“E Matla Ebile ea Kholisa”
E MONG oa Lipaki tsa Jehova tsa Fora o ile a ngola: “Ho tloha hosasane, ke il’o e sebelisa mosebetsing oa ho bolela, hobane litaba tseo e li fupereng ka sebele li matla ebile lia kholisa.” Paki e ’ngoe ea United States e ile ea ngola: “Ke ile ka e bala hang-hang ’me ke sitoa ho letela ho e sebelisa tšebeletsong ea tšimo, kaha re kopana le batho ba bangata haholo ba sa thahaselleng le ba sa tšepeng Bibele.” Ba ne ba hlalosa eng? Bukana e maqephe a 32 eo sehlooho sa eona se reng Buka ea Batho Bohle, e ileng ea lokolloa ke Mokhatlo oa Watch Tower Likopanong tsa Setereke tsa “Tumelo Lentsoeng la Molimo” tse ileng tsa tšoaroa ka 1997/98.
Sengoliloeng sena se ile sa ngoloa ho nahannoe ka babali ba khethehileng—bao e ka ’nang eaba ba rutehile, empa ba tseba ho honyenyane haholo ka Bibele. Batho ba bangata ba joalo ba na le maikutlo a tiileng ka Bibele, le hoja ka bobona ho se mohla ba kileng ba e bala. Morero oa bukana ena ke ho kholisa ’mali hore, bonyane, Bibele ke buka e lokelang ho hlahlojoa. Bukana ena ha e qobelle ’mali ho amohela pono ea hore Bibele e bululetsoe ke Molimo. Ho e-na le hoo, e etsa hore linnete li ipuelle. Tsela eo e ngotsoeng ka eona hase ea boiphahamiso empa e hlakile ebile e toba taba.
Joalokaha litlhaloso tse qotsitsoeng ka holimo li bontša, ba neng ba le teng likopanong tsena ba ne ba labalabela ho sebelisa bukana ena tšebeletsong ea bona ea tšimo. Ka mohlala, Fora phutuho e khethehileng ea ho paka e ile ea hlophisoa bakeng sa la 23 le la 24 August ha bacha ba baeti ba likete tse makholo ba tsoang lefatšeng lohle ba ne ba bokane Paris bakeng sa Letsatsi la Lefatše la Bacha. Lipaki tse ka bang 2500 (bongata ba tsona e le tse lilemo li 16 ho ea ho 30) li ile tsa tsamaisa likopi tse 18 000 tsa bukana ena ka Sefora, Sejeremane, Senyesemane, Sepanishe, Sepolishe le Setaliana.
Ka sebele a re sebeliseng bukana ena, Buka ea Batho Bohle, tšebeletsong ea rōna. E se eka sengoliloeng sena se ka ipaka e le sa bohlokoa ho kholiseng batho ba nang le kahlolo e molemo hore ba lokela ho itlhahlobela Bibele.