Na re Tla ke re Lokolohe Maemong a Kang aa?

HOHLE moo re eang teng matsatsing ana, re bona matšoao a hlakileng a khatello ea kelello, khohlano le ntoa. Empa morero oa koranta ena hase ho u ekelletsa litaba tse mpe tseo u seng u ntse u li tseba. Ho e-na le hoo, tokollo ena e khethehileng e tla u tsebisa bonyane linnete tse peli tse tšelisang. Ea pele, hore ha e le hantle boprofeta ba khale ba Bibele bo boletse esale pele ka litaba tse nyarosang tse mpe tsa mehleng ea rōna; ea bobeli, hore eona buka ena ea boprofeta e bolela esale pele ka letsatsi leo ka lona maemo a kang ana a bontšitsoeng mona a tla ba sieo. Ha ho se ho se lintoa. Ho se ho se ho hlasela ka libomo, ho thunya ha ba ipatileng, liqhomane tsa fatše kapa bokhukhuni. Ho se ho se likhutsana tse otlang pelo kapa baphaphathehi ba se nang mahae. Lefatše la khotso ea sebele, e thobang pelo. Na u ka rata ho bona nako e joalo? Re u khothalletsa hore u hlahlobe seo Bibele e se buang. U ka ’na ua fumana ka ho eona matšeliso a eketsehileng ho feta ao u neng u nahanne hore a ka fumaneha.