Jesu Bophelo le Tšebeletso Tsa Hae

Jesu oa Phela!

HA BASALI ba fumana lebitla la Jesu le se na letho, Maria Magdalena o titima ho ea bolella Petrose le Johanne. Leha ho le joalo, ka ho hlakileng, basali ba bang ba sala lebitleng. Kapele-pele lengeloi lea hlaha ’me le ba memela ka hare.

Mona basali bana ba bona lengeloi le leng hape, ’me le leng la mangeloi le re ho bona: “Ha e le lōna, le se ke la tšoha, hobane kea tseba hoba le batla Jesu, ea kileng a thakhisoa. Ha a sa le mona, hobane o tsohile joale ka ha a na a boletse. Tlong, le bone tao eo Morena a neng a beiloe ho eona. Le mpe le phakise le ee ho bolella barutuoa ba hae hore o tsohile bafung.” Kahoo, ka tšabo le ka thabo e khōlō, basali bana le bona baa titima.

Ka nako ena, Maria o se a fumane Petrose le Johanne, ’me oa ba tlalehela: “Ba tlositse Morena lebitleng, ’me ha re tsebe moo ba ’meileng teng.” Hang-hang baapostola ba babeli ba tloha moo ba titima. Johanne o siea Petrose—kaha o bonahala eka o monyenyane—’me o fihla pele lebitleng. Ka nako ena basali ba se ba tsamaile, ’me ha ho motho moo. Johanne oa inama ’me o nyarela ka lebitleng ’me o bona masela, empa o sala ka ntle ho lebitla.

Ha Petrose a fihla, ha a tsila-tsile empa o kena ka hare. O bona masela a beiloe moo fatše hammoho le lesela le neng le thatela hlooho ea Jesu. Le ne le phuthiloe ’me le behiloe sebakeng se le seng. Joale Johanne le eena o kena ka lebitleng ’me o lumela tlaleho ea Maria. Empa Petrose le Johanne ha ba utloisise hore Jesu o tsositsoe, esita leha A ne a ba bolella hangata hore O tla tsosoa. Ba tsielehile, bobeli ba bona ba khutlela hae, empa Maria, ea khutletseng lebitleng, oa sala.

Khabareng, basali ba bang ba potlaketse ho ea bolella barutuoa hore Jesu o tsositsoe, joalokaha mangeloi a ba laetse ho etsa joalo. Ha ba ntse ba titima joalo, Jesu o teana le bona ’me o re: “Lumelang!” Ba itihela maotong a hae ’me ba mo khumamela. Joale Jesu o re: “Se tšoheng; e-eang, le bolelle banab’eso hore ba ee Galilea; ke moo ba tla mpona teng.”

Pejana, ha ho ne ho etsahala tšisinyeho ea lefatše ’me mangeloi a itlhahisa, balebeli ba ile ba tšoha le ho thothomela ’me ba e-ba joaloka bafu. Ha ba hlaphoheloa, hang-hang ba ile ba khutlela motseng ’me ba bolella baprista ba baholo se etsahetseng. Ka mor’a ho kopana le “baholo” ba Bajode, ho etsoa qeto ea ho leka ho koahela taba ena ka ho neha masole tjotjo. Aa laeloa: “E-reng: Barutuoa ba hae ba tlile bosiu, ba mo utsoitse re robetse.”

Erekaha masole a Roma a ka ’na a fumana kotlo ea lefu ka baka la ho robala libakeng tsa oona tsa bolebeli, baprista baa tšepisa: “’Me leha ’musisi a utloa taba eo [ea ho khaleha ha lona], ke rōna re tla mo kholisa, re le sireletse.” Erekaha tjotjo e le e ngata ka ho lekaneng, masole a etsa joalokaha a laetsoe. Kahoo, tlaleho ea bohata ea ho utsuoa ha setopo sa Jesu e hasane hohle har’a Bajode.

Maria Magdalena, ea setseng lebitleng, o utloile bohloko haholo. Ekaba Jesu o hokae? Ha a nyarela ka lebitleng, o bona mangeloi a mabeli a apereng liaparo tse tšoeu, a itlhahisitseng hape! Le leng le lutse hloohong ’me le leng le lutse maotong moo setopo sa Jesu se neng se robetse teng. Aa botsa: “Mosali, u llela’ng?”

Maria oa arabela: “Ke kahobane ba tlositse Moren’a ka, ’me ha ke tsebe moo ba ’meileng teng.” Joale oa reteleha ’me o bona e mong ea boelang a botsa potso eo: “Mosali, u llela’ng?” ’Me enoa o boetse oa botsa: “U batla mang?”

Ka ho nahana hore motho enoa ke mohlokomeli oa serapa sa mabitla, Maria o re ho eena: “Monghali, ha ekaba ke uena u mo tlositseng, mpolelle moo u ’meileng teng, ke tle ke ee, ke mo nke.”

Motho eo o re: “Maria!” ’Me hang-hang a tseba ka tsela e tloaelehileng eo a buang le eena ka eona hore ke Jesu. Oa hooa: “Rab·boʹni!” (ke hore “Moruti!”). ’Me ka thabo e khaphatsehang, oa mo tšoara. Empa Jesu o re: “Se nkame, hobane ha ke e-so ho nyolohele ho Ntate; u mpe u ee ho banab’eso, u re ho bona: Ke nyolohela ho Ntate, e leng le Ntat’a lōna, ho Molimo oa ka, e leng le Molimo oa lōna.”

Joale Maria o titimela moo baapostola le barutuoa ba bang ba bokaneng teng. O phaella ka tlaleho ea hae tlalehong eo basali ba bang ba seng ba fane ka eona mabapi le ho bona Jesu ea tsositsoeng. Empa banna bana, ba sa kang ba lumela basali ba pele, ho bonahala le Maria ba sa mo lumele. Mattheu 28:3-15; Mareka 16:5-8; Luka 24:4-12; Johanne 20:2-18.

◆ Ka mor’a ho fumana lebitla le se na letho, Maria Magdalena o etsa eng, ’me ke phihlelo efe eo basali ba bang ba bang le eona?

◆ Petrose le Johanne ba arabela joang ha ba fumana lebitla le sena letho?

◆ Ke eng seo basali ba bang ba kopanang le sona ha ba le tseleng ho ea tlaleha tsoho ea Jesu ho barutuoa?

◆ Ke eng se etsahalang ho balebeli, ’me karabelo ea baprista tlalehong ea bona ke efe?

◆ Ho etsahala eng ha Maria Magdalena a setse a le mong lebitleng, ’me karabelo ea barutuoa litlalehong tsa basali ke efe?