Gabariele o Etela Maria

Elizabetha o ne a amana le moroetsana e mong ea bitsoang Maria, ea neng a lula motseng oa Nazaretha o Galilea. Maria o ne a tl’o nyaloa ke Josefa oa ’metli oa mapolanka. Ha Elizabetha e le moimana oa likhoeli tse tšeletseng, lengeloi Gabariele la tla ho Maria la re: ‘Lumela Maria. Jehova o u hlohonolofalitse haholo.’ Maria ha aa ka a utloisisa hore na seo se bolela’ng. Eaba Gabariele o re ho eena: ‘U tla ima ’me u tsoale mora, u tla mo reha lebitso la Jesu. E tla ba Morena ’me ’Muso oa hae o ke ke oa fela.’

Maria a re: ‘Empa ha kea nyaloa. Nka ba le ngoana joang?’ Gabariele a re: ‘Ha ho letho leo Jehova a ke keng a khona ho le etsa. Moea o halalelang o tla theohela holim’a hao ’me u tla ba le mora. Mong ka uena Elizabetha le eena ke moimana.’ Eaba Maria o re: ‘Ke lekhoba la Jehova. E se eka ho ka etsahala seo u se buileng.’

Ka mor’a moo, Maria a etela Elizabetha motseng o maralleng. Ha Maria a mo lumelisa, lesea le ka mpeng ea Elizabetha la tlola. Elizabetha a tlala moea o halalelang ’me a re: ‘Maria, Jehova o u hlohonolofalitse. Ke tlotla ho eteloa ke ’mè oa Morena oa ka.’ Maria a re: ‘Ke tlotlisa Jehova ka pelo ea ka eohle.’ Maria o ile a qeta likhoeli tse tharo a e-na le Elizabetha eaba o khutlela ha habo Nazaretha.

Ha Josefa a utloa hore Maria ke moimana, a rera ho mo hlala. Empa lengeloi la tla ho eena ka toro ’me la re: ‘U se ke oa tšaba ho nyala Maria. Ha a etsa letho le phoso.’ Kahoo, Josefa a nyala Maria ’me a mo isa lapeng.