Ho Tlohela Mosebetsi—Na ke Monyako o Bulehelang Tšebetso ea Puso ea Molimo?
HO TLOHELA MOSEBETSI—ho ba bangata ho koala monyako oa nako e telele ea khatello le likhopiso. Ka mor’a ho koalloa ke kemiso e tenang kapa e tepeletsang maikutlo, ba bangata ba lebella ka thabo hore ho tlohela mosebetsi ho ba bulele monyako oa lilemo tsa boiketlo le tokoloho ea botho. Leha ho le joalo, hangata monyako oo o lebisa bolutung le ho tepelleng. Boikhathollo le mesebetsi ea ho itlosa bolutu hase habonolo feela li fanang ka boikutlo ba ho ba oa bohlokoa boo mosebetsi o fanang ka bona.
Ho Lipaki tsa Jehova, ho tlohela mosebetsi ho ka bula “monyako o moholo o isang tšebetsong.” (1 Bakorinthe 16:9) Le hoja ho hōla ho e-na le mathata le mefokolo ea hona, ba bang ba hōlileng ba ’nile ba fumana hore ka thuso ea Jehova ba ka eketsa tšebeletso ea bona ho eena. Nahana ka liphihlelo tsa Bakreste ba bang ba hōlileng ba Netherlands. Selemong sa tšebeletso sa 1995, ba 269 ho bo-pula-maliboho (baboleli ba ’Muso ba nako e tletseng) ba ka holimo ho 1 223 ba ne ba le lilemo li 50 kapa ho feta. Ho bana, ba 81 ba ne ba le lilemo li 65 kapa ho feta.
Ba bang ba khonne ho bula maliboho ka hore feela ba ntšetse pele tsela e maphatha-phathe eo ba e sebelisitseng ha ba ntse ba le mosebetsing. (Bapisa le Bafilippi 3:16.) Mokreste e mong ea ileng a tlohela mosebetsi ea bitsoang Karel oa hopola: “Ha ke ne ke sebetsa mosebetsing oa ka oa boipheliso, ke ne ke tloaetse ho qala mosebetsi ka 7:30 hoseng. Ha ke qala ho amohela penshene ea ka, ke ile ka etsa qeto ea ho boloka kemiso e tšoanang. Ke qala letsatsi ka ho etsa bopaki ba seterateng ka limakasine ka pel’a seteishene sa terene hoseng ho hong le ho hong ka hora ea bosupa.”
Tokisetso e hlokolosi le eona ke senotlolo sa katleho. (Liproverbia 21:5) Ka mohlala, ba bang ba ’nile ba khona ho behella ka thōko chelete e lekaneng bakeng sa ho iphelisa tšebeletsong ea bona. Ba bang ba ile ba etsa qeto ea ho fokotsa litšenyehelo tsa botho ’me ba fumana mosebetsi oa nakoana. Nahana ka Theodore le Ann. Ba ile ba qala bophelo ba bona ba lenyalo e le bo-pula-maliboho ho fihlela ha litlamo tsa lelapa li ba hloka hore ba khaotse ho bula maliboho. Empa moea oa bona oa bopula-maliboho oa sala o phela! Ka mehla barali ba bona ba ile ba khothaletsoa ho bula maliboho, ha ba ntse ba hōla. Habohlokoa ho feta, Theodore le Ann ba ile ba beha mohlala o motle, khafetsa ba sebeletsa e le bo-pula-maliboho ba thusang. Ha barali ba ntse ba hōla, Theodore le Ann ba ile ba qala ho fokotsa mosebetsi oa boipheliso e le hore ba be le nako e eketsehileng bakeng sa tšebeletso ea tšimo.
Ka mor’a hore barali ba bona ba kenele tšebeletso ea nako e tletseng ’me ba tlohe lapeng, Ann o ile a qala ho bula maliboho. Ka letsatsi le leng o ile a khothaletsa Theodore ho tsoa mosebetsing. O ile a etsa tlhahiso: “Bobeli ba rōna re ka bula maliboho.” Theodore o ile a tsebisa mohiri oa hae sepheo sa hae. Ho makaleng ha hae, mookameli oa hae o ile a ithaopela ho thusa ka ho mo fa mosebetsi oa nakoana, a re: “Ke lumela hore u batla ho sebeletsa mookameli oa hao ea holimo [leholimong] ka nako e tletseng.” Hona joale Theodore le Ann ba thabela ho bula maliboho hammoho.
Ba bang ba ile ba qala ho bula maliboho ha ba arabela maemong a ileng a hlaha bophelong ba bona. Lefu le sehlōhō la morali’a bona le setloholo le ile la etsa hore banyalani ba bang ba seng ba hōlile ba nahanisise ka ho teba ka tsela eo ba sebelisang lilemo tsa bona tse setseng. (Moeklesia 7:2) Ho e-na le ho apareloa ke mesarelo, ba ile ba nkela tšebeletso ea nako e tletseng, eo hona joale ba seng ba e thabetse ka lilemo tse fetang tse robeli!
Bonneteng, ho lula tšebeletsong ea nako e tletseng ho hloka boikemisetso ba sebele. Ka mohlala, Ernst le mosali oa hae, Riek, ba ile ba qala ho bula maliboho hang ha bana ba bona ba tloha lapeng. Nakoana ka mor’a moo eo e kileng ea e-ba mosebetsi-’moho le Ernst a mo tšepisa mosebetsi o lefang chelete e ngata. Ernst o ile a araba: “Re na le mohiri ea molemo ka ho fetisisa, ’me ha rea ikemisetsa ho mo tlohela!” Kaha Ernst le mosali oa hae ba ile ba lula “mosebetsing” oa Jehova, litokelo tse ling tsa tšebeletso li ile tsa ba bulehela. Ba ile ba sebeletsa potolohong ka lilemo tse fetang 20 ’me ba ntse ba tsoela pele e le bo-pula-maliboho ho fihlela ka lena. Na ba ikoahlaela tsela ea bona ea boitelo? Ka nako e ’ngoe banyalani bana ba ile ba ngola: “Haeba e le thato ea Jehova, likhoeling tse tharo tse tlang re lebeletse ho ketekela lilemo tse 50 re nyalane, tseo hangata li bitsoang lilemo tsa khauta. Empa ka kholiseho re re lilemo tsa rōna tsa khauta li qalile ha re qala ho bula maliboho.”
Ba bangata ba fumana hore monyako o lebisang tšebetsong e eketsehileng o boetse o lebisa thabong e eketsehileng! Mor’abo rōna e mong ea ileng a qala ho bula maliboho libeke tse peli ka mor’a ho fihla lilemong tse 65 o re: “Ke tlameha ho bolela hore le ka mohla bophelong ba ka ha ke e-s’o ka ke latsoa litlhohonolofatso tse enneng joaloka tsa lilemong tse leshome tse fetileng tsa ho bula maliboho.” Banyalani ba bang ba nyalaneng ba butseng maliboho ka lilemo tse ka holimo ho tse supileng ba re: “Ke eng hape eo banyalani ba lilemong tsa rōna le ba boemong ba rōna ba ka e etsang? Hangata re bona batho ba tšoanang le rōna tšimong—ba lutse ba iketlile malapeng a bona, ba ntse ba nona, ba tsofala le ’mele e ntse e satalla. Tšebeletso e re boloka re phela hantle kelellong le ’meleng. Kamehla re ’moho. Re tšeha haholo ’me re thabela bophelo.”
Ntle ho pelaelo, hase bohle ba hōlileng ba nang le maemo a ba lumellang ho bula maliboho. Bakreste bana ba ka kholiseha hore Jehova o ananela sohle seo ba khonang ho se etsa tšebeletsong ea hae. (Bapisa le Mareka 12:41-44.) Ka mohlala, morali’abo rōna e mong ea holofetseng o lula lehaeng la kokelo. Leha ho le joalo, monyako oa tšebetso o ntse o mo bulehetse! Ngaka e ile ea ’motsa hore na o khona joang ho tsamaisa nako ea hae. Oa pheta: “Ke ile ka e bolella hore kamehla ke haelloa ke nako. E ne e sa khone ho utloisisa sena. Ke ile ka e bolella hore lebaka la sena ke hore matsatsi a ka a tletse ka tšebetso e khotsofatsang. Ha kea hlora, empa ke batla ba bang ba hlonameng ’me ke leka ho ba bolella ka seo Molimo a se boloketseng moloko oa batho.” O akaretsa taba ka ho re: “Ho motho ea lilemong tsa bo-80, motho a ke ke a lebella ho hongata. Nthapelleng e le hore ke ’ne ke lebise ba bangata ho Jehova.”
Na u lilemong tsa ho tlohela mosebetsi? Monyako o isang boiketlong e ka ’na eaba o hohelang haholo, empa hase monyako o isang tlhohonolofatsong ea moea. Nahanisisa maemo a hao ka thapelo. E ka ’na eaba u ka khona ho kena ka monyako o lebisang tšebetsong e khōloanyane tšebeletsong ea Jehova.
[Litšoantšo tse leqepheng la 25]
Ho tlohela mosebetsi ho ka lebisa tšebetsong e eketsehileng tšebeletsong