Tlhoriso e Tsoela Pele Burundi

MATHOASONG a 1989, babusi ba sechaba sa Afrika bohareng sa Burundi ba ile ba hlasela Lipaki tsa Jehova ka tlhoriso. Joalokaha ho tlalehuoe tokollong ea Molula-Qhooa ea August 15, 1989, ba boholong ba ile ba leka ho qobella Lipaki ho latola tumelo ea bona, ba sebelisa litlhaselo, litšoaro, lichapo, le ka litsela tse ling tse hlekefetsang. Boemo ebile bofe ho tloha nakong eo?

Peho e ’ngoe ho tsoa Burundi e bolela hore nakong ea ketelo ea molebeli oa setereke sebakeng sa Kinyinya le Gitega, ba boholong ba ile ba leka ho tšoara litho tsa phutheho nakong ea seboka. Molebeli oa setereke le oa potoloho ba ile ba phonyoha tšoaro eo, empa ba neng ba tšoaroe ba kopanyelletsa liithuti tse peli tsa sekolo se phahameng le ngoanana ea leng sekolong sa praemari. Kaofela ha bona ba shapuoa. Letsatsing le hlahlamang Lipaki tse neng li tšoeroe li ile tsa hlaha pel’a ’musisi ’me tsa hlalosa lebaka leo li sa amoheleng ho ba litho tsa mokha oa lipolotiki. Tsa shapuoa hape. Litlaleho tse ling li pheta liketsahalo tse tšoanang.

Moholo oa Mokreste ea ikarabellang Burundi o ngotse: “Ha ho Paki ea Jehova e tšoeroeng kahobane e utsoitse, e bolaile, kapa e leka ho tsoa ’muso ka tlaase. Haeba ba boholong ba na le mabaka a ’nete a ho otla Lipaki, ba lokela ho etsa joalo lekhotleng la phatlalatsa ho e-na le ho hlokofatsa baahi ba naha ba phelang ka khotso, ba tlatlapa thepa ea bona, le ho ba tsoma joaloka linyamatsane. Baena ba bangata ka hare ho naha ba ile ba qobelloa ho baleha mahaeng a bona le ho phela joaloka baphaphathehi. Khaitseli e mong eo monna oa hae a leng chankaneng o ile a bonana le balaoli ba bangata ka sepheo sa ho lokolla monna oa hae. O ile a khutlisoa ka karabo ena: ‘Re ke ke ra lokolla monna oa hao hafeela u ntse u amohela chelete e tsoang mose e romeloang mona ka morero oa ho felisa botsitso ba naha ea rōna.’ Mantsoe ao ke ketselletso e khōlō hakaakang ea leshano!”

Leha ho le joalo, ho na le litaba tse molemo tse hlahang Burundi. Lipaki ha li tšosoe ke sena. Ka masene empa e le ka mokhoa o tiileng ho boleloa ha litaba tse molemo ho ea hōla, ’me baena le bo-khaitseli ba elelloa hore haeba ba tšepa Jehova ka ho felletseng, ba ka mamella. Mangolo a mangata a hlalosang kamoo sena se halefisang ba bangata kateng a sa ntse a ngoletsoe Burundi ’me ha ho pelaelo hore a mang a mangata a tla latela ha lefatše le hlokomela hore Burundi e tsoela pele ka phutuho e se nang mosa ea tlhoriso khahlanong le Lipaki tsa Jehova.

[Lebokose le leqepheng la 15]

Aterese ea mopresidente oa Burundi ke:

His Excellency Major Pierre Buyoya

President of the Republic of Burundi

Bujumbura

REPUBLIC OF BURUNDI