Jesu o Ruta ka ho Tšoarela

Batho ba arabela ka tsela e fapaneng molaetseng oa Jesu ho itšetlehile ka hore na lipelo tsa bona li joang. Sena se hlaka hantle Galilea ntlong ea monna oa Mofarisi ea bitsoang Simone. Monna enoa o memela Jesu lijong, mohlomong a batla ho tseba haholoanyane ka motho enoa ea khonang ho etsa mehlolo e tsotehang hakana. Jesu o amohela memo ena, mohlomong hobane a batla ho ruta batho ba tla beng ba le teng moo, feela joalokaha a ile a etsa ha a ne a menngoe ke babokelli ba lekhetho le baetsalibe.

Leha ho le joalo, ha Jesu a fihla ha monna enoa, ha a fumane kamohelo e mofuthu eo ka tloaelo e fuoang baeti. Litsela tsa Palestina li lepoqo ’me maoto a motho ea roetseng meqathatso a ka futha ke mocheso, hape a ka ba litšila. Kahoo ka tloaelo baeti ba hlatsuoa maoto ka metsi a pholileng e le ho bontša hore ba amohelehile. Jesu ha a fumane kamohelo e joalo. Ha ho motho ea mo amohelang ka ho mo aka joalokaha e le tloaelo sebakeng sena. Ntho e ’ngoe e bontšang kamohelo ea baeti ke ho tšela oli hloohong ea moeti. Ka masoabi ha ho na motho ea tšetseng Jesu ka oli. Na o fela a amohelehile moo?

Ke nako ea lijo ’me baeti ba lutse tafoleng. Ha ba ntse ba ja, mosali ea itlhahelang kantle oa nyenyelepa o kena ka tlung a sa re letho ho mang kapa mang. O “tsebahala motseng oo e le moetsalibe.” (Luka 7:​37) Ke ’nete hore batho bohle ha baa phethahala ’me ke baetsalibe empa mosali enoa ho bonahala a itšoere hampe, ebile e ka ’na eaba ke letekatse. Mohlomong o utloetse ka lithuto tsa Jesu ho akarelletsa le memo ea hae e reng “bohle ba sehlang le ba imetsoeng” ba tle ho eena. (Matheu 11:​28, 29) Ho bonahala ntho e mo susumelitseng hore a tle mona e le mantsoe le liketso tsa Jesu.

Mosali enoa o tla ho Jesu ’me o khumama maotong a hae. Meokho ea hae e rothela maotong a Jesu ’me o e hlakola ka moriri oa hae. O aka maoto a hae ka mosa hape o a tšela ka oli e nkhang hamonate eo a neng a e rekile. Simone o nyatsa se etsahalang ’me o buela ka pelong o re: “Monna enoa, haeba e ne e le moprofeta, a ka be a tseba hore na mosali ea mo amang ke mang le hore na ke oa mofuta ofe, hore ke moetsalibe.”​—Luka 7:39.

Ha Jesu a hlokomela hore na Simone o nahanne’ng o re ho eena: “Simone, ho na le hoo ke lokelang ho u bolella hona.” Ha a araba o re: “Mosuoe, ho bolele!” Jesu o tsoela-pele o re: “Banna ba babeli ba ne ba e-na le molato ho motho ea itseng ea alimanang, e mong o ne a e-na le molato oa lidenari tse makholo a mahlano, empa e mong oa tse mashome a mahlano. Ha ba se na letho leo ba ka lefang ka lona, a ba tšoarela ka bobeli ka bolokolohi. Ka hona, ke ofe oa bona ea tla mo rata haholo?” Mohlomong Simone o araba Jesu a sa utloisise hore na o ea kae ka taba ena, o re: “Ke nahana hore ke eo a ileng a mo tšoarela ka bolokolohi haholo.”​—Luka 7:​40-43.

Jesu o lumellana le eena. O sheba mosali enoa ’me o re ho Simone: “Na u bona mosali enoa? Ke kene ka tlung ea hao, ha oa ka oa mpha metsi bakeng sa maoto a ka. Empa mosali enoa o kolobisitse maoto a ka ka meokho ea hae ’me a e hlakola ka moriri oa hae. Ha oa ka oa nkaka, empa mosali enoa, ho tloha horeng ea ha ke kena, ha aa ka a tlohela ho aka maoto a ka ka lerato. Ha oa ka oa tlotsa hlooho ea ka ka oli, empa mosali enoa o ile a tlotsa maoto a ka ka oli e nkhang hamonate.” Jesu oa bona hore mosali enoa o fana ka bopaki bo bontšang hore o baketse libe tsa hae. Kahoo o phethela ka hore: “Kea u bolella, libe tsa hae, le hoja li le ngata, li tšoaretsoe, hobane o ile a rata haholo, empa ea tšoaretsoeng hanyenyane, o rata hanyenyane.”​—Luka 7:​44-47.

Jesu ha a lumellane le boitšoaro bo bobe. Ho fapana le hoo, oa bontša hore o utloela batho ba entseng libe tse tebileng bohloko ha ba baka, ba soabela liphoso tsa bona ’me ba batla ho tla ho eena ho fumana khatholoho. E tlameha ebe mosali enoa oa imoloha ha Jesu a re ho eena: “U tšoaretsoe libe. . . . Tumelo ea hao e u pholositse, tsamaea ka khotso.”​—Luka 7:​48, 50.