Litsebi li Hlahloba Mefuta e Meng ea Phekolo e Nkang Sebaka sa Mali

LITSEBI tse ka bang 200 ho potoloha United States li ile tsa bokana Cleveland, Ohio, ka Moqebelo oa la 7 October, 1995, bakeng sa ho tšohla taba e ntseng e hapa thahasello lebaleng la bongaka: meriana e se nang mali le ho buoa ka ntle ho mali.

Maemo a mangata a phephetsang a ile a tšohloa. Ka mohlala, ho thoe’ng haeba mokuli a na le bothata bo tebileng ba khaello ea mali? Lesea le hlahileng nako e telele pele ho nako ea lona le ka phekoloa joang ntle ho mali? Na ho buoa pelo ho ka etsoa ka katleho ntle ho tšelo ea mali? Ho thahasellisang ke hore ho buoa ntle ho mali—hangata ho sebelisoa mekhoa e thusang ’mele ho ikahela phepelo ea mali—ho se ho kile ha sebelisoa maemong ana kaofela ka liphello tse molemo.a

Ke hobane’ng ha ho hlokahala mekhoa e meng e ka nkang sebaka sa tšelo ea mali? Motsamaisi oa Center for Bloodless Medicine and Surgery e St. Vincent Charity Hospital, Cleveland, Sharon Vernon, o re: “Re ithutile hore hangata tšelo ea mali e tsamaisa maloetse, haholo-holo lefu la sebete.” O tsoela pele: “Esita le haeba mali a sa tsamaise tšoaetsano a ka ’na a khina tsela eo ’mele o itšireletsang ka eona maloetseng.” Le hoja tšoaetšano ea AIDS e ’nile ea fokotsoa ke ho hlahlojoa ha mali, ho ntse ho e-na le maloetse a mangata a sa senoloeng ke litlhahlobo tse joalo. ’Me le hoja ho hlokahala tokisetso e ngata, ho buoa ntle ho mali ho ipaka ho theola litšenyehelo bakeng sa lipetlele, kaha ho felisa litšenyehelo tsa molao tse ka ’nang tsa hlaha ha bakuli ba fuoa mali a silafetseng.

Ho Lipaki tsa Jehova, ho na le lebaka la bohlokoa le ho feta la ho qoba ho amohela mali: molao oa Molimo oa ho hanela. (Liketso 15:29) Leha ho le joalo, li ntse li batla ho fumana phekolo e molemo ka ho fetisisa ea meriana e ka khonehang. Kahoo, li kopantse matsoho le lingaka tse eteletseng pele phuputsong ea phekolo ea meriana ntle ho mali. Hoo ha ho ruise Lipaki tsa Jehova molemo li le ling feela empa le ba bang ba bangata ba amehileng ka likotsi tsa tšelo ea mali.

[Mongolo o botlaaseng ba leqephe]

[Tlhaloso ea Moo Setšoantšo se Nkiloeng Teng e leqepheng la 32]

WHO photo by P. Almasy