Baboleli ba ’Muso Baa Tlaleha
Moputso oa Botšepehi
E NE e le Italy, lilemong tse 15 tse fetileng, ha Mofumahali B——, ea neng a le lilemo li 15 ka nako eo a qala ho tseba ’nete. Leha ho le joalo, ha a ka a tsoela pele, ’me kahoo a nyaloa ke motho ea sa lumelang. Peō ea ’nete e ile ea sala pelong ea hae, ’me hoo e ka bang selemong se fetileng o ile a amohela ho ithuta Bibele le e mong oa Lipaki tsa Jehova ’me a qala ho ea libokeng. Monna oa hae o ne a hanyetsa ka mabifi ’me a mo tšosa ka hore o tla mo leleka lapeng. O ne a ee a mo otle habōhlōkō hoo a neng a ee a hloke tlhokomelo ea lingaka. Mantsiboeeng a mang a itahlela ka Holong ea ’Muso nakong ea seboka, a otla moena, a pshatla khalase lemating, ’me a kharuma ka khalefo.
Ha mosali a khutlela lapeng, a fumana monna oa hae a mo notleletse ka ntle. Ho e-na le ho felloa ke sebete, a leba carabinieri (mapoleseng) ho ea ba tsebisa ka se etsahetseng ’me kamor’a moo a ea robala ha rakhali oa hae. Kamor’a matsatsi a mabeli monna oa hae a mo lumella ho khutlela lapeng.
Monna o tsebahala haholo motseng oo. O ile a qala ho nyefola Lipaki tsa Jehova phatlalatsa, ka hore li sentse lelapa la hae. Phutuhong ena e khahlanong le Lipaki, o ne a tšehelitsoe ke baruti. Moprista o ne a e-na le lipampiri tse khomarelang tse tlapisitsoeng ka mantsoe a latelang: “LIPAKI TSA JEHOVA: Le se ke la luka khotso ea lelapa lena. KEA LEBOHA!” ’me a etsa hore lipampiri tseo tse khomarelang li beoe mamating motseng oo. E mong le e mong o ne a bua ka Lipaki tsa Jehova ’me ba li soma le ho li nyelisa. Ho sa tsotellehe sena, baena ba iteta lifuba ’me ba tsoela pele ka cheseho e fetang ea pele tšebeletsong ea bona. Malapa a mangata a ne a sa batla lipampiri tse khomarelang mamating a oona. Ho ile ha tlalehoa hore bashemane ba bang, ba rometsoeng ke moprista, ba ne ba neoa 100 lire bakeng sa ho li khomaretsa mamating.
Nakong eona eo Monghali B——a tsebisa mosali oa hae hore o tla lokela ho tloha lapeng, kaha a se a nkile mehato ea ho batla karohano ea molao. Empa lintho li ne li qala ho fetoha motseng ona. Setsi sa moo sa seea-le-moea sa hasa lenaneo, ’me motlalehi a hlalosa nyeoe e le “bohato ba mofuta o belaetsang, ea mokhoa o fosahetseng.” Nakong ea lenaneo leo, baena ba rōna ba hlalosa hore malapa a mangata a ile a qobelloa ho nka lipampiri tse khomaretsoang. Hona ho pakoa ke ’nete ea hore li ile tsa beoa e le bosiu esita le menyakong e meng ea Lipaki tsa Jehova le malapa a amohelang liketelo tsa bona. Motlalehi oa sea-le-moea o ile a babatsa Lipaki tsa Jehova ’me a re ke batho “ba nang le tlhompho e khōlō le ba nang le bonolo bo phethahetseng.”
Qetellong, nako ea fihla ea hore banyalani bao ba hlahe ka pele ho moahloli ho qala karohano ea molao eo monna a neng a e batlile. Moahloli a babatsa Mofumahali B——ka takatso ea hae ea hore ba se ke ba arohana, ’me ha ba ntse ba emetse nyeoe, a mo fa tumello ea ho hlokomela bana. Ba ne ba ka tsoela pele ba phela lehaeng la bona, ’me monna oa hae o ne a tla lokela ho mo fa 250 000 lire ka khoeli. Monna o ile a hana, a re: “Ntlo ena ke thepa ea ’mè, ’me mosali oa ka a ke ke a lula teng.” Moahloli a arabela: “U batla ho ba monna u be u be mpoli. Mosali oa hao kamehla o tlameha ho lumela ’me mohla a hanang, u kenya motse oohle morusung. Ke ne nka utloisisa haeba mosali oa hao a ne a sa ka a tšepahala ho uena, empa ka hobane a latela tumelo e ’ngoe ho fapana le e ’ngoe hase taba ea hao.”
Hona joale Mofumahali B——o sebeletsa Jehova ka thabo. (Mattheu 5:10) Batho ba motse ba fetotse maikutlo a bona, ’me lipuisano tse babatsehang tsa Bibele li tsoela pele. Ba lumela hore hase Lipaki tsa Jehova tse lukang khotso ea lelapa. Haeba ho sa ntsane ho e-na le lipampiri tse khomaretseng mamating, ha li sa na moelelo oa letho.