Ho ba Molateli oa Jesu ke Ntho e Tebileng Hakae?

Jesu o rutile lithuto tsa bohlokoa ha a le lijong ha Mofarisi. Joale ha a tsoela pele ka leeto la hae ho leba Jerusalema, letšoele le leholo la batho le mo sala morao. Ebe ke hobane’ng? Na ehlile batho baa ba thahasella ho ba balateli ba hae ho sa tsotellehe hore na ba lokela ho etsa’ng?

Ha ba ntse ba le tseleng, Jesu o bua ntho e ’ngoe e ka ’nang ea makatsa ba bang ba bona, o re: “Haeba leha e le mang a tla ho ’na ’me a sa hloee ntat’ae le ’m’ae le mosali le bana ba hae le barab’abo le baralib’abo, e, esita le moea oa hae, e ke ke ea e-ba morutuoa oa ka.” (Luka 14:​26) Ha e le hantle, mantsoe aa a Jesu a bolela’ng?

Jesu ha a bolele hore batho bohle bao ebang balateli ba hae ba lokela hore ba hle ba hloee beng ka bona. O bolela hore ba lokela ho ba hloea ka kutloisiso ea hore ba rate Jesu ho ba feta, eseng joaloka monna eo ho buuoang ka eena papisong ea lijo tsa shoalane ea ileng a hana memo ea bohlokoa hobane feela a re o sa tsoa nyala. (Luka 14:​20) Ho thoe moholo-holo oa Bajuda e leng Jakobo o ne a “hloile” Lea a rata Ragele. Ka mantsoe a mang o ne a rata Ragele ho feta Lea.​—Genese 29:31.

Hlokomela hore Jesu o re barutuoa ba hae ba lokela ho hloea ‘esita le meea ea bona,’ kapa bophelo ba bona. Taba ena e bolela hore molateli oa ’nete oa Jesu o lokela ho rata Jesu ho feta le bophelo ba hae ka bo bona, a be a ikemisetse ho shoa haeba ho hlokahala. Ho hlakile hore ho ba molateli oa Kreste ke taba e tebileng haholo. Ha se ntho eo motho a ka e etsang habobebe feela a sa nahanisisa.

Batho ba latelang Jesu ba ka ’na ba tobana le mathata le ho hlorisoa, kaha Jesu o re: “Mang kapa mang ea sa jareng thupa ea hae ea tlhokofatso le ho ntšala morao e ke ke ea e-ba morutuoa oa ka.” (Luka 14:​27) Joaloka Jesu, morutuoa oa ’nete o lokela ho ikemisetsa hore o tla mamella moroalo oa ho nyatsuoa ke batho. Jesu o ile a ba a re bophelo ba hae bo tla fella matsohong a lira tsa hae.

Kahoo, letšoele le setseng Jesu morao le lokela ho hlahloba hantle hore na ho ba morutuoa oa Kreste ho akareletsa’ng. Jesu o hatisa ntlha ena ka ho etsa papiso. O re: “Ka mohlala, ke mang ho lona ea batlang ho haha tora ea sa luleng fatše pele ’me a bale litšenyehelo, ho bona haeba a e-na le ho lekaneng ho e phetha? Ho seng joalo, a ka ’na a beha motheo oa eona empa a se ke a khona ho e qeta.” (Luka 14:​28, 29) Kahoo, pele batho bana ba tsamaeang le Jesu ho ea Jerusalema ba ka fetoha barutuoa, ba ne ba lokela hore ebe ba entse qeto e tiileng ea hore ba tla jara boikarabelo bohle ba ho ba morutuoa.

O hatisa ntlha ena ka ho etsa papiso e ’ngoe hape, o re: “Ke morena ofe, ea il’o kopana le morena e mong ntoeng, ea sa luleng fatše pele ’me a tšoare therisano ho bona hore na o tla khona ka masole a likete tse leshome ho thulana ka katleho le ea mo futuhelang ka a likete tse mashome a mabeli? Ka sebele, haeba a ke ke a etsa joalo, joale ha eo a sa ntse a le hole o roma sehlopha sa manģosa ’me o kopa khotso.” Jesu o hlakisa ntlha ena ka ho re: “Kahoo, le ka kholiseha hore ha ho le ea mong oa lona ea sa reng lintho tsohle tsa hae li sale hantle eo e ka bang morutuoa oa ka.”​—Luka 14:​31-33.

Ke ’nete hore Jesu ha a bue le letšoele lena le mo setseng morao feela. Batho bohle ba ithutang ka Kreste ba lokela ho ikemisetsa ho etsa seo a se buang mona. Sena se bolela hore ba lokela ho ba malala-a-laotsoe hore ba ka lahleheloa ke ntho e ’ngoe le e ’ngoe eo ba nang le eona, esita le bophelo ba bona, haeba ba batla ho ba balateli ba Jesu. Ba lokela ho nahana ka taba ena ka botebo, ba be ba e rapelle.

Joale Jesu o bua ka taba e ’ngoe hape eo a kileng a bua ka eona Thutong ea hae ea Thabeng ha a ne a re barutuoa ba hae ke “letsoai la lefatše.” (Matheu 5:​13) Ho ka etsahala hore o ne a bolela hore joalokaha letsoai le etsa hore lijo li se ke tsa bola, le balateli ba hae ba ka khona ho etsa hore batho ba bang ba se ke ba senyeheloa ke setsoalle sa bona le Molimo. Joale, ha Jesu a se a le haufi le ho qeta mosebetsi oa hae lefatšeng, o re: “Ka sebele, letsoai le letle. Empa haeba esita le letsoai le lahleheloa ke matla a lona, le tla nokoa ka eng?” (Luka 14:​34) Bamameli ba hae baa tseba hore letsoai le leng le neng le fumaneha ka nako eo le ne le sa hloeka, le kopane le mobu ’me le se na thuso.

Kahoo, Jesu o bontša hore le haeba motho a se a e-na le nako e telele e le molateli oa hae, ha aa lokela ho khoehlisa le ka mohla. Haeba seo se ka etsahala, o tla be a se na thuso, joaloka letsoai le seng le se na matla. Lefatše le ka ’na la mo khesa. Ho feta moo, o tla be a se a se na thuso ho Molimo. A ka ba a tlisa thohako lebitsong la Molimo. Ke kahoo, Jesu a hatisang bohlokoa ba ho qoba liphello tse kang tsena, ka ho re: “Ea nang le litsebe ho mamela, a ke a mamele.”​—Luka 14:​35.