Lipotso Tse Tsoang ho Babali
● Na ho loketse bakeng sa Bakreste ho “noa ka ho lakaletsana mahlohonolo” ha ba kopana?—M. D., U.S.A.
Linaheng tse ling, ha metsoalle e se e tla arohana, e ba le seno sa ho arohana sa joala, ligalase li phahamisitsoe le ho otlanngoa hammoho li felehetsoa ke polelo ea ‘bophelong ba hao’ kapa ho hong ho tšoanang. Meketeng ea manyalo khafetsa ho otlanya ligalase ho neeloa ka ho tšoana bophelong le thabong ea ba sa tsoa nyalana bocha. Ka ho utloahalang, ba bang ba botsitse haeba ho ne ho tla lokela ho ea ka Mangolo bakeng sa Bakreste ho kopanela litakaletsong tse joalo.
Ka sebele ha ho letho le fosahetseng bakeng sa Mokreste ho lakaletsa motsoalle thabo le bophelo bo botle. Leha e le hore ho ne ho ke ke ha lokela bakeng sa sehlopha ho etsa joalo. Banna ba hōlileng moeeng lekholong la pele la lilemo ba ile ba phetha lengolo liphuthehong tsa Bakreste ka polelo e bolelang, hantle “bophelo bo botle ho lōna!”—Lik. 15:29.
Na ke hoo feela “takaletsong ea lehlohonolo”? Ke ka baka la’ng ha balakaletsi ba phahamisa ligalase tsa bona, kapa mabekere a bona ’me ba a otlanya hammoho? Na ke ketsiso ea moetlo o itseng. Hlokomela seo The Encyclopaedia Britannica, Khat. ea bo-11, Moqolo 13, leqephe 121, e re:
“Moetlo oa ho noa ‘bophelo’ ho ba phelang hantle o nkiloe mokhoeng oa boholo-holo oa bolumeli oa ho noela melimo le bafu. Ma-Gerike le ba-Roma lijong ba ne ba tšella melimo ea bona lino, ’me meketeng ea tšebeletso ba e noela le bafu.” Joale kamor’a ho bontša kamoo meetlo e joalo ea bohetene e tsoetseng pele har’a batho ba Scandinavia le Teuton, mosebetsi ona oa tšupiso oa eketsa: “Ho kopaneng haufi le meetlo ena ea ho noa ho kang sehlabelo e tšoanetse hoba e ne e le ho noela bophelo ba batho ba phelang.”
Ha batho ba bangata ba kopanela “takaletsong ea mahlohonolo” ka sebele ha ba nahane hore ba ka ’na ba ba etsisa moetlo oa ho phahamisa seno kapa sehlabelo se metsi melimong ea bohetene, leha ho le joalo hoo ho ka ’na ha e-ba joalo. Ka ntle le potso, Mokreste ea tšepehang o ne a ke ke a kopanela sehlabelong sa sebele sa bohetene, a hlokomela hore “le ke ke la noela senoelong sa Jehova le senoelong sa bademona.” (1 Ba-Kor. 10:21) Mokreste ea hōtseng ka tsebo hape o ne a tla phema esita le ho etsisa litšebeletso tsa bolumeli ba bohata. Tsela ena ea moea e hōlileng e tla khahlisa Jehova. Hopola, Molimo o elelitse Iseraele ka ho khethehileng khahlanong le ho etsisa mesebetsi ea bolumeli ea lichaba tsa bahetene tse ba teetseng hare.—Lev. 19:27; 21:5.
Haeba Mokreste a tla kōpa lehlohonolo la bomolimo bakeng sa e mong, he tsela e loketseng ea ho etsa hoo ke ka thapelo e tsoang pelong ho Molimo, e seng ka ho latela lineano tse theiloeng borapeling ba bohetene boo Jehova a bo nyonyang.—Ba-Fil. 1:9; 2 Ba-Kor. 1:11.
Meetlo le lineano li tletse lefatše lohle. Haeba Mokreste ea hōlileng ka tsebo a ne a tseba hore o itseng o ne o theiloe ka ho toba bolumeling ba bohata, o ne a tla o phema. Empa hase meetlo eohle e hanyetsoang. E meng e ka ’na ea ba ea sebakeng seo kapa melao ea boitšoaro ba motho ka ntle le tšimoloho ea bolumeli ba bohata, e joale ka ho lumelisana ka matsoho kapa ho inama. (Gen. 23:7) Motho ka mong a ka nahana seo a tsebang hore ke mokhoa o tloaelehileng ’me boikutlo ba hae bo tla ipea ho oona. Ke ka baka la’ng ha a o etsa? A ka ’na a ipotsa le eena, ‘Na ho etsa hona ho tla khopisa ba bang, kapa batho motseng ba tla kopanya liketso tsa ka le bolumeli ba bohata?’ (1 Ba-Kor. 10:32, 33) Ha ho le ea mong ea ka sebetsang joale ka letsoalo la Mokreste ea itseng; ka hoo ka mong a ka inahanela taba ’me etsa qeto hore a be le letsoalo le letle.—Lik. 23:1; 2 Ba-Kor. 1:12.