Lipotso tse Tsoang ho Babali

Re thabetse ho ithuta boprofeta ba Daniele joalokaha bo tšohliloe ho “Molula-Qhooa.” Leha ho le joalo, ke hobane’ng ha matsatsi a linako tse tharo le halofo tsa Tšenolo 11:3 a fapane le a bukeng ea “Tlhōrō ea Tšenolo”?

E, Molula-Qhooa oa November 1, 1993, o hlile o fane ka tokiso e nyenyane mabapi le nako e behiloeng ea ho phethahala ha Tšenolo 11:3. Hobane’ng?

A re qaleng ka ho bala Tšenolo 11:2, eo qetellong ea eona e buang ka “likhoeli tse mashome a mane a metso e ’meli.” Re tsoela pele temaneng ea 3: “Ke tla nea lipaki tsa ka tse peli taelo, ’me li tla porofeta ka matsatsi a sekete se nang le makholo a mabeli a mashome a tšeletseng, li ntse li apere lesela le mahoashe.” Seo se sebetsa neng?

Ha e le hantle, Lipaki tsa Jehova li hlokometse khale hore boprofeta bona bo phethahetse ho Bakreste ba tlotsitsoeng ka moea ka mor’a ho fela ha “mehla ea lichaba” (Linako tsa Balichaba) ka 1914. (Luka 21:24; 2 Ba-Korinthe 1:21, 22) Ha e bua ka sena, Tšenolo—Tlhōrō ea Eona e Hlollang ka Botle e Haufi!a (1988) e re leqepheng la 164: “Ho bile le nako e tšoailoeng ea lilemo tse tharo le halofo ha liphihlelo tse thata tsa batho ba Molimo li ne li tšoana le liketsahalo tse profetiloeng mona—ho qala ha ho qhoma Ntoa ea I ea Lefatše ho ea qetellong ea 1914 le ho tsoela pele ho ea mathoasong a 1918.”

Hlokomela hore ho behoa ha nako ho entsoeng e bile “ha ho qhoma Ntoa ea I ea Lefatše ho ea qetellong ea 1914 [ho fihlela] mathoasong a 1918.” Sena se lumellana le ho behoa ha nako ho atisang ho etsoa, ho kang ho ho “Then Is Finished the Mystery of God,” maqephe 261-4, (1969).*

Leha ho le joalo, Molula-Qhooa o ile oa lebisa tlhokomelo boprofeteng ba Daniele, buka e buang habeli ka nako e tšoanang le eo ho builoeng ka eona hamorao ho Tšenolo—lilemo tse 3 1/2, kapa likhoeli tse 42. Ho toba taba, Daniele 7:25 e bolela hore ba halalelang ba Molimo ba ne ba tla hlorisoa “ka nako, le ka linako tse nang le lehare la nako,” kapa linako tse 3 1/2. Hamorao Daniele 12:7 (NW) e bolela esale pele “nako e khethiloeng, linako tse khethiloeng le halofo,” kapa linako tse 3 1/2, tse neng li tla fihla tlhōrōng ea tsona ka ‘ho phethoa ha ho thumakanngoa likoto ha matla a sechaba se halalelang.’

Kahoo re na le boprofeta bo sebetsanang le nako e tšoanang ho Daniele 7:25, Daniele 12:7, le Tšenolo 11:2, 3, esita le ho Tšenolo 13:5. Lingoliloeng tsa rōna li bontšitse hore tsohle tsena li phethahetse nakong ea 1914-18. Empa ha ho sebetsanoa le boprofeta ka bong ho bona, matsatsi a qalang le a qetellang a ile a fapana hanyenyane.

Leha ho le joalo, Molula-Qhooa oa November 1, 1993, o ile oa botsa: “Boprofeta boo bohle bo tšoanang bo ile ba phethahatsoa joang?” E, boprofeta ba linako tse 3 1/2 tse boletsoeng ho Daniele 7:25, Daniele 12:7, le Tšenolo 11:3 bo ile ba hlokomeloa e le ‘boprofeta bo tšoanang.’ Ka hona, bo ne bo tla lumellana mabapi le qalo ea bona le qetello ea bona.

Mabapi le qetello ea bona, makasine ona o ile oa bontša kamoo ho hlorisoa ha ba tlotsitsoeng ba Molimo (Daniele 7:25) ho ileng ha fihla tlhōrōng ea hona ka June 1918 ha J. F. Rutherford le batsamaisi ba bang ba Watch Tower Bible and Tract Society ba ne ba “ahloleloa ho hlola nako e telele teronkong ka liqoso tsa bohata.” Ketsahalo eo ruri e ne e le ‘ho phethoa ha ho thumakanngoa likoto ha matla a sechaba se halalelang,’ joalokaha ho bontšitsoe ho Daniele 12:7.

Ha re bala re ea morao ho tloha ka June 1918 re fihla ho December 1914 bakeng sa qalo ea linako tse 3 1/2. Khoeling eo ea ho qetela ea 1914, ba tlotsitsoeng ba Molimo ba lefatšeng ba ile ba ithuta temana ea sehlooho ea selemo se latelang: “‘Na le ka tseba ho noela senoelong seo ke tla noela ho sona?’—Mattheu 20:20-23.” Selelekela se neng se e kenyeletsa se ile sa hlokomelisa: “Ke mang ea tsebang hore ho ka ’na ha e-ba le teko e khethehileng, senoelo sa ho utloa bohloko kapa ho hobosoa, bakeng sa balateli ba Konyana ba tšepahalang ka 1915!” Joalokaha Daniele 7:25 e boletse esale pele ka nako ena ea linako tse 3 1/2, ‘mahloriso a ile a tsoha ’me a tsoela pele khahlanong le bahalaleli ba Ea Phahameng ka ho fetisisa ka bobona.’ Lichaba li ne li tšoarehile Ntoeng ea I ea Lefatše, e li nolofaletsang ho phetha ho hobosa ha tsona ho se nang toka. Qeto ke hore: Boprofeta bona bo boraro boo kaofela bo tšoanang—Daniele 7:25; 12:7, le Tšenolo 11:3—bo phethahetse lilemong tse 3 1/2, kapa likhoeling tse 42, ho tloha ka December 1914 ho ea ho June 1918.

Sena se hlalosa tokiso e nyenyane tabeng ea ho beha nako ea ho phethahala ha Tšenolo 11:3. Tokiso ena ke ntho e ’ngoe eo re ka e hopolang ha re ntse re ithuta le ho sebelisa buka ea Tlhōrō ea Tšenolo nakong e tlang.

[Mongolo o botlaaseng ba leqephe]