Ba Etsa Sohle Seo ba ka Khonang ho se Etsa

Le hoja ba sitoa ho buseletsa Jehova bakeng sa melemo eohle eo a ba etsetsang eona, ba bangata ba etsa sohle seo ba ka khonang ho se etsa mabapi le ho tšehetsa mosebetsi oa ho bolela lefatšeng lohle oa Lipaki tsa hae. (Mattheu 24:14; bapisa le Mareka 14:3-9.) Se thahasellisang tabeng ena ke lengolo le tsoang lelapeng le leng la Minnesota, U.S.A.:

“Baena ba Ratehang,

“Re romela monehelo oa $——. Re kōpa hore o sebelisetsoe ho tšehetsa mosebetsi oa lefatše lohle kapa o kenngoe Letlōleng la Kaho ea Liholo tsa ’Muso, kapa o sebelisetsoe tlhokong leha e le efe eo mokhatlo o hlophisitsoeng o nang le eona. . . .

“Re kholisehile hore chelete ena e tla sebelisoa tumellanong le thato ea [Jehova]. Re rata ho nka monyetla ona bakeng sa ho le khothalletsa hore le tsoele pele ho etsa mosebetsi o motle, le ho le leboha ka ho khetheha bakeng sa theipi ea ‘video’ e bontšang mosebetsi oa lefatše lohle oa Mokhatlo oa [Watch Tower]. Ke theipi ena e ileng ea etsa hore re hlokomele hore na mosebetsi o moholo hakae, ’me e ile ea re kenya maikutlo a hore menehelo ea rōna ea boithatelo ea hlokahala. Nakong e fetileng, re ile ra tlohella hore phutheho, potoloho, le setereke li ikarabelle bakeng sa ho romela menehelo ho lōna, empa joale re leboha Jehova ha a mamelletse ho hloka ponelo-pele ha rōna ’me ka lerato a re bontšitse hore ho hlokahala hore ka bomong re tšehetse mosebetsi ona o bolokang bophelo ka chelete, ho phaella litseleng tse ling tsa ho fana ka menehelo. Joaloka lelapa, re etsa qeto ea ho romela, bonyane $—— ka khoeli . . . ka ho toba New York.

“Hape, re le leboha ka tšebeletso e ntle eo le ’nileng la re etsetsa eona le ka botšepehi boo le bo bontšitseng ho Jehova.”