Khaolo ea 44

Metsoalle ea Rōna e Lokela ho Rata Molimo

METSOALLE ke batho bao re ratang ho bua le bona le ho qeta nako re e-na le bona. Empa ke habohlokoa ho ba le metsoalle e metle. U nahana hore motsoalle ea molemo ka ho fetisisa eo re ka bang le eena ke mang?— E, ke Jehova Molimo.

Na ka sebele re ka ba metsoalle ea Molimo?— Bibele e re Abrahama, e leng monna e mong ea phetseng khale, e ne e le “motsoalle oa Jehova.” (Jakobo 2:23) Na ua tseba hore na ke hobane’ng ha e ne e le motsoalle oa Jehova?— Bibele e re ke hobane Abrahama o ne a mamela Molimo. O ne a mamela le ha a ne a kōptjoa hore a etse ntho e itseng e thata. Kahoo e le hore re be metsoalle ea Jehova, re lokela ho etsa se mo khahlisang, feela joalokaha Abrahama a ile a etsa le joalokaha Mosuoe e Moholo a ne a lula a etsa.—Genese 22:1-14; Johanne 8:28, 29; Baheberu 11:8, 17-19.

Jesu o ile a re ho baapostola ba hae: “Le metsoalle ea ka haeba le etsa seo ke le laelang sona.” (Johanne 15:14) Kaha ntho e ’ngoe le e ’ngoe eo Jesu a neng a e bolella batho e ne e tsoa ho Jehova, Jesu o ne a bolela hore metsoalle ea hae ke batho ba etsang seo Molimo a reng ba lokela ho se etsa. Ha e le hantle, metsoalle eohle ea hae e ne e rata Molimo.

E meng ea metsoalle ea Mosuoe e Moholo e haufi-ufi e ne e le baapostola ba hae, bao litšoantšo tsa bona li hlahang leqepheng la 75 la buka ena. Ba ne ba tsamaea le eena ’me ba mo thusa ho etsa mosebetsi oa boboleli. Jesu o ne a qeta nako e ngata le banna bana. Ba ne ba e-ja hammoho. Ba ne ba buisana ka Molimo ba le hammoho. ’Me ba ne ba etsa le lintho tse ling ba le hammoho. Empa Jesu o ne a e-na le metsoalle e meng e mengata. O ne a tloaetse ho e etela, ’me ba ne ba e-ba le nako e monate hammoho.

Lelapa le leng leo Jesu a neng a rata ho le etela le ne le lula motsaneng oa Bethani, o ka thōkonyana ho motse o moholo oa Jerusalema. Na u sa hopola litho tsa lelapa leo?— E ne e le Maria le Maretha le khaitseli ea bona, Lazaro. Jesu o ile a re Lazaro ke motsoalle oa hae. (Johanne 11:1, 5, 11) Lebaka leo Jesu a neng a rata lelapa lena ka lona a bile a thabela ho le etela ke hobane le ne le rata Jehova le bile le Mo sebeletsa.

Sena ha se bolele hore Jesu o ne a se mosa ho batho ba sa sebeletseng Molimo. O ne a le mosa ho bona. O ne a bile a ea malapeng a bona ’me a e-ja le bona. Sena se ile sa etsa hore batho ba bang ba re Jesu ke “motsoalle oa babokelli ba lekhetho le baetsalibe.” (Matheu 11:19) ’Nete ke hore Jesu o ne a sa ee malapeng a batho bana hobane a ne a rata tsela eo ba phelang ka eona. O ne a ba etela e le hore a khone ho bua le bona ka Jehova. O ne a leka ho ba thusa hore ba tlohele litsela tsa bona tse mpe ’me ba sebeletse Molimo.

Sena se ile sa etsahala ka letsatsi le leng motseng oa Jeriko. Jesu o ne a iphetela feela a le tseleng e eang Jerusalema. Ho ne ho e-na le batho ba bangata, ’me har’a letšoele leo ho ne ho e-na le monna e mong ea bitsoang Zakiase. O ne a batla ho bona Jesu. Empa Zakiase o ne a le mokhutšoanyane, ’me a sitoa ho mo bona ka lebaka la letšoele. Kahoo o ile a mathela pele eaba o hloella sefateng e le hore a tle a bone Jesu hantle ha a feta.

Ha Jesu a fihla sefateng seo, o ile a sheba holimo eaba o re: “Potlaka ’me u theohe, etsoe kajeno ke tla lula ka tlung ea hao.” Empa Zakiase e ne e le morui ea ’nileng a etsa lintho tse mpe. Ke hobane’ng ha Jesu a ne a batla ho ea lelapeng la motho ea joalo?—

Hase hobane Jesu a ne a rata tsela eo monna eo a neng a phela ka eona. O ile a ea moo e le hore a bue le Zakiase ka Molimo. O ne a hlokometse kamoo monna eo a ikitlaelitseng kateng hore a mo bone. Kahoo o ne a tseba hore mohlomong Zakiase a ka mamela. Ena e ne e le nako e loketseng ea hore a buisane le eena ka tsela eo Molimo a reng batho ba lokela ho phela ka eona.

Joale, ho ile ha etsahala’ng?— Zakiase o ile a rata seo Jesu a se rutang. O ile a itšoabela haholo ka hore ebe o ile a qhekella batho, ’me a tšepisa ho khutlisa chelete eo a neng a se na tokelo ea ho e nka. Ka mor’a moo e ile ea e-ba molateli oa Jesu. Joale ka mor’a moo Jesu le Zakiase e ile ea e-ba metsoalle.—Luka 19:1-10.

Haeba re latela mohlala oa Mosuoe e Moholo, na ho na le mohla re tla ke re etele batho bao e seng metsoalle ea rōna?— E. Empa ha re na ho ea malapeng a bona hobane re rata tsela eo ba phelang ka eona. Ebile ha re na ho etsa lintho tse fosahetseng le bona. Re tla ba etela e le hore re ka buisana le bona ka Molimo.

Empa metsoalle ea rōna e haufi ke batho bao ka ho khetheha re ratang ho qeta nako re e-na le bona. E le hore e be metsoalle e metle, e lokela ho ba batho bao Molimo a ba ratang. Ba bang e ka ’na eaba ha ba tsebe hore na Jehova ke mang. Empa haeba ba batla ho ithuta ka eena, re ka ba thusa. ’Me ha ho fihla nako ea hore ba rate Jehova joaloka rōna, joale re ka ba metsoalle ea bona e haufi.

Ho na le tsela e ’ngoe hape eo ka eona re ka fumanang haeba motho e tla ba motsoalle ea molemo. Sheba lintho tseo a li etsang. Na o etsa lintho tse utloisang batho ba bang bohloko ebe oa ba tšeha? Akere seo ha sea lokela?— Na o lula a kena khathatsong? Akere rōna ha re batle hore a re kenye khathatsong?— Kapa na o etsa lintho tse mpe ka boomo ebe o nahana hore o bohlale hobane a sa tšoaroe? Le haeba motho eo a sa tšoaroe, akere Molimo o bone seo a se entseng?— Na u nahana hore batho ba etsang lintho tse joalo e ka ba metsoalle e molemo?—

Ke kōpa u nke Bibele ea hao. A re ke re bone seo e se buang ka tsela eo metsoalle ea rōna e amang bophelo ba rōna kateng. Ke lengolong la Bakorinthe ba Pele khaolo ea 15, temana ea 33. U le fumane?— Le baleha tjena: “Le se ke la thetsoa. Litloaelano tse mpe li senya mekhoa e metle.” Sena se bolela hore haeba re tsamaea le batho ba babe, le rōna re ka ’na ra ba babe. Hape ke ’nete hore metsoalle e metle e re thusa ho hlaolela mekhoa e metle.

Le ka mohla re se ke ra lebala hore Motho oa bohlokoa ka ho fetisisa bophelong ba rōna ke Jehova. Akere ha re batle ho senya botsoalle ba rōna le eena?— Kahoo re lokela ho ba hlokolosi hore re etse botsoalle feela le batho ba ratang Molimo.

Bohlokoa ba metsoalle e molemo bo bontšoa ho Pesaleme ea 119:115; Liproverbia 13:20; 2 Timothea 2:22; le 1 Johanne 2:15.

[Setšoantšo se leqepheng la 227]

Ke hobane’ng ha Abrahama e ile ea e-ba “motsoalle oa Jehova”?

[Setšoantšo se leqepheng la 228]

Ke hobane’ng ha Jesu a ne a atisa ho lula le lelapa lee ha a etetse Jerusalema? Na u tseba mabitso a bona?

[Setšoantšo se leqepheng la 229]

Ke hobane’ng ha Zakiase a ile a hloella sefateng see?

[Setšoantšo se leqepheng la 230]

Ke hobane’ng ha Jesu a etela Zakiase, hona Zakiase o tšepisa ho etsa’ng?