Jesu—Bophelo le Tšebeletso tsa Hae
Ho Ruta ka Litšoantšo
HO BONAHALA Jesu a le Kapernauma ha a khalemela Bafarisi. Hamorao letsatsing leo o tloha hae ’me o tsamaela Leoatleng le haufi la Galilea, moo ho bokanang matšoele a batho. O palama seketsoana, o elella thōkoana ’me o qala ho ruta batho ba lebopong la leoatle ka ’Muso oa maholimo. O etsa joalo ka letoto la lipapiso, kapa litšoantšo, se seng le se seng ka lintho tse tloaetsoeng ke batho bao.
Pele, Jesu o bua ka mojali ea jalang peō. Peō e ’ngoe e oela pel’a tsela ’me e jeoa ke linonyana. Peō e ’ngoe e oela mokurutlaneng. Kaha methapo ha ea teba, limela tseo tse ncha li pona ke letsatsi le bataolang. Ha peō e ’ngoe e oela har’a meutloa, e pupetsang limela ha li hōla. Qetellong, peō e ’ngoe e oela mobung o motle ’me e bea halekholo, e ’ngoe hamashome a tšeletseng, e ’ngoe hamashome a mararo.
Setšoantšong se seng, Jesu o re ’Muso oa Molimo o tšoantšoa le ha motho a jala peō. Ha matsatsi a ntse a feta, ha motho a robala leha a tsoha, peō ea mela. Motho eo ha a tsebe hore na e mela joang. Ea imelisa ’me e hlahisa lijo-thollo. Ha lijo-thollo tseo li butsoitse, monna eo oa li kotula.
Jesu o bolela setšoantšo sa boraro ka monna ea jalang mofuta o motle oa peō, empa ha a robetse, sera sea tla ’me se jala mofoka har’a koro. Bahlanka ba monna eo ba mo botsa hore na ba lokela ho fothola lehola leo. Empa oa arabela: ‘Che, mohlomong ha le ekha mofoka, le ka tšoha le fothola le eona koro. Li leseng tse peli, li hole hammoho, ho be ho fihle kotulo, joale ke tla bolella bakotuli hore ba hele mofoka pele, ’me ba o tlame mangata ’me ba o chese; ’me ba bokelle koro molikong.’
Ho ntšetsa pele puo ea hae ho letšoele lena le lebopong la leoatle, Jesu o boetse o fana ka litšoantšo tse ling tse peli. O hlalosa hore “’muso oa maholimo” o tšoana le tlhaku ea mosetareta eo motho a e lemang. Le hoja e le tlhaku e nyenyane ho feta lipeō tsohle, o re, e hōla ho feta limela tsohle. E fetoha sefate seo linonyana li tlang ho sona, li fumana moriti har’a makala a sona.
Kajeno ba bang ba pheha khang ea hore ho na le lipeō tse nyenyane ho feta lipeō tsa mosetareta. Empa Jesu ha a rute ka limela. Ho lipeō tseo Bagalilea ba mehleng ea hae ba tloaelaneng le tsona, tlhaku ea mosetareta ka sebele ke e nyenyane ho li feta. Kahoo ba ananela taba ea khōlo eo Jesu a e bontšang.
Qetellong, Jesu o bapisa “’muso oa maholimo” le tomoso eo mosali a e tsoakang le litekanyo tse tharo tse khōlō tsa phoofo. O re, ka nako ea teng e phunyeletsa likarolo tsohle tsa hlama.
Hoba a fane ka litšoantšo tsena tse hlano, Jesu o laela matšoele ana ho qhalana ’me o khutlela hae moo a lulang. Ka pele baapostola ba hae ba 12 le ba bang ba tla ho eena moo. Mattheu 13:1-9, 24-36; Mareka 4:1-9, 26-32; Luka 8:1-8.
◆ Ke neng hona hokae moo Jesu a buileng ka litšoantšo le matšoele?
◆ Ke litšoantšo life tse hlano tseo Jesu a li boleletseng matšoele?
◆ Ke hobane’ng ha Jesu a boletse hore tlhaku ea mosetareta ke e nyenyane ho feta lipeō tsohle?