“Polelo e Builoeng ka Motsotso o Tšoanelehang”
“Polelo e builoeng ka motsotso o tšoanelehang, e joale ka liapole tsa gauda pitsaneng ea silevera,” ho bolela Liproverbia 25:11. Mantsoe a rōna a nahanelang le liketso tse mosa li ka susumeletsa pelo ea motho ea lokileng tseleng ea ho amoheloa ke Jehova. Ho hong hoo re ka beng re ho buile kapa re ho entse, esita le lilemong tse fetileng, ho ka ’na ha hopoloa ka thabo ke motho e mong. Ka mohlala, ha molebeli oa potoloho le mosali oa hae, ba etetse phuthehong e ’ngoe, e ne e le baeti ba khaitseli ea mocha ’neteng ea sa tsoa kolobetsoa. Mosali oa molebeli oa potoloho a romela karete ea teboho ho ananela kamohelo e mofuthu e bontšitsoeng. Lilemo tse fetang tse supileng hamorao, a amohela lengolo le latelang:
“Ke ikutloile ke tlameha ho u ngolla le ho u bolella kamoo u bileng thuso ho ’na ka lilemo u hlile u sa hlokomele. Ke bile le uena le Jim ka nako e nyenyane feela ea lijo tsa motšehare, ’me ua nthomella karete e thabisang haholo ea teboho. E ne e tletse botsoalle, empa lengolo ke lona le fihlileng pelong ea ka, ’me le kamohla ha ke le lebale. Sena se bile ka 1976. E ne e le ’na feela lapeng la ka ea neng a hlile a thahasella ’nete. Ke ile ka ithuta le barali ba ka ’me ka leka ho ba mosali ea molemo. Empa ka linako tse ling ke ne ke batla ho tlohela, ho tlohela ’nete, le boikarabelo—ho tlohela feela. Empa lengolo lena leo u le ngotseng le ne le sebetsa pelong ea ka, ’me ke ne ke ipolella, ‘Ke ithata hakaakang,’ e be ke tsoela pele.
“Ha ho ntho le e ’ngoe lilemong tseo tse robeli e bileng le liphello tse joalo ho ’na, ’me ke ne ke batla ho u bolella ka eona. Ka ntle ho lengolo, ke ile ka nahana hore ho thabisa hakaakang hore motho ea tšoarehileng joaloka uena a nke nako ho nteboha ha ke entse ntho eo ke neng ke lokela hore e be ke e entse.
“E—lengolo lane—2 Johanne 8.
“Sandra”
Kajeno monna oa Sandra o kolobelitsoe ’me o kopanela le eena e le ’moleli oa litaba tse molemo. Morali e mong oa bona ke pula-maliboho oa kamehla, ha e mong e bile pula-maliboho oa nakoana hoba a fumane likhau sekolong se phahameng.
Qetellong, 2 Johanne 8 e re’ng? “Iponeleng, hore re se ke ra timelloa ke tseo re li sebelelitseng, re mpe re fuoe moputso o tletseng.”