Boraro-bo-bong—bo Tsoa Mohloling Ofe?

Thuto e khōlō ea likereke tse ngata tsa Bojakane ke thuto ea Boraro-bo-bong, kopano le tekano ea Ntate, Mora (Lentsoe kapa Logos) le moea o halalelang. Ba itšoarelletseng ka eona ba mehleng ea kajeno ba atisa ho bolela hore e theiloe Mangolong le hore kahoo ke thuto ea Bokreste e qalileng nakong ea pele ea pale ea kereke.

Leha ho le joalo, Alvan Lamson, D.D., o ile a hlahloba bopaki ba sena ’me haholo-holo hore na ebe Justin Martyr le bangoli ba bang ba pele ba ile ba amohela le ho ruta thuto eo. Dr. Lamson a hlokomela:

“Bakeng sa tšimoloho ea thuto ea Logos le litšobotsi tse e khethollang, joalokaha li boleloa ke bo-Ntate ba rutehileng ba makholo a lilemo la bobeli le la boraro, ha rea tšoanela ho sheba Mangolo a Sejode, kapa lithutong tsa Jesu le baapostola ba hae, empa ho Philo [mohlalefi oa Mojode oa lekholong la pele la lilemo C.E.] le Maplato a Alexandria. Tumellanong le pono ena, re nka hore thuto ea Boraro-bo-bong e ile ea qaptjoa ka mokhoa o iketlileng le o moraro-rao haholo; hore ho qaleha ha eona ho bile mohloling oo ho hang o sa tsejoeng Mangolong a Sejode le a Bokreste; hore e ile ea hōla, ’me ea khomeletsoa Bokresteng, ka matsoho a bo-Ntate ba Maplato; hore mehleng ea Justin [c. 100-165 C.E.], le khale kamorao ho moo, sebopeho se khethollehileng le bonyenyane ba Mora li ne li rutoa bokahohleng; le hore seritinyana sa pele sa Boraro-bo-bong e ne e le hona se bonahalang.”—The Church of the First Three Centuries, leq. 34.