‘Bolela Lentsoe la Molimo ka Sebete’

JEHOVA Molimo a ka matlafaletsa bahlanka ba hae ho “bolela lentsoe la Molimo ka sebete.” (Liketso 4:31, TLP) Esita le ba bacha litseleng tsa ’nete ea Bibele le ba se nang phihlelo mosebetsing oa ho bolela evangeli ha baa lokela ho qea-qea ho bolela litaba tse molemo ka sebete. Côte d’Ivoire, bahoeletsi ba babeli ba litaba tse molemo ba ne ba le tšebeletsong ea ntlo le ntlo ha ba teana le moprofesara oa univesithi. Seriki, Paki e nyenyane, o ile a re Paki eo e ’ngoe e bue, a ikutloa a sa tšoanelehe bakeng sa ho bua le monna ea rutehileng hakaalo.

Moprofesara eo o ne a khathalitsoe ke leeme la merabe ’me o ile a beha Molimo molato ka mathata a morabe a teng, a ikutloa hore ke oona o bōpileng merabe e fapaneng. Ka mor’a puisano e telele e neng e bonahala ho se na moo e eang, Seriki o ile a qetella a tiile matla a ho bua, ’me ka bonolo a kenella moqoqo. (1 Ba-Thessalonika 2:2) Ka ho hlokomela kamoo ntlo ea moprofesara eo e neng e khabisitsoe kateng ka ho khetha mebala e metle, Seriki o ile a botsa moprofesara eo, “Ke hobane’ng ha u sa ka ua etsa hore ntlo ea hao eohle e be le ’mala o tšoanang?”

Moprofesara eo o ile a arabela ka sefutho, “U nahana hore kea hlanya!” Seriki o ile a arabela: “Che, empa ke hobane’ng ha re lokela ho lebella Molimo hore o etse ntho e ’ngoe le e ’ngoe hore e tšoane ka ’mala, le motho e mong le e mong?” Taba e ne e hlakile. Papiso eo e bonolo e ile ea ipaka e sebetsa, ’me bopaki bo botle bo ile ba fanoa ke Seriki eo pele a neng a le boi.