“Rorisang Lebitso la Jehova”

Ka la 2 Loetse, 1986, German Democratic Republic (Jeremane Bochabela) e ile ea lokolla letoto la litempe tse bontšang chelete ea tšepe ea pale ea Jeremane. Sa pele letotong lena se bontšitsoe ka tlaase. Chelete ena ea tšepe e bontšitsoe e le ea 1633. Leha ho le joalo, ho thahasellisang ka ho khethehileng ke litlhaku tse ’nè tse benyang tsa Seheberu tse bontšoang li hatisitsoe cheleteng ena ea tšepe. Li bolela eng? Briefmarkenwelt, koranta ea Jeremane e hlahisang litempe tse bokeletsoeng, e fana ka tlhaloso ena: “Mangeloi a mabali, a okametseng karolo e ’ngoe ea motse, a nkile lebitso la Jehova lipakeng tsa ’ona.”

Lekholong la bo16 le la bo17 la lilemo, ho ne ho tloaelehile ho etsa lichelete tse joalo tsa tšepe Europe. Buka ea liphuputso ea Sejeremane ea 1838 e re: “Lebitso lichelete tsa tšepe tsa Jehova le akarelletsa lichelete tsohle tsa tšepe le likhau tsa tšepe tse bontšang lentsoe יהוה, Jehova, ka mokhoa o benyang, le le leng kapa le e-na le lentsoe Jesu, . . . hangata a na le mantsoe a a hlalosang; kaha hona ho fumanoa haholo-holo Licheleteng tse ngata [lichelete tsa selivera tse entsoeng ke litereke tse fapaneng tsa Jeremane pakeng tsa lekholo la bo15 le la bo19 la lilemo), li ile tsa liheloa sehlopheng se le seng se bitsoang lichelete tsa Jehova.”

Mohlomong batho ba bangata ba sebelisang litempe tseo ha ba tsebe hore litlhaku tsa Seheberu li emela lebitso la Molimo. Empa Lipaki tsa Jehova li motlotlo ho supa tšobotsi ena setempeng le ho hlalosa se boleloang ke lebitso la Jehova le bohlokoa ba lona. Kahoo, ho tsoa mohloling o sa lebelloang li thusoa hore e be tse “rorisang lebitso la Jehova.”—Pesaleme ea 135:1.