Jesu Bophelo le Tšebeletso tsa Hae

Setšoantšo sa Limina

MOHLOMONG Jesu o sa ntsane a le lapeng la Zakea, moo a emisitseng teng tseleng ea ho ea Jerusalema. Barutuoa ba hae ba lumela hore ha ba fihla Jerusalema, o tla phatlalatsa hore ke eena Messia ’me a hlome ’Muso oa hae. Ho lokisa khopolo ena le ho bontša hore ’Muso o sa le hōle, Jesu o etsa setšoantšo.

Oa pheta: “Monna e mong oa lelōko la borena o ne a ee lefatšeng le hōle ho ea neoa borena, a ntoo khutla.” Jesu ke ‘monna oa leloko la borena,’ ’me leholimo ke ‘lefatše le hōle.’ Ha a fihla moo, Ntat’ae o tla mo fa matla a borena.

Leha ho le joalo, pele a tloha, monna eo oa leloko la borena o bitsa bahlanka ba leshome ’me o neha e mong le e mong oa bona mina ea silevera, o re: “Hoèbang ka tsona, ho fihlela ke khutla.” Phethahatsong e qalang bahlanka ba leshome ba emela barutuoa ba pele ba Jesu. Tšebelisong e kholoanyane, ba tšoantšetsa bohle bao e tla ba majalefa a ka moso le eena ’Musong oa leholimo.

Limina tsa silevera ke likotoana tsa bohlokoahali tsa chelete, sekotoana ka seng se lekana le hoo e ka bang moputso oa likhoeli tse tharo bakeng sa motho ea hiriloeng temong. Empa limina li emela eng? Hona ke khoebo ea mofuta ofe eo bahlanka ba lokelang ho e etsa ka tsona?

Limina li emela matlotlo ao barutuoa ba tlotsitsoeng ka moea ba neng ba tla a sebelisa ho hlahisa majalefa a eketsehileng bakeng sa ’Muso oa leholimo ho fihlela Jesu a tla e le Morena ’Musong o tšepisitsoeng. Ka mor’a tsoho ea Jesu le ho itlhahisa ha hae ho barutuoa ba hae, o ile a ba fa limina tsa tšoantšetso hore ba etse barutuoa ba eketsehileng le hore ka tsela eo ba eketse sehlopha sa ’muso oa leholimo.

Jesu o tsoela pele: “Empa kaha baahi ba naha ea hae ba ne ba mo [monna eo oa leloko la borena] hloile, ba mo salisa barōmuoa morao, ba re: ‘Ha re rate ha eo a rena holim’a rōna.’” Baahi ke Baiseraele, kapa Bajode, ntle le barutuoa ba hae. Ka mor’a hore Jesu a ee leholimong, Bajode bana ka ho hlorisa barutuoa ba hae ba ile ba tsebahatsa hore ba ne ba sa batle hore e be morena oa bona. Ka tsela ena ba ile ba itšoara joaloka baahi ba ileng ba roma sehlopha sa manģosa.

Bahlanka ba leshome ba sebelisa limina tsa bona joang? Jesu oa hlalosa: “Eitse ha a khutla, e se e le khosi, a laela hore bahlanka bane bao a ba neileng chelete ba bitsetsoe ho eena, hore a tle a tsebe hore na ba fumane phaello e kae ka ho hoèba. Ha tla oa pele, a re: ‘Morena, mina ea hao e tsoetse limina tse leshome.’ A re ho eena: ‘U entse hantle, mohlanka ea khabane; hobane u ile ua tšepahala nthong e nyenyane, busa metse e leshome. Ha tla oa bobeli, a re: ‘Morena, mina ea hao e tsoetse limina tse hlano.’ Ho eo a re: ‘Uena, okamela metse e mehlano.’”

Mohlanka ea nang le limina tse leshome o tšoantšetsa sehlopha sa barutuoa se akarelletsang baapostola ho tloha ka Pentekonta 33 C.E. ho fihlela hona joale. Ba ileng ba fumana limina tse hlano le bona ba emela sehlopha se seng nakong e tšoanang seo, ho ea ka menyetla le matla a sona, se ileng sa eketsa matlotlo a morena oa sona lefatšeng. Lihlopha tseo ka bobeli li ile tsa bolela litaba tse molemo, ’me ka baka leo, ba bangata ba lipelo li ntle ba ile ba fetoha Bakreste. Bahlanka ba robong ba ile ba atleha ho hoeba ’me ba eketsa maruo a bona.

Jesu o tsoela pele: “Empa e mong a tla, a re: ‘Morena, bona, mina ea hao, eo ke neng ke e phuthetse leseleng, ke e patile, ke ena. Ke u tšabile, hobane u motho ea thata: u nka seo u sa kang ua se bea, ’me u kotula seo u sa kang ua se jala.’ A re ho eena: ‘Ke tla u ahlōla ka tsa molomo oa hao, mohlanka tooe ea khopo! U tsebile hore ke motho ea thata, ea nkang seo ke sa kang ka se bea, ea kotulang seo ke sa kang ka se jala! Ke hobane’ng ha u sa ka ua bea chelete ea ka bankeng? Ha ke khutla nkabe ke ile ka e ntša hammoho le phaello!’ A ntoo re ho ba emeng haufi: ‘Mo amoheng mina eo, le e nee ea nang le limina tse leshome!’”

Ho lahleheloa ke mina ea tšoantšetso ho bolela ho lahleheloa ke sebaka ’Musong oa leholimo bakeng sa mohlanka ea khopo. E, o lahleheloa ke tokelo ea ho busa, kamoo ho leng kateng, holim’a metse e leshome kapa metse e mehlano. Hape, hlokomela hore mohlanka eo ha a boleloe a le khopo ka baka la bobe leha e le bofe boo a bo etsang empa, ho fapana le hoo, ke ka baka la ho hlōleha ho sebeletsa ho eketsa leruo la ’muso oa morena oa hae.

Ha mina ea mohlanka ea khopo e fuoa mohlanka oa pele, ho etsoa khanyetso e reng: “Morena, o sa a e-na le limina tse leshome!” Empa Jesu oa araba: “Ho tla neoa e mong le e mong ea nang le letho, empa ea se nang letho, le seo a nang le sona o tla se amohuoa. Empa lira tsena tsa ka, tse sa kang tsa rata ha ke rena holim’a tsona, li tliseng koano, le li bolaele kapel’a ka.” Luka 19:11-27, TLP; Mattheu 28:19, 20.

◆ Ke eng e susumelletsang Jesu ho etsa setšoantšo sa limina?

◆ Monna oa leloko la borena ke mang, ’me lefatše leo a eang ho lona ke eng?

◆ Baahi ke bo-mang, ’me ba bontša lehloeo la bona joang?

◆ Bahlanka ke bo-mang, ’me ke eng e emeloang ke limina?

◆ Ke hobane’ng ha mohlanka e mong a bitsoa ea khopo, ’me ho lahleheloa ha hae ke mina ho bolela eng?