Ho Tlosa Tšitiso ka Molao

KA April 1995, ho ile ha haptjoa tlhōlo ea bohlokoa ea lekhotla. Taba ena eohle e qalile ka la 28 January, 1992, ha Luz Nereida Acevedo Quiles, ea lilemo li 24, a ne a amoheloa Sepetleleng sa El Buen Pastor, Puerto Rico, bakeng sa ho buuoa ha boikhethelo. Hoba a amoheloe, o ile a bolela ka molomo le ka lengolo hore joaloka e mong oa Lipaki tsa Jehova, a ke ke a amohela tšelo ea mali. (Liketso 15:28, 29) Basebetsi ba neng ba ameha ba sepetlele, ho kopanyelletsa le ngaka e neng e mo phekola, ba ne ba tseba hantle litakatso tsa hae.

Matsatsi a mabeli ka mor’a ho buuoa, Luz o ile a lahleheloa ke mali a mangata haholo ’me a qala ho ba le khaello ea mali e hlokang tlhokomelo e potlakileng ka lebaka la ho tsoa mali haholo. Ngaka e ’ngoe e neng e le teng mosebetsing, Dr. José Rodríguez Rodríguez, o ne a lumela hore tsela feela e ka mo thusang e ne e le ea ho sebelisa tšelo ea mali. Ka lebaka leo, ntle le tsebo kapa tumello ea Luz, o ile a batla taelo ea lekhotla bakeng sa ho mo tšela mali.

Le hoja Luz a ne a hlaphohetsoe ka ho feletseng ’me a khona ho ipuella, Dr. Rodríguez Rodríguez o ile a tsitlella hore ha ho na nako ea ho batla tumello ea leha e le mang ka lebaka la ho potlaka ha boemo. ’Muelli oa molao oa setereke seo, Eduardo Pérez Soto, o ile a saena liforomo, ’me moahloli oa setereke, Mohlomphehi Ángel Luis Rodríguez Ramos, a fana ka taelo ea lekhotla bakeng sa tšelo ea mali.

Kahoo, ka la 31 January, 1992, Luz o ile a isoa ka kamoreng ea ho buuoa, moo a ileng a tšeloa mali. Nakong ea ha a ntse a tšeloa mali, o ile a utloa ba bang ba basebetsi ba sepetlele ba tšeha. Ba bang ba ne ba mo rorothela, ba bolela hore seo a se etsoang ke molemong oa hae. O ile a loana ho fihlela moo matla a hae a fellang—ntle ho thuso ea letho. Qetellong ea letsatsi, Luz o ne a fumane lipaente tse ’nè tsa mali.

Taba ea Luz e ne e se ea pele kapa ea ho qetela ho tse amanang le litšelo tsa mali le Lipaki tsa Jehova Puerto Rico. Pele ho phihlelo ea hae, bonyane litaelo tse 15 tsa lekhotla li ne li ile tsa ntšoa bakeng sa litšelo tsa mali khahlanong le thato ea batho ba baholo ba Lipaki tsa Jehova, ’me haesale ho tloha ka nako eo ho ’nile ha ntšoa tse eketsehileng. Ka ho utloisang bohloko, boemong bo bong taelo ea lekhotla e ile ea phethahatsoa, ’me tšelo ea mali e ile ea etsoa ka ho a qobella nakong eo mokuli a akhehileng.

Leha ho le joalo, ntoa ea Luz ha ea ka ea fella ka kamoreng ea ho buuoa. Ka October 1993, Commonwealth ea Puerto Rico e ile ea qosoa. Qoso e ile ea sebetsoa ke Lekhotla le Phahameng, ’me ka la 18 April, 1995, ho ile ha fihleloa qeto e emelanang le eena. Lekhotla le ile la bolela hore taelo ea ho mo tšela mali e bile “e khahlanong le molao-motheo ’me e amohile moqosi tokelo ea hae ea tokoloho ea bolumeli, le ea boinotši ba hae le boikhethelo ka ’mele oa hae ho sa lateloa mehato e loketseng ea molao.”

Qeto ena ea molao e ile ea ba e hlokomelehang, kaha e ne e le ka lekhetlo la pele lekhotla le Puerto Rico le fana ka qeto e ahlolelang Lipaki tsa Jehova hantle tabeng e amanang le tšelo ea mali. Kahlolo eo e ile ea tsosa karabelo e sa tloaelehang. Seboka sa phatlalatso ea litaba se ile sa tšoaroa, ’me ho ne ho e-na le baqolotsi ba litaba ba koranta e hlahelletseng, ba seea-le-moea le ba thelevishene.

Bosiung bona boo lenaneo la seea-le-moea le ile la hasa puisano ka lipotso le e mong oa babuelli ba molao ba Luz. Bamameli ba ile ba khothalletsoa ho founa le ho botsa lipotso. Lingaka tse ngata le babuelli ba molao ba ile ba letsa ’me ba hlahisa kamoo ba ikutloileng kateng ho lumellaneng le taba eo. E mong oa ba letsang o ile a re: “Saense ha ea khona ho tiisa hore tšelo ea mali e tla boloka bophelo, ’me ke khopolo e fosahetseng ho nahana joalo.” O ile a boela a bolela: “Haufinyane, tšelo ea mali e tla be e tlalehoa historing e le e ’ngoe ea ho hlōleha ho hoholohali le phoso e khōlōhali ea bongaka ba kajeno.”

Moprofesa oa molao ea hlompshoang haholo hamorao o ile a letsetsa ofisi ea lekala ea Mokhatlo oa Watch Tower ’me a hlalosa khotsofalo ea hae e tebileng ka seo a ileng a se bitsa “tlhōlo e utloahalang.” O ile a phaella ka hore qeto eo ea molao ha ea loanela litokelo tsa molao-motheo tsa Lipaki tsa Jehova feela empa le tsa baahi bohle ba Puerto Rico.