‘Monna ea Ineetseng Haholo’

William Kirk Jackson o hlahile ka la 16 Loetse, 1901, Galveston, Texas. Kamor’a ho phela bophelo bohle a ineetse tšebeletsong ea Jehova Molimo, o phethile tsela ea hae ea lefatšeng ka la 13 Tšitoe, 1981.

Qalehong ea bophelo ba hae, William o bontšitse thahasello e kholo ’neteng ea Bibele. Ka 1915, ha a le lilemo li 14, a ineela ho Jehova ka Kreste Jesu. Ka mehla o ne a nka pitso ea hae e le e mong oa batlotsuoa ba Morena Jesu Kreste e le ea bohlokoa. Ka la 1 Phupjane, 1933, a kena tšebeletsong ea nako e tletseng ho Jehova e le pula-maliboho. Kamor’a ho phethahatsa likabelo tse khethehileng Washington, D.C., le Chicago, Illinois, Moena Jackson ea e-ba setho sa ka mehla sa lelapa la Bethele la Brooklyn ka la 13 Pulungoana, 1937. A sebeletsa le lekala la boeletsi ba molao le Hayden C. Covington ho tloha ka 1941, o bile khabong ea ntoa e neng loanela ho hlōla ho hlokomelehang ha Lipaki tsa Jehova Lekhotleng la Maipiletso la U.S. O ile a khethoa ke Sehlopha se Busang sa Lipaki tsa Jehova ka la 15 Mphalane, 1971, ’me ka nako ea teng a abeloa ho hlokomela litaba Likomiting tsa Tšebeletso le Khatiso.

Moena Jackson o ne a ikokobelitse, a inyenyefalitse ’me ho se mohla o inkang e le motho oa bohlokoa. O tsejoa ke ba likete ho pota lefatše lohle e le “Bill,” o ne a le bonolo, a atameleha ka nako efe kapa efe, a le mofuthu ’me e le motsoalle ea thabisang; ka linako tsohle o ne a etsa hore batho phuthulohe. Puong ea Sehopotso e neng e fanoe Bethele ea Brooklyn, F. W. Franz o itse: ‘Re leboha Jehova Molimo ka hore ebe o na le Paki e ntle hakana. O phethile tsela ea hae ka botšepehi, ’me moputso o tiile bakeng sa hae. Bill Jackson e ne e le monna ea ineetseng haholo.’