Ke ka Baka La’ng re Laola Leleme la Rona

Na u tseba motho ea buang haholo? Liproverbia 10:19 e re nea lebaka la ho ikalosa tabeng ena. E re: “Lipolelong tse ngata, tšito ha e hlokoe; ka baka leo, ea itšoarang molomo o bohlale.”

Moen’abo Jesu Jakobo o tiisa hore ho hlokahala hore motho a itlhokomele hore a se khopise ka leleme, hobane ho hloleha ho laola leleme ho ka etsa hore borapeli ba motho e be lefeela. (Jak. 1:26) Ha ho motho lea mong har’a rona ea ka tsebang ho laola leleme ka ho phethahetseng, empa ’nete ke hore re ka ntlafatsa ho sena.—Jak. 3:2-8.

Hona ha ho bolele hore re fetohe limumu, re se kopanele moqoqong. Empa hobane’ng ha re sa itlhahlobe? Hlahloba cheseho ea hao ho se hokae. Mohlomong moqoqong oa sehlopha, u ikutloa u chesehela ho akhela lentsoe tabeng e ’ngoe le e ’ngoe e buuoang. Moqoqong o akarelletsang litaba tse sa tšoaneng tsa bophelo, na u iphumana u chesehela ho bua ho itseng ho feta ba bang sehlopheng? Haeba ho joalo, mohlomong ho nahana ka ho teba ka Liproverbia 10:19 ho ka u thusa.