusa ho boloka ntlo e le makhethe, ebile ho ka boela ha thibela hore ho se be le likotsi. Haeba u sa phuthe lintho tseo u bapalang ka tsona, ka letsatsi le leng ’mè oa hao a ka ’na a tla a tšoere lintho tse ngata ’me ebe o hata e ’ngoe ea tsona. A ka ’na a thella ’me a oa ebe oa lemala. Mohlomong ho ka ba ha hlokahala hore a ee sepetlele. Na eo e ne e sa tl’o ba ntho e mpe?— Kahoo ha u phutha lintho tseo u bapalang ka tsona ha u se u qetile ho bapala, hoo ho tla thusa bohle.

Ho na le mosebetsi o mong hape oo bana ba lokelang ho o etsa. Ka mohlala, mosebetsi oa sekolo. Sekolong u ithuta ho bala. Bana ba bang ba thabela ho bala, empa ba bang ba re ho thata. Le haeba ho bonahala eka ho thata qalong, u tla thaba haeba u ithuta ho bala hantle. Ho na le lintho tse ngata tse thahasellisang tseo u tla ithuta tsona ha u tseba ho bala. U tla khona le ho ipalla buka ea Molimo, e leng Bibele. Kahoo ha u etsa mosebetsi oa hao oa sekolo hantle, akere hoo ho tla ba molemo e le kannete?—

Ho na le batho ba bang ba lekang ho qoba mosebetsi. Mohlomong u tseba ba bang ba etsang joalo. Empa kaha Molimo o re etselitse hore re sebetse, re lokela ho ithuta ho ho thabela. Mosuoe e Moholo o ne a thabela mosebetsi oa hae hakae?— O ne o tšoana le ha a ja lijo tseo a li ratang. Empa o ne a bua ka mosebetsi ofe?— O ne a bua ka oa ho bolella ba bang ka Jehova Molimo le kamoo ba ka fumanang bophelo bo sa feleng kateng.

Ho na le ho hong ho ka re thusang ho o thabela. Ipotse, ‘Ke hobane’ng ha mosebetsi oo o lokela ho etsoa?’ Ha u tseba hore na ke hobane’ng ha ntho e itseng e lokela ho etsoa, ho bonolo ho e etsa. ’Me ebang mosebetsi ke o moholo kapa o monyenyane, u etse hantle. Haeba u o etsa hantle, u tla thabela mosebetsi oa matsoho a hao, feela joalokaha Mosuoe e Moholo a ile a thabela oa hae.

Bibele e ka thusa motho ho ba mosebetsi ea molemo. Bala seo e se buang ho Liproverbia 10:4; 22:29; Moeklesia 3:12, 13; le Bakolose 3:23.

[Setšoantšo se leqepheng la 217]

Mosuoe e Moholo o ne a thabela eng pele a tla lefatšeng?

[Litšoantšo tse leqepheng la 218]

Jesu o ile a etsa mesebetsi efe e ’meli ha a ne a le lefatšeng?

[Setšoantšo se leqepheng la 221]

Ke hobane’ng ha e le habohlokoa ho phutha lintho tseo u bapalang ka tsona ha u se u qetile ho bapala ka tsona?