Jesu Bophelo le Tšebeletso Tsa Hae

Baa mo Nehoa ’me ba Tsamaea ka Eena

HA Pilato, a susumelitsoe ke boitšoaro bo hlomphehang bo khutsitseng ba Jesu ea hlokofatsoang, a boela a leka ho mo lokolla, baprista ba baholo ba halefa le ho feta. Ba ikemiselitse ho se lumelle letho ho kena-kenana le morero oa bona o khopo. Kahoo ba tsosa mohoo oa bona: “Mo khokhothele! Mo khokhothele!”

Pilato o arabela ka ho teneha: “Mo nkeng ka bolōna ’me le mo khokhothele.” Ho fapana le seo Bajode ba ileng ba se bolela pejana, ba ka ’na ba e-ba le matla a ho bolaea batlōli ba molao bakeng sa litlōlo tsa bolumeli tse tebileng ka ho lekaneng. Joale, bonyane ka lekhetlo la bohlano, Pilato o tiisa hore Jesu ha a na molato, o re: “Ha ke fumane phoso leha e le efe ho eena.”

Ha Bajode ba bona hore liqoso tsa bona tsa bopolotiki ha lia atleha, ba khutlela qosong ea bolumeli ea ho nyefola e ileng ea sebelisoa lihora tse itseng pejana ha Jesu a ne a qosoa ka pel’a Sanhedrin. Ba re: “Re na le molao, ’me ho latela molao o lokela ho shoa, hobane o ikentse Mora oa Molimo.”

Qoso ena e ncha ho Pilato, ’me e mo tšosa haholo. Nakong ena o hlokomela hore Jesu hase motho ea tloaelehileng, joalokaha toro ea mosali oa hae le matla a makatsang a botho ba Jesu li bontša. Empa “Mora oa Molimo”? Pilato oa tseba hore Jesu o tsoa Galilea. Leha ho le joalo, na ho ka etsahala hore e be o ile a phela pele? Pilato o boetse o mo khutlisetsa ka tlung ea ’musisi, oa botsa: “U tsoa hokae?”

Jesu oa thōla. Pejana o ne a ile a bolella Pilato hore ke morena, empa o ile a bolela hore ’Muso oa hae hase karolo ea lefatše lena. Hona joale ha ho sa na tlhaloso e eketsehileng e ka bang le molemo o sebetsang. Leha ho le joalo, Pilato o ikutloa a theotsoe boemong ba hae ke ho hana ha Jesu ho araba, ’me o halefela Jesu ka mantsoe ana: “Ha u mpuise? Na ha u tsebe hore ke na le matla a ho u lokolla hape ke na le matla a ho u khokhothela?”

Jesu o arabela ka tlhompho: “U ka be u se na matla ho hang khahlanong le ’na hoja ua se ke ua a neoa a e-tsoa holimo.” O bua ka matla ao Molimo o a fileng babusi ba batho hore ba tsamaise litaba tsa lefatše. Jesu oa eketsa: “Ke ka lebaka lena monna ea nehelaneng ka ’na ho uena a nang le sebe se seholoanyane.” Ka sebele, moprista ea phahameng Kaiafa le ba mo tlatsitseng le Judase Iskariota kaofela ba jere boikarabelo bo tebileng haholoanyane ho feta Pilato bakeng sa tšoaro e se nang toka ea Jesu.

Pilato a khahluoe ka ho eketsehileng ke Jesu ’me a tšaba hore e ka ’na eaba O tsoa ho Molimo, o boetse o etsa boiteko ba ho Mo lokolla. Leha ho le joalo, Bajode ba nyatsa Pilato. Ba pheta qoso ea bona ea bopolotiki, ka masene ba mo etsetsa tšoso: “Haeba u lokolla monna enoa, ha u motsoalle oa Cesare. Monna e mong le e mong ea iketsang morena o nyefola Cesare.”

Ho sa tsotellehe liqoso tse tletseng tšokelo, Pilato o ntšetsa Jesu ka ntle hape. O boetse oa ipiletsa: “Bonang! Morena oa lōna!”

Karabelo e re: “Mo tlose! Mo tlose! Mo khokhothele!”

Pilato o botsa a feletsoe ke tšepo: “Ke khokhothele morena oa lōna?”

Bajode ha baa khotsofalla puso ea Baroma. Ka sebele, ba hloile puso ea Roma e hatellang! Leha ho le joalo, ka boikaketsi, baprista ba baholo ba re: “Ha re na morena, ha e se Cesare.”

Pilato a tšohile hore o tla lahleheloa ke boemo ba hae ba lipolotiki le botumo, qetellong o inehela ho se batloang ke Bajode ka phehello le ka litšoso. O nehelana ka Jesu. Masole a hlobolisa Jesu seaparo se pherese ’me a mo apesa liaparo tsa hae tsa ka ntle. Ha Jesu a isoa moo a il’o khokhotheloa teng, o jarisoa thupa ea hae ea tlhokofatso.

Joale e se e le motšehare oa hoseng ka Labohlano, la 14 Nisane; mohlomong e se e tla ba motšehare o moholo. Haesale Jesu a tsoha hoseng-seng ka Labone, ’me o hlokofalitsoe ke liphihlelo tse bohloko tse latellanang. Ka ho utloahalang, ka potlako o felloa ke matla ka baka la boima ba thupa. Kahoo mofeta-ka-tsela, Simone oa Cyrene e Afrika, o qobelloa ho mo jarela eona. Ha ba ntse ba e-ea pele, letšoele le leholo la batho lea ba latela, ho kopanyelletsa le basali ba bangata ba hlomohileng le ba llelang Jesu.

Ha Jesu a retelehela ho basali bao, o re: “Barali ba Jerusalema, se nteleleng, le mpe le llele lōna le bara ba lōna; hobane, bonang, mehla ea tla eo ho tla thoe: Ho lehlohonolo linyopa, le mala a sa kang a tsoala, le matsoèlè a sa kang a anyesa. Mohlang oo, ba tla qala ho re ho lithaba: Le re oele holimo; le ho maralla: Le re pupetse; hobane ekare ha ba etsa tseo ho sefate se setala, ho tla etsoa joang ho se omileng?”

Jesu o bua ka sefate sa sechaba sa Bajode, se sa ntsaneng se e-na le mongobo o itseng oa bophelo ka lebaka la boteng ba Jesu le ho ba teng ha masala a lumelang ho eena. Empa etlare ha bana ba tlosoa sechabeng, ho tla sala feela sefate se shoeleng moeeng, e, mokhatlo o hlophisitsoeng oa sechaba o omelletseng. Ha makhotla a Roma, a sebeletsang e le baphethahatsi ba kahlolo ea Molimo, a timetsa sechaba sa Bajode hoo ho tla baka lillo tse kaakang! Johanne 19:6-17, NW; 18:31; Luka 23:24-31; Mattheu 27:31, 32; Mareka 15:20, 21, NW.

◆ Baeta-pele ba bolumeli ba qosa Jesu ka eng ha liqoso tsa bona tsa bopolotiki li sa atlehe?

◆ E ka ’na eaba ke ka lebaka la’ng ha Pilato a tšoha le ho feta?

◆ Ke mang ea jarang sebe se seholoanyane bakeng sa se etsahallang Jesu?

◆ Baprista ba khona joang ho etsa hore Pilato a nehelane ka Jesu hore a bolaoe?

◆ Jesu o bolella basali ba mo llelang eng, ’me o bolela eng ha a bua ka sefate se “setala” ’me hamorao e se e le “se omileng”?