Baboleli ba ’Muso Baa Tlaleha
Chile Ea Atleha ka Leseli le Eketsehileng
JOALOKA khanya ea letsatsi ha e chabela lithaba tsa Andes ka meso, leseli la ’nete ea Bibele le ile la qala ho fihla Chile ka 1930. Selemong seo, e mong oa bahlanka ba inehetseng ba Jehova o ile a tla le litaba tse molemo Argentina. Kajeno, leseli la Lentsoe la Molimo le se le chabile ’me le finyelletse likhutlong tse hōle tsa naha.
Kaha ofisi ea pele ea lekala Chile e ile ea theoa ka 1945, mohaho o mocha oa lekala o moholoanyane o ile oa hahoa ka 1970, ha lenane la baboleli ba ’Muso le se le fihlile ho 7 000. Lilemong tse leshome tse latelang, leseli le eketsehileng le ile la thetsa lipelo tse ngata tse arabelang. Mathoasong a bo-1980 katoloso e tsoelang pele ea ofisi ea lekala e ne e hlokahala ka potlako. Ka hona, ka Loetse 1982 ho ile ha rekoa setša se boholo ba lihekthare tse 7 mathōkong a Santiago. ’Me kamor’a mosebetsi o mongata oa tokisetso ha qaloa ho chekoa ka Phuptjane 1984.
Ho ne ho futhumatsa pelo ho bona kamoo baena ba Chile, ba bacha le ba hōlileng, ba neng ba tšehetsa morero ona ka menehelo ea bona ea liatla tse bulehileng. Ba bang ba likete ba ile ba nehelana ka nako ea bona le tsebo ea bona. Ba bang ba nang le koetliso ea mesebetsi ea matsoho ba thusa ka tsebo ea bona. Ba bang ba ne ba etsa mosebetsi oa bobetli, ho cheseletsa, ho etsa likharetene, le ho khabisa mabala, kapa ba etsa mosebetsi o bonolo feela o etsoang ka lerato oa ho fothola litlama-tlama, ho khanna likiribae, le ho cheka mekoti. Ka sebele, leseli le tsoelang pele la Lentsoe la Molimo le thetsitse lipelo tsa batho ba hae ’me le ba susumelitse hore ba ithaope.—Pesaleme ea 110:3, TLP.
Bonngoe le boithaopo li ile tsa hlokomeloa ke ba kantle. Barekisi ba bangata esita le liithuti tsa univesithi le liprofesa ba ile ba tla setšeng sa mohaho ho tla sheba le ho ithuta. Sehahi se seng se ne se batla ho hira sehlopha sohle sa mohaho ho tla mo thusa ka suphamakete eo se neng se e haha. Morekisi e mong o ile a hlalosa kamoo sehlopha sa mosebetsi se neng se fapane kateng—ha ho rohakanoe, ha ho lebuoe holimo le tlaase ha ho sebetsoa. Ha a bolelloa hore kaofela ha bona e ne e le Lipaki tsa Jehova le hore ba ne ba le moo e le baithaopi, o ile a arabela: “Motho a ke ke a bona sena sebakeng leha e le sefe se seng. Lōna le batho ba lefatše le leng.”
Qetellong, ka Phato 1986 basebetsi ba lekala la Chile ba fallela mohahong o mocha o Puente Alto. ’Me ka la 25 Mphalane, A. D. Schroeder oa Sehlopha se Busang sa Lipaki tsa Jehova a le teng, letšoele le tletseng cheseho la ba 933 la bolela tšehetso ea lona ea pelo eohle ha ho nehelanoa ka mehaho e mecha tšebeletsong ea Jehova. Letsatsing le hlahlamang, ketsahalo ea bohlokoa ea tšoaroa lebaleng la lipapali le haufinyane, ’me ba 18 012 ba eketsa ka hore e phatlalatsong.
Na katoloso ee e hlile ea hlokahala? E re linnete li hle li ipuelle. Ha setša se rekoa ka 1982, ho ne ho e-na le bahoeletsi ba ’Muso ba 17 500 Chile. Hona joale ba kaholimo ho 29 000! ’Me ho tsamaisoa lithuto tsa mahae tsa Bibele tse ka bang 40 000, pheletso ha e bonahale. Kahoo leseli le tsoang Lentsoeng la Molimo a le ke le chabe ka khanya e eketsehileng tšimong ena e nonneng e mesikong ea maralla a Andes, e le thoriso ho Jehova le tlhohonolofatso ho batho ba hae.—Daniele 12:3.