Qeto
Ha ho pelaelo hore lenane la ba bileng teng Likopanong tsa “Toka ea Molimo” le tla be le feta la selemo se ka pele, ha ba 6 443 597 ba ne ba phuthehile libakeng tse 1 098 lefatšeng ka bophara, ’me ba 93 822 ba kolobetsoa. Puo, “‘Seotsoa’ se Tummeng Hampe” e ileng ea fanoa Likopanong tsohle tsa “Toka ea Molimo,” e ile ea lateloa ke ho lokolloa, ka lipuo tse fetang 20, ha buka e nang le litsǒantšo tse ntle e maqephe a 320 e sekoahelo se thata Tšenolo—Tlhōrō ea Eona e Hlollang ka Botle e Haufi! Sebui se ile sa bolella bamameli: “Sebelisang buka ena hantle lithutong tsa lōna tsa botho le tsa phutheho. Hape, le e sebelise ho tsebisa lefatše hore Babylona e Moholo o ahloletsoe timetso, hore joale lichaba li talimane le Harmagedone, le hore tlhōrō e hlollang e tla finyelloa pusong e babatsehang ea ’Muso oa Kreste le monyaluoa oa hae. Le tla thabela ho utloa le ho boloka lintho tsena, ‘hobane nako e khethiloeng e haufi’!”—Tšenolo 1:3, “NW.”
Rōna, bao ho tloha ka 1914 re phetseng ‘letsatsing la Morena’ le nakong ena ea kahlolo ea Molimo, re thabela tokelo e khōlō ho feta tsohle, ea ho sebeletsa Morena ‘Musi Jehova tlas’a Morena oa marena ea behiloeng ke eena, Jesu Kreste. (Tšenolo 1:10) Re le LIPAKI TSA JEHOVA, re tiisa hore:
(1) RE NYONYA thohako eo Babylona e Moholo, le Bokreste-’mōtoana ka ho khetheha, a e phaelletseng lebitsong la Molimo o ’notši oa ’nete o phelang, Jehova. Ha e le rōna, RE LUMELLANA ka pelo eohle, le mantsoe a Tšenolo 4:11: “Morena, u loketsoe ke ho neoa khanya, le hlompho, le matla.”
(2) RE NYONYA ho khomarela ha Bokreste-’mōtoana lithuto tsa Babylona, ka ho khetheha tsa melimo e meraro ho o le mong, ho se shoe ha moea oa motho, tlhokofatso e sa feleng liheleng, pelekatori ea mollo, le borapeli ba litšoantšo—tse kang seemahale sa Moroetsana Maria le sefapano. Tumellanong le Tšenolo 22:18, 19, KA TIEO RE UTLOA Lentsoe la Molimo le ngotsoeng le sohle se ka hare ho lona.
(3) RE NYONYA lifolosofi le mekhoa e khahlanong le Molimo, tse tloaelehileng haholo Bokreste-’mōtoaneng, tse kang ho iphetola ha lintho, litšelo tsa mali, ho ntša limpa, leshano, meharo, le ho se tšepahale. Borapeling ba rōna le tseleng ea rōna ea bophelo, RE TLA HLOMPHA ’Mōpi oa rōna, Jehova Molimo, ea Matla ’Ohle, eo litsela tsa hae li hlalosoang ho Tšenolo 15:3 e le tse lokileng le tsa ’nete.’
(4) RE NYONYA ho hlōleha ha Bokreste-’mōtoana ho mamela melaetsa ea Jesu e eang ho liphutheho tse supileng e ho Tšenolo likhaolo 2 le 3 litabeng tse kang ho etsa lihlotšoana tsa bokhelohi, borapeli ba litsǒantšo, bohlola, tšusumetso ea Jezebele, ho ba foofo, le ho hlōleha ho falimeha. Ha e le rōna, RE TLA UTLOA ’ME RE MAMELE seo “Moea o se bolellang liphutheho.”
(5) RE NYONYA boitšoaro bo bobe le ho lumella ntho e ’ngoe le e ’ngoe ho teng ho Bokreste-’mōtoana le har’a baruti ba bona, ’me re amohela kahlolo ea Jehova e hlakileng e boletsoeng ho Tšenolo 21:8 ea hore ba tsoelang pele litšileng tsa bona—lihlola, ba leshano, le ba joalo—ba tla felisoa ka ho felletseng. KA PELO EOHLE RE TŠEHETSA litekanyetso tsa Bibele tsa likamano tsa botona le botšehali, lenyalo, le bophelo ba lelapa.
(6) RE NYONYA botekatse ba moea bo entsoeng ka makholo a lilemo ke baruti ba Babylona e Moholo ka ho etsa mommori le babusi ba lipolotiki bakeng sa ho fumana matla, leruo, le puso ea ho hatella batho. RE IKEMISELITSE ho thusa ba lipelo li tšepahalang ho utloa mohoo oa lengeloi o ho Tšenolo 18:4: “Tlohang ho eena, lōna sechaba sa ka.”
(7) RE NYONYA molato o moholo oa mali o tlisitsoeng ke hore bophelo ba batho ba fetang limillione tse 100 bo entsoe sehlabelo ntoeng lekholong lena la lilemo feela, haholo-holo ka baka la bohlola ba seotsoa se seholo le mebuso ea lipolotiki. RE THABELA hore nako e khethiloeng e haufi bakeng sa hore Molimo o lihe kahlolo holim’a Babylona e Moholo, joalokaha ho boletsoe ka ho hlaka ho Tšenolo 18:21-24.
Re le Lipaki tsa Jehova, RE HO NKA E LE THABO LE TOKELO EO RE E NEILOENG ho tsebisa lefatše hore ka 1914 “mebuso ea lefatše e fetohile ’muso oa Morena [Jehova) oa rōna le oa Kreste oa hae.” (Tšenolo 11:15) RE IKEMISELITSE ho tsoela pele re sa tšabe ho tsebahatsa likahlolo tsa Jehova tse phatlalalitsoeng holim’a Babylona e Moholo le ho lemosa ka ho atamela ha ntoa ea Molimo ea Harmagedone. RE ITOKISELITSE ho pheta, ka lentsoe le phahamileng le ho “lichaba tsohle, le mefuta eohle, le lipuo tsohle, le merabe eohle,” litaba tse thabisang tsa hore “leholimo le lecha le lefatše le lecha” li atametse bakeng sa ho hlohonolofatsa batho ba utloang. (Tšenolo 14:6; 21:1) RE THABELA hore ka baka la phatlalatso ena, bongata bo boholo ba batho ba ka holimo ho limillione tse tharo ba tsoang lichabeng tsohle joale bo ikopantse le rōna lefatšeng ka bophara. Re kopane le lengeloi le fofang holimo sebakeng, kaofela rea phatlalatsa: “Tšabang Molimo, isang khanya ho oona, hobane nako ea ho ahlola ha oona e tlile; ’me le khumamele ea entseng leholimo, le lefatše, le leoatle, le liliba tsa metsi.”—Tšenolo 14:7.
Lipotso tsa Thuto ea “Qeto”:
1. Ke eng eo Lipaki tsa Jehova li e thabelang hona joale?
2. Ntlheng ka ’ngoe ea tse supileng tsa Qeto, bolela (a) seo Lipaki tsa Jehova li se nyonyang le (b) seo Lipaki li bolelang hore li lumellana le sona ka tieo.
3. (a) Lipaki tsa Jehova li na le thabo le tokelo efe? (b) Lipaki li na le boikemisetso bofe? (c) Ke eng hape eo re itokiselitseng ho e etsa? (d) Lipaki tsa Jehova li kopanela thabong le phatlalatsong efe?