Jesu Bophelo le Tšebeletso tsa Hae

Basebetsi Tšimong ea Merara

JESU o sa tsoa qeta ho re, “Ba bangata ba pele e tla ba ba morao, ’me ba morao e tla ba ba pele.” Joale o bontša sena ka ho pheta pale. Oa qala, “’Muso oa maholimo o tšoana le mong a ntlo ea tsoileng e sa le ka meso, ho memela tšimo ea hae ea merara balemi.”

Jesu o tsoela pele: “Eare ha [mong a ntlo] a lumellane le balemi hore moputso oa tsatsi le le leng e tla ba chelete ea denare, a ba romela tšimong ea hae ea merara. A boela a tsoa e batlile ho ba hora ea boraro, a bona ba bang ba eme lepatlelong la motse, ba sa etse letho. Le ho bona a re: E-eang le lōna tšimong ea ka ea merara, ’me ke tla le nea se le loketseng; ’me ba ea. A boela a tsoa e batlile ho ba hora ea botšelela, hape le ka ea boroba mono o le mong, ’me a boela a etsa joalo ka pele. Ha a e tsoa e batlile ho ba hora ea leshome le motso o mong, a bona ba bang ba eme ba sa etse letho; a re ho bona: Le emetse’ng joalo tsatsi lohle, le sa etse letho? Ba re ho eena: Ke kahobane re sa ka ra memuoa ke motho. A re ho bona: Le lōna, e-eang tšimong ea ka ea merara.”

Mong’a ntlo, kapa mong’a tšimo ea merara, ke Jehova Molimo, ’me tšimo ea merara ke sechaba sa Iseraele. Basebetsi tšimong ea merara ke batho ba tlisoang selekaneng sa Molao; ka ho khethehileng ke Bajode bao ba phelang mehleng ea baapostola. Ke feela le basebetsi ba letsatsi lohle moo ho etsoang tumellano ea moputso. Moputso ke denare bakeng sa mosebetsi oa letsatsi. Kaha “hora ea boraro” ke 9:00 hoseng, ba bitsitsoeng ka hora ea bo3, ea bo6, le ea bo11 ba sebetsa, ka ho latellana, lihora tse 9, 6, 3, le 1 feela.

Basebetsi ba lihora tse 12, kapa ba letsatsi lohle, ba emela baeta-pele ba Bajode ba ’nileng ba tšoareha ka ho tsoelang pele tšebeletsong ea bolumeli. Ba fapane le barutuoa ba Jesu, ba ’nileng ba hiroa mesebetsing ea ho tšoasa litlhapi kapa e meng ea boipheliso, hoo e ka bang boholo ba bophelo ba bona. Ha e-ea ka ea e-ba ho fihlela ka 29 C.E. ha “mong a ntlo” a romela Jesu Kreste ho bokella bana ho ba barutuoa ba hae. Ka hona ba ile ba fetoha “ba morao,” kapa basebetsi ba tšimo ea merara ba hora ea bo11.

Qetellong, letsatsi la mosebetsi la tšoantšetso o fela ka lefu la Jesu, ’me ho tla nako ea ho lefa basebetsi. Ho lateloa motheo o sa tloaelehang oa ho lefa ba morao pele, joalokaha ho hlalosoa: “Hoba e be mantsiboea, mong a tšimo ea merara a re ho mohlahlobi oa ntlo ea hae: Bitsa balemi [“basebetsi,” NW], u ba nee moputso oa bona; u qale ka ba morao, u qetelle ka ba pele. Ba memiloeng e batlile ho ba hora ea leshome le motso o mong, ha ba e-tla, e mong le e mong a fumana denare. Ba pele, ha ba e-tla, ba hlōma ba tla neoa ho fetisang; empa le bona ba neoa e mong le e mong denare. Ha ba e nkile, ba khanana ho mong a ntlo, ba re: Bao ba morao ba sebelitse hora e le ’ngoe feela, ’me u ba lekantse le rōna, ba jereng boima ba letsatsi le ho chesa ha lona! A araba, a re ho e mong oa bona: Molekan’a ka, ha ke u je; ana ha ua lumellana le ’na ka denare e le ’ngoe feela na? Nka ntho ea hao, u ikele; ke rata ho nea enoa oa morao joalo ka ha ke u neile. Kapa ha hoa ntokela ho etsa ka ntho tsa ka kamoo ke ratang kateng, na? Kapa leihlo la hao le mōna kahobane ke le molemo na?” Ha a qetella Jesu o pheta ntlha eo a e buileng pelenyana, o re: “Ka mokhoa o joalo, ba morao e tla ba ba pele, ba pele e tla ba ba morao.”

Ho amoheloa ha denare ho etsahetse, e seng ka lefu la Jesu, empa ka Pentakonta 33 C.E., ha Kreste, “mohlahlobi oa ntlo,” a tšollela moea o halalelang ho barutuoa ba hae. Barutuoa bana ba Jesu ba ne ba tšoana le “ba morao,” kapa basebetsi ba hora ea bo11. Denare e ne e sa emele mpho ea moea o halalelang ka booona. Denare e ne e le ntho e ’ngoe bakeng sa hore barutuoa ba e sebelise mona lefatšeng. E ne e le ntho e ’ngoe e neng e bolela bophelo ba bona, bophelo ba bona bo sa feleng. E ne e le tokelo ea ho ba Moiseraele oa moea, ba tlotselitsoe ho bolela ka ’Muso oa Molimo.

Kapele ba hiriloeng pele ba ile ba hlokomela hore barutuoa ba Jesu ba lefiloe, ’me ba ba bona ha ba sebelisa denare ea tšoantšetso. Empa ba ne ba batla ho fetang moea o halalelang hammoho le litokelo tsa ’ona tsa ’Muso. Ho korotla ha bona le lipelaelo ho ile ha nka sebōpeho sa ho hlorisa barutuoa ba Kreste, basebetsi “ba morao” tšimong ea merara.

Na phethahatso eo ea lekholong la pele la lilemo ke eona feela phethahatso ea papiso ea Jesu? Che, baruti ba Bokreste-’mōtoana lekholong lena la bo20 la lilemo, ka lebaka la boemo ba bona le boikarabello ba bona, e bile “ba pele” ba ho hireloa mosebetsi tšimong ea Molimo ea merara ea tšoantšetso. Ba ile ba nka baboleli ba inehetseng ba kopanelang le Watch Tower Bible and Tract Society e le “ba morao” ba ho fumana kabelo leha e le efe ea bohlokoa tšebeletsong ea Molimo. Empa, ha e le hantle, ke bona bana bao baruti ba ba nyelisitseng ba ileng ba fumana denare—tlotla ea ho sebeletsa e le baemeli ba tlotsitsoeng ba ’Muso oa Molimo oa leholimo. Mattheu 19:30–20:1-16.

◆ Ke eng se emeloang ke tšimo ea merara? Ke bo-mang ba emeloang ke mong’a tšimo ea merara le basebetsi ba lihora tse 12 le hora e le ’ngoe?

◆ Letsatsi la mosebetsi la tšoantšetso le ile la fela neng, hona ho lefuoa ho ile ha etsoa neng?

◆ Ke eng se emeloang ke ho lefuoa ha denare?