Jesu Bophelo le Tšebeletso Tsa Hae

O Bonahala ka Makhetlo a ho Qetela, le Pentekonta ea 33 C.E.

KA NAKO e ’ngoe Jesu o etsa litokisetso tsa hore baapostola ba hae kaofela ba 11 ba kopane le eena thabeng Galilea. Barutuoa ba bang ho bonahala ba bolelletsoe ka seboka, ’me ho bokana kakaretso ea batho ba fetang 500. Ena e ipaka ho ba kopano e thabileng hakaakang ha Jesu a iponahatsa ’me a qala ho ba ruta!

Har’a lintho tse ling, Jesu o hlalosetsa bongata bo boholo ba batho hore Molimo o mo neile borena bohle leholimong le lefatšeng. Oa khothatsa: “E-eang ke hona, le rute lichaba tsohle; le ba kolobetse ka lebitso la Ntate, le la Mora, le la Moea o Halalelang; ’me le ba rute ho boloka tsohle tseo ke le laetseng tsona.”

Nahana ka hona! Banna, basali, le bana kaofela ba amohela thōmo ena e tšoanang ea ho kopanela mosebetsing oa ho etsa barutuoa. Bahanyetsi ba tla leka ho emisa ho bolela le ho ruta ha bona, empa Jesu oa ba tšelisa: “Bonang, ’na, ke na le lōna ka mehla eohle, ho isa bofelong ba lefatše.” Jesu o sala le balateli ba hae ka moea o halalelang, ho ba thusa ho phethahatsa tšebeletso ea bona.

Jesu o iponahatsa a phela ho barutuoa ba hae ka nako ea matsatsi a 40 ka mor’a tsoho ea hae. Nakong ea ho bonahala hona, o ba ruta ka ’Muso oa Molimo, ’me o hatella boikarabelo ba bona joaloka barutuoa ba hae. Ketsahalong e ’ngoe o bile a iponahatsa ho Jakobo ngoan’abo ka ’m’a bona ’me o kholisa enoa eo e neng e se molumeli hore Ke Kreste ka sebele.

Ha baapostola ba sa ntsane ba le Galilea, kamoo ho bonahalang ka teng Jesu o ba laela ho khutlela Jerusalema. Ha a kopana le bona teng, o re ho bona: ‘Le se ke la tloha Jerusalema, le mpe le lebelle pallo ea Ntate, eo le e utloileng ho ’na, hobane Johanne o fela a kile a kolobetsa ka metsi; empa lōna le tla kolobetsoa ka moea o halalelang, ha ho fetile matsatsi a se makae.’

Hamorao Jesu o kopana hape le baapostola ’me o ba etella pele ho tsoa motseng ho fihlela Bethania, eo e leng mothipoloheng o ka bochabela ho Thaba ea Mehloare. Ka ho makatsang, ho sa tsotellehe tsohle tseo a li boletseng ka ho tsamaea ha hae haufinyane ho ea leholimong, ba sa ntsane ba lumela hore ’Muso oa hae o tla hlongoa lefatšeng. Kahoo baa botsa: “Morena, na u re, e se e le joale ha u tla tsosa ’muso oa Iseraele na?”

Ho e-na le hore a leke hape ho lokisa likhopolo tsa bona tse fosahetseng, Jesu oa arabela ka bonolo: “Ha hoa le lokela ho tseba mehla, leha e le linako tseo Ntate a itaoletseng tsona a ’notši.” Joale, a hatisa hape mosebetsi oo ba tšoanetseng ho o etsa, o re: “Le tla fuoa matla mohla Moea o Halalelang o tlang ho lōna, ’me le tla ba lipaki tsa ka Jerusalema, le naheng eohle ea Judea, le Samaria, le ho isa pheletsong ea lefatše.”

Ha ba sa ntsane ba shebile, Jesu o qala ho nyolohela ’nģa leholimong, ’me joale leru le mo pata ponong ea bona. Ka mor’a ho hlobola ’mele oa hae oa nama, o nyolohela leholimong joaloka motho oa moea. Ha ba 11 ba ntse ba shebile leholimong, banna ba babeli ba apereng liaparo tse tšoeu ba bonahala pel’a bona. Mangeloi ana a apereng ’mele ea nama aa botsa: “Banna ba Galilea, le ntse le emetse’ng le lelaletse leholimong? Jesu eo ea nketsoeng leholimong a le har’a lōna, o tla be a tle ka mokhoa oo le ’moneng a e-ea leholimong ka oona.”

Hase batho bohle ba bonang mokhoa oo Jesu a qetang ho tloha lefatšeng ka ’ona ke balateli ba hae ba tšepahalang feela ba bonang. Kahoo o tla khutla ka mokhoa o tšoanang—a sa bonoe ke batho bohle ’me ke balateli ba hae feela ba tšepahalang ba lemohang hore o khutlile le hore o qalile ho ba teng ha hae matleng a ’Muso.

Baapostola joale ba theoha Thabeng ea Mehloare, ba tšela Phula ea Kedrone, ’me ba kena Jerusalema hape. Ba lula moo e le ha ba utloa taelo ea Jesu. Matsatsi a leshome ha morao, Moketeng oa Bajode oa Pentekonta 33 C.E., ha barutuoa ba ka bang 120 ba phuthe-  hetse kamo-  reng e ka ho- limo Jerusalema, lerata le tšoanang hantle le la moea o matla o fokang hang-hang le tlala ntlo kaofela. Maleme a kang mollo aa bonahala, ’me le le leng le lula holim’a e mong le e mong oa ba leng teng, ’me barutuoa kaofela ba qala ho bua ka lipuo tse fapaneng. Hona ke ho tšolloa ha moea o halalelang hoo Jesu a ileng a ho tšepisa! Mattheu 28:16-20; Luka 24:49-52; 1 Ba-Korinthe 15:5-7; Liketso 1:3-15; 2:1-4.

◆ Jesu o fana ka litaelo tsa ho arohana ho bo-mang thabeng Galilea, ’me litaelo tsena ke eng?

◆ Jesu o fana ka tšeliso efe ho barutuoa ba hae, ’me o tla lula a ntse a e-na le bona joang?

◆ Jesu o bonahala halelele hakae ho barutuoa ba hae ka mor’a tsoho ea hae, ’me o ba ruta eng?

◆ Jesu o iponahatsa mothong ofe, eo ka ho hlakileng e neng e se morutuoa pele Jesu a e-shoa?

◆ Jesu o tšoara liboka life tsa ho qetela tse peli le baapostola ba hae, ’me ho etsahala eng makhetlong ana?

◆ Ke joang Jesu a tla khutlang ka mokhoa oo a tsamaileng ka ’ona?

◆ Ho etsahala eng ka Pentekonta 33 C.E.?