Li Ile Tsa Ema li Tiile Har’a Mahloriso a Bonazi
JEREMANE ea Bonazi, botšepehi bo sebete ba Lipaki tsa Jehova bo hlahella bo fapane ka ho feletseng le boemo bo neng bo nkiloe ke likereke tsa Bokreste-’mōtoana. Sena se hlokometsoe ke moprofesa oa histori John Weiss, bukeng ea hae ea Ideology of Death. Oa ngola:
“Ka 1934, kereke ea Evangeli e ile ea tsitlella hore ‘Malutere [a lokela] ho amohela’ Manazi ’me ea leboha ‘Morena Molimo’ ka ho neha Majeremane ‘morena oa marena ea itetseng le ea tšepahalang.’ . . . Mobishopo oa Moprostanta o ile a ngolla moruti oa hae, ‘[Hitler] o rometsoe ho rōna ke Molimo.’” Weiss o tsoela pele: “Kereke ea Methodiste ea Jeremane . . . e ile ea lumellana le Mobishopo Dibelius hore Hitler o ne a pholositse Jeremane phetohelong e neng e sokela ea Bolshevik, a tlisa khotso le botsitso . . . Kereke ea Mormon e ile ea tsebisa litho tsa eona tse tšepahalang hore ho hanyetsa Hitler e ne e le ho tlōla molao oa Mormon.” ’Me oa phaella: “Mak’hatholike a ile a bolelloa hore ho mamela ’muso o mocha e ne e le tšebeletso e halalelang, e leng tšebeletso eo ho sa kang ha ikhuloa ho eona esita le ka mor’a hore baruti ba tsebe ka masetla-pelo a neng a entsoe ka bochabela.”
Empa ho thoe’ng ka Lipaki tsa Jehova? Moprofesa Weiss o bontša hore “e le sehlopha, ke Lipaki tsa Jehova feela tse ileng tsa hanyetsa Bonazi.” Moprofesa Weiss o tsoela pele: “Tse likete tsa tsona li ile tsa tšoaroa, leha ho le joalo, Paki leha e le efe e neng e rometsoe kampong ea mahloriso e ka be e ile ea lokolloa habonolo feela ka hore e saene tokomane eo ho eona e latolang tumelo ea eona.”
Mabapi le botšepehi ba Lipaki tsa Jehova, Moprofesa Weiss oa hlalosa: “Mohlala oa tsona o bontša ho tiea ho ikhethileng le matla a sebete tseo Bokreste ba pele bo neng bo e-na le tsona pele bo fetoha mokhatlo o hlomamisitsoeng ’me takatso ea bona ea ho phela bophelo bo sa sekisetseng e pupetsoa ke ho sebelisana le tsamaiso ea sechaba le ho itsoakanya le eona. Joalokaha moruti oa Moprostanta a ile a ngola ka tsona, ‘Hase likereke tse hlahelletseng, empa ke batho bana ba senngoang lebitso le ho songoa ba ileng ba qala ho hanyetsa khalefo ea bodemona ea Bonazi le ho se tšabe ho bo hanyetsa ka lebaka la tumelo ea bona.’”