Leseli la Bona ha Lea ka la Tima
MEHLENG ea Bibele ho ne ho e-na le lipaki tsa Jehova tse tšepahalang tse ileng tsa e-ba le litšitiso le mathata. Li ile tsa tobana le khanyetso le ho hlōleha ho totobetseng. Ho ntse ho le joalo, ha lia ka tsa tela ka lebaka la ho nyahama. Ha e le hantle, leseli la tsona ha lea ka la tima.
Ka mohlala, moprofeta Jeremia o ile a fuoa thōmo ea ho ba moprofeta oa Molimo sechabeng se neng se koenehile sa Juda. O ile a phatlalatsa temoso mabapi le timetso e neng e tlela Jerusalema. (Jeremia 1:11-19) Ka lebaka leo, Jeremia o ile a tobana le khanyetso e khōlō e tsoang ho banna ba habo, ba neng ba mo talima joaloka motho ea hooang tlokotsi.
Ka lekhetlo le leng, moprista Pashkure, mohlahlobi e moholo oa ntlo ea Molimo, o ile a otla Jeremia ka lebaka la seo a neng a se profetile a ba a mo kenya metšoasong. Jeremia ha a le boemong bona bo bonahalang e le tšitiso, o ile a re: “Ke hlile ke entsoe litšeho ka tsatsi lohle, ba ntšoma kaofela. Hobane ka mehla ha ke bua, ke ee ke hooe, ke hooelletse batho bothata le tšenyo; ka baka leo, lentsoe la Jehova le mphetohetse sekhobo le sesomo ka tsatsi le leng le le leng.” Moprofeta o ile a nyahama hoo a ileng a re: “Ha ke sa tla hlola ke ’molela [Jehova], leha e le ho bua ka lebitso la hae.”—Jeremia 20:1, 2, 7-9.
Leha ho le joalo, Jeremia ha aa ka a inehela ho nyahameng. Ha a bua ka “lentsoe la Jehova,” o ile a bolela: ‘Eba ho na le ho kang mollo o chesang pelong ea ka, o kentsoeng masapong a ka. Ke khathala ke ho le boloka, kea sitoa.’ (Jeremia 20:8, 9) A susumetsehile ka matla ho bua ka liphatlalatso tsa Molimo, Jeremia o ne a tšehelitsoe ke moea o halalelang ’me o ile a phetha thōmo ea hae.
Moapostola Pauluse le eena o ile a ba le mabaka a mangata a ho nyahama, hoja feela a inehela ho oona. O ile a mamella likoluoa tsa tlhaho, ho senyeheloa ke sekepe, tlhoriso le lichapo. Ho phaella moo, ‘o ne a likiloe ka matsatsi ’ohle ke ho tšoenyeha ka liphutheho tsohle.’ (2 Ba-Korinthe 11:23-28, NW) E, Pauluse o ne a tšoanela ho sebetsana le mathata letsatsi le leng le le leng, a khathatseha ka liphutheho tse ncha tseo a neng a li thusitse hore li thehoe. Ho feta moo, o ne a sa phethahala ’me a lokela ho loana le “phatsa e hlabang ka nameng,” eo mohlomong e neng e le ho se bone hantle. (2 Ba-Korinthe 12:7; Ba-Roma 7:15; Ba-Galata 4:15) Ba bang ba ne ba bile ba seba Pauluse, ’me tsena tsohle o ne a li utloa.—2 Ba-Korinthe 10:10.
Leha ho le joalo, Pauluse ha aa ka a lumella ho nyahama hore ho mo hlōle. Che, o ne a se na matla a fetang a batho. (2 Ba-Korinthe 11:29, 30) Ke eng se ileng sa boloka ‘mollo oa hae oa ka hare’ o ntse o tuka? Taba ea pele ke hore, o ne a e-na le metsoalle e mo tšehetsang, e meng e bile ea mo felehetsa ha a e-ea Roma moo a ileng a tšoaroa ’me a laeloa hore a felle moo a bolokiloeng teng. (Liketso 28:14-16) Ea bobeli, moapostola o ile a talima boemo ba hae ka tsela e leka-lekaneng. Bahlorisi le bahanyetsi ba hae ba ne ba le molato, e seng Pauluse. Ho ea qetellong ea bophelo ba hae ba lefatšeng, o ile a lekanyetsa mosebetsi oa hae ka tsela e nepahetseng ’me a re: ‘Ho setseng e se e le ho amohela moqhaka oa ho loka oo ke o behetsoeng, oo Morena, moahloli ea lokileng, a tlang ho ’nea oona.’—2 Timothea 4:8.
Ka holimo ho tsohle, kamehla Pauluse o ne a atamela Jehova Molimo ka thapelo, ’me ‘Morena a mo emela, ’me a mo kenya matla.’ (2 Timothea 4:17) Pauluse o ile a re: “Nka etsa tsohle ka Kreste ea mphang matla.” (Ba-Filippi 4:13) Ho buisana le Molimo le Bakreste-’moho le eena, hammoho le ho lekanyetsa mosebetsi oa hae ka tsela e nepahetseng, li ile tsa thusa Pauluse hore a ’ne a tsoele pele tšebeletsong ea Jehova.
Molimo o ile a bululela Pauluse ho ngola: “Re se ke ra khathala ke ho etsa hantle, hobane re tla kotula nakong ea teng, ha re sa tepelle.” (Ba-Galata 6:7-9) Re tla kotula eng? Bophelo bo sa feleng. Kahoo, e-bang joaloka Jeremia, Pauluse le ba bang ba bangata ba lipaki tse tšepahalang tsa Jehova tse boletsoeng ka Mangolong. E, e-bang joaloka bona, ’me le se ke la inehella ho nyahama. Le se ke la lumella leseli la lōna ho tima.—Bapisa le Mattheu 5:14-16.
[Litšoantšo tse leqepheng la 25]
Pauluse le Jeremia ha baa ka ba lumella leseli la bona ho tima