Lipaki Tsa Jehova Lefatšeng Lohle—New Zealand
NA LIHLEKE-HLEKE li ka rorisa Jehova? E, ho latela Esaia 42:10: “Binelang Jehova sefela se secha, le tumise lithoko tsa hae lipheletsong tsa lefatše, . . . lōna lihleke-hleke le ba ahileng ho tsona.” Lihleke-hleke tsa New Zealand ka sebele li rorisa Jehova. Lefatše le tummeng ka matša, likou tsa leoatle tse likhohlo, lithaba tse phahameng, maqhoa a maholo a ipōpileng, mabōpo a leoatle, meru e nang le pula e ngata le e koahetsoeng ke limela, le libaka tsa makhulo a nonneng, New Zealand e bua ka bokheleke ka borena le boholo ba ’Mōpi oa leholimo le lefatše.
Hang feela qalong ea lekholo la bo20 la lilemo, baahi ba ntseng ba eketseha ba New Zealand ba ’nile ba eketsa mantsoe a bona a thoriso ho Jehova ka ho retelehela ho eena borapeling bo hloekileng le ka ho arolelana le ba bang litaba tse molemo tsa ’Muso oa Molimo. Morao tjena, motho e mong oa Paki ea ileng a utloa ka phihlelo e monate ea ho pakela beng ka motho o ile a etsa qeto ea ho etsa boiteko ba ho pakela ba lelapa labo. O ile a fana ka mpho ea likopi tsa buka ea U ka Phela ka ho sa Feleng Paradeiseng Lefatšeng ho litho tse ’maloa tsa lelapa. Ho fihlela joale liphello ke life? O tlaleha hore khaitseli ea hae le mora oabo e mong hona joale ba ithuta Bibele, ngoana e mong oa ngoan’abo o se a kolobelitsoe e le e mong oa Lipaki tsa Jehova, ’me ’nete ea Lentsoe la Molimo e se e amoheleha haholoanyane ho ba bang ba bona. Leha ho le joalo o ntse a e-na le tšimo e khōlō hore a e sebetse; ntle ho batsoali ba hae, o na le barab’abo ba tšeletseng le likhaitseli tse robong!
Thoriso e eang ho Jehova e boetse e hlahisoa ke ha Lipaki li etsa boiteko bo kopanetsoeng ba ho haha Liholo tsa ’Muso. Ka mohlala, mongoli oa pampiri ea litaba Roy Perkins o ile a ngola ho Opotiki News ea la 17 May, 1994: “Le hoja ke se molumeli, ke ile ka khahloa haholo ke mesebetsi le ke boikitlaetso ba basebeletsi bohle ba inehetseng ba fanang ka nako ea bona e ngata le boikitlaetso morerong ona bakeng sa lerato la bona ho Molimo oa bona.
“Ka lihora tsena tsohle tsa mosebetsi o entsoeng ka mafelo-beke ha kea ka ka bona kapa ho utloa liqhoebeshano . . . Basali ba ne ba hloeletse holimo likalaneng tsa lihahi, ba sebetsa ’moho le banna, ho chorisa mela pakeng tsa litene lerakong, ba phahamisa, ba tsamaisa thepa ea mohaho, tsohle li etsoa ka moea o phutholohileng le o thabileng.
“Ha ho motsotso le o mong o ileng oa senyeha ka lebaka la mosebetsi ea ntseng a re o il’o tsuba. Ho batho bao kaofela ba neng ba sebetsa maemong a sa tšoaneng, moea o ne o hloekile ’me o sa silafala haese feela monko oa pente le lerōle la litene.”
Sehlopha sa baholo ba Phutheho ea Opotiki se ile sa ngola: “Morero oohle o ile oa makatsa batho ba motse. Ho bonahala eka batho bohle ba bua ka oona. Ho se ho qaliloe lithuto tse ngata tsa Bibele. E ’ngoe eo re e fumaneng e thabisa haholo ka ho ikhethang ke ea banyalani ba babeli ba ratang bolumeli haholo bao ka lilemo tse ngata ba ’nileng ba re kōpa hore re se ba etele. Ba ile ba tla setšeng sa mohaho letsatsi le leng le le leng ’me hang ka mor’a moo ba tla sebokeng. Ka mor’a moo, monna o ile a re, ‘Kea bona hore le batho ba Molimo. Ka hare ho ’na, bophelong ba ka bohle ke ’nile ka laba-labela ho kopana le batho ba mofuta ona.’”
Selemong se fetileng, mongoli oa Otago Daily Times o ile a bolela se latelang ka Holo ea ’Muso e hahiloeng ka potlako Dunedin: “E bile mosebetsi o tsotehang, mohlala o tsotehang oa tšusumetso le boitjaro.” Pampiri eona eo ea litaba e ile ea hlalosa: “Batho ba motse ba ile ba shebella ka kananelo ha mohaho o moholo o ema ka pel’a mahlo a bona, ’me ba bangata e tlameha ebe ba ntse ba nahana hore na ke mesebetsi efe e meng le merero e molemo e neng e ka phethoa haeba ho ne ho ka ba le lihlopha tse khōlō joalo tsa basebetsi ba baithaopi le moea o joalo oa tšebelisano. Holo ea ’Muso ke letšoao la thabo la boikitlaetso bo botle bo finyellang litholoana.”
Har’a ba makholo-kholo ba neng ba etetse setšeng sa mohaho, monna e mong o ile a hlokomela hore Lipaki li haha “likereke” ha bolumeli ba hae bo ne bo li rekisa ka lebaka la ho fokotseha ha litho tsa bona. O ile a hlalosa maikutlo a hae tjena: “Haeba le ne le ka ema hoo e ka bang ka likhoeli tse ling tse leshome le metso e ’meli, le ne le tla reka e ’ngoe ea [likereke] tsa rōna. Re tlameha ho rekisa e ’ngoe ka lebaka la ho sitoa ho e lefella. Empa, ho hlakile hore lōna ha le na baruti ba lefshoang. . . . ’Me ka hona mehaho ea lōna e hlokomeleha habobebe, hase mehaho e melelele e litora tse telele tseo ho leng thata ho li boloka li le maemong a matle.”
Ho hlakile hore ka sebele lihleke-hleke li ka rorisa Molimo. E se eka lithoriso tse eang ho Jehova li ka tsoela pele li utloahala naheng ena e ntle ea Pacific—le lefatšeng lohle!
[Lebokose le leqepheng la 9]
TLALEHO EA NAHA:
Selemo sa Tšebeletso sa 1994
TLHŌRŌ EA BA FANANG KA BOPAKI: 12 867
KARO-KAROLELANO: Paki e le 1 ho 271
BA BILENG TENG SEHOPOTSONG: 24 436
KAROLELANO EA BAHOELETSI BA BO-PULA-MALIBOHO: 1 386
KAROLELANO EA LITHUTO TSA BIBELE: 7 519
PALO EA BA KOLOBELITSOENG: 568
PALO EA LIPHUTHEHO: 158
OFISI EA LEKALA: MANUREWA
[Setšoantšo se leqepheng la 9]
Bo-pula-maliboho ba ea tšimong hoo e ka bang ka 1930
[Setšoantšo se leqepheng la 9]
Mehaho ea lekala Manurewa
[Setšoantšo se leqepheng la 9]
Ho bolela molaetsa oa ’Muso Devonport, Auckland