“Re Ananela ba Hōlileng!”
JOBO o itse: “Maqheku a na le bohlale, lilemo tse ngata li na le kutloisiso.” (Jobo 12:12) Salomone ka ho tšoanang o ile a lemoha: “Moriri o moputsoa, ha o fumanoa tseleng ea ho loka, ke mokhabo oa hlompho.” (Liproverbia 16:31) Mantsoe ana a builoe nakong ea ha ba baholo ba ne ba hlomphuoa le ho nkeloa holimo. ’Me khafetsa Bibele e bontša kamoo ba bacha ba neng ba rua molemo kateng mehleng eo ka ho tloaelana le ba holileng.
Ka mohlala, Ruthe o bile le monyetla oa ho shebella le ho nahana ka mohlala o beiloeng ke matsala’e, Naomi. Ho bonahala hore setsoalle sena se ile sa fella ka hore Ruthe a fumane takatso ea ho rapela Jehova. Ka hona eare ha a fuoa monyetla oa ho arohana le Naomi le ho khutlela naheng ea habo ea borapeli ba litšoantšo, ka botšepehi Ruthe a re: “Ke tla ea moo u eang, ke lule le moo u lulang; chaba sa hao ke chaba sa ka, ’me Molimo oa hao ke Molimo oa ka.” (Ruthe 1:16, 17) E, ka lebaka la setsoalle sa hae le Naomi, Ruthe a fetoha “mosali ea khabane.”—Ruthe 3:11.
Timothea ke e mong ea ileng a rua molemo ka ho tloaelana le motho e moholo. O qetile lilemo a tsamaea le moapostola Pauluse. ’Me leha ba se ba arotsoe ke teronko, Timothea o ne a amohela mangolo a tsoang ho Pauluse ao e neng e le khothatso ea ho ‘hotetsa joale ka mollo mpho ea Molimo’ e neng e le ho Timothea. (2 Timothea 1:6-8) Timothea o ne a ithutile ka ho phethahetseng ho Pauluse hoo ha a ngolla Bafilippi, Pauluse a hlalositseng hore ‘ha a na e mong eo pelo ea hae e tšoanang le ea ka joale ka eena [Timothea], ea neng a tla hlokomela taba tsa bona ka sebele joale ka eena.’—Ba-Filippi 2:20.
Leha ho le joalo, kajeno, ho hlompha ba hōlileng ho se ho batla ho nyametse linaheng tse ling. Leha ho le joalo, na ho ka tsela ee har’a Bakreste? Le hanyenyane. Bakreste ba ’nete kajeno ba sa ntsane ba ananela hore ba baholo ba na le ho hongata hoo ba ka fanang ka hona ka lebaka la tumelo ea bona, boinehelo ba bomolimo le phihlelo bophelong. Ka mohlala, khaitseli e mong o ile a ngola: “Neng le neng ha ke ikutloa ke imetsoe ke tsamaiso ena, ke iphumama ke qamaka ba baholo ba ka phuthehong, ke khothatsoa ke ho tiea hoa bona.” Mohlankana ea lilemo li 34, ka ho tšoanang o re ka ba hōlileng ba tšepahalang: “Ba nthusitse likarolong tsohle tsa bophelo. Ka mohlala, ke ne ke batla ho tseba hore na nka fumana botsitso joang. Moena ea lilemo li 72 a re ho ’na, ‘Tiisa hore u etsa lintho tseo Jehova a batlang ha u li etsa pele. Ke ntoa ea kamehla. Empa botsitso bo tla ha u ntse u batla ’muso pele.’”
Tabeng e ’ngoe, moena ea lilemo li 87 o ile a kula haholo. Moholo e mong, hammoho le moena e mong ea seng a khathetse, ba mo etela. Moena ea seng a khathetse, a lla, a re, “U bile motsoalle ea molemo. Ke tla u hloloheloa.” E leng moo moena ea hōlileng a ileng a arabela, “Le ’na ke tla u hlōloheloa.” A ntse a lla, moena ea khathetseng a re, “Ke tla u bona Tsamaisong e Ncha, haeba e tla tla.” Le hoja a fokola, moena oa rōna ea hōlileng a lula a tsitsitse, ’me a arabela ka tieo: “E tla tla.” Le hoja moena ea khathetseng a ile a sitoa ho arabela khothatsong ena, tumelo ea moena ea hōlileng ea ama pelo ea moholo ea neng a shebelletse sena. O-oa hopola: “Tumelo ea hae e nthusitse haholo.”
Baena le bo-khaitseli ba baholo ba atisa ho hopola ka phihlelo ea bona bophelong ba Bokreste ’me ba fane ka keletso e utloahalang le e molemo. E mong ea seng a hōlile o eletsa ka hore: “Nka bana ba hao ba banyenyane, u ba kope, hobane haufi ba tla be ba holile. Hlokomela bona pele. Ke barutuoa ba hao ba bohlokoa.” E mong o khothalletsa ka hore: “Ha likhatello tse tsoang tsamaisong ena li u oela kapa ha Satane a u leka, le ka mohla u se tele ’nete. U ’ne u e sebelise, hobane ho tla fella ka thabo ea hao.” Banyalani ba bang ba seng ba hōlile ba sebelelitseng ka botšepehi sebakeng se seng sa New Zealand ka lilemo tse ka bang 43 ba fana ka keletso ena e molemo: “Haeba u ka khona, ho molemo ho lula sebakeng se le seng ho e-na le ho leba koana le koana. ’Nete e na le matla a maholoanyane motseng, ’me e u boloka u e phelela, kahoo e u matlafatsa.”
Ke ’nete, ba bangata ho baena ba rōna le bo-khaitseli ba seng ba tsofetse ba ke ke ba kopanela mosebetsing oa ntlo le ntlo joaloka ba bacha. Ba bang ba se ba rapaletse liphateng. Ba bang ba na le maloetse a bohloko. Khaitseli e mong ea seng a hōlile o ile a re: “Ha ke tšoenngoe ke ho tsofala. Seo ke sa se rateng ke seo botsofali bo tlang le sona.” Empa leha ho le joalo o ntse a tsoela pele ho bontša cheseho ea Bokreste!
Na u ipha nako ea hore u tsebe baena le bo-khaitseli ba hao ba hōlileng? Na u batla ho etsisa litšoaneleho tseo ba li bontšang, litšoaneleho tse hloekisitsoeng joaloka gauda ka nako le ka phihlelo? Ka sebele, baena ba rōna le bo-khaitseli ba rōna ba hōlileng ba Bakreste ke mohloli oa bohlokoa haeba feela re ka ipha sebaka sa hore re ba shebelle le ho bua le bona. Mokreste e mong e monyenyane O ile a re: “Ba tšepahalang ba hōlileng e bile mehlala ho ’na ho ineheleng ’neteng, leratong la ’nete, tumelong e phelang, qenehelong, le ho cheseheleng tšebeletso ea Molimo. Ho ’na bokhabane ba bona bo tšoana le lifate tse thuntseng ka botlalo, ’me ba tšoana le mollo o mofuthu bosiung bo batang.” Ka ’nete, re na le lebaka la ho ananela ba baholo ba rōna!