Balepi ba Linaleli ba Etela Jesu

Banna ba tsoang ka bochabela ba etetse Jesu. Ke balepi ba linaleli ’me ba re ba khona ho bolela lintho tse tla etsahala bophelong ba motho ka ho sheba linaleli. (Esaia 47:​13) Ha ba sa le hae, ba ile ba bona “naleli,” eaba ba tsamaea lik’hilomithara tse makholo ba e setse morao. Naleli ena ha ea ka ea ba isa Bethlehema empa e ile ea ba isa Jerusalema.

Ha ba fihla Jerusalema baa botsa, “o kae ea tsoetsoeng e le morena oa Bajuda? Etsoe re ile ra bona naleli ea hae ha re ne re le ka bochabela, ’me re tlil’o mo inamela.”​—Matheu 2:​1, 2.

Morena Heroda oa Jerusalema o utloela ka taba ena ’me o utloa bohloko haholo. O botsa Baprista ba ka sehloohong le baeta-pele ba bolumeli hore na Kreste o lokela ho hlahela hokae. Ba mo araba ho ea ka seo Mangolo a se buileng, ba re: “Bethlehema.” (Matheu 2:5; Mikea 5:2) Ka mor’a moo Morena Heroda o batla linohe tsane tsa linaleli ka lekunutu, ha a li fumana o re ho tsona: “E-eang le batle ka hloko ngoana eo e monyenyane, ’me ha le mo fumane le khutle le ntlalehele, e le hore le ’na nka ea ’me ka mo inamela.” (Matheu 2:8) Leha ho le joalo, ha e le hantle seo Heroda a se batlang ke ho bolaea Jesu.

Ha linohe li tloha, “naleli” eo li ileng tsa e bona ha li le ka bochabela ea li tataisa. Ena ha se naleli feela e tloaelehileng. Ho hlakile hore ho na le ea sebelisang ntho ena e shebahalang joaloka naleli ho tataisa linohe tsena. Banna bana ba latela “naleli” ena ho fihlela ba re qi! ntlong eo Josefa, Maria le mora oa bona ba lulang ho eona.

Ha ba fihla moo ba fumana Maria le Jesu ’me ba inamela Jesu, ba mo fa khauta, libano tse tšoeu le myra. Ha ba itokisetsa ho khutlela ho morena Heroda, Molimo o bua le bona torong hore ba se ke ba ea ho eena, kahoo ba nka tsela e fapaneng ho khutlela hae.

Na u nahana hore “naleli” ee e neng e ba tataisa e ne e tsoa ho Molimo? Le letho! Ho hlakile hore e ne e sa tsoe ho eena kaha ho fapana le hore e ba ise ho Jesu e ile ea ba isa ho Morena Heroda ea neng a batla ho mo bolaea. Hoja Molimo ha aa ka a bua le linohe tsena tsa linaleli, Morena Heroda a ka be a ile a bolaea Jesu. Joang kapa joang e tlameha ebe ke Satane ea neng a batla hore Jesu a bolaoe ’me o ile a sebelisa “naleli” ena ho phetha merero ea hae.