“Rōna Mak’hatholike re sa Ntse re Lokela ho Ithuta ho Hongata—ho Tsona”

PHATLALATSO ena e ileng ea etsoa ka Lipaki tsa Jehova e boletsoe ke mosuoetsana e mong oa Bari, Italy, ha a ne a ruta histori ea bolumeli tlelaseng ea hae ea sekolo se phahameng. Mosuoetsana enoa o ile a bolella tlelase hore o tla be a sebelisa lik’hasete tsa video e le thuso ea ho ithuta. Se seng sa liithuti, Roberto ea lilemo li 18, ha a utloa sena o ile a fana ka tlhahiso ea hore bolumeli ba hae bo akarelletsoe puisanong. O ile a neha mosuoetsana video e reng Jehovah’s Witnesses—The Organization Behind the Name. Mosuoetsana o ile a amohela mpho ea Roberto, ’me tlelase kaofela ea liithuti tse ka bang 30 e ile ea shebella video eo. Roberto o re: “Bohle ba ne ba hloletsoe ke ho bona bonngoe, tlhophiso, le lerato le tebileng tse leng teng har’a Lipaki tsa Jehova. Ba ne ba bile ba maketse haholo ho tseba hore ka khoeli ho hatisoa likopi tse limilione tse 40 tsa Molula-Qhooa le likopi tse limilione tse 36 tsa Tsoha!”

Ka mor’a ho shebella video, liithuti-’moho le Roberto tse ’maloa li itse: “Ke ne ke sa nahane hore le hlophisehile hakaalo.” Ha mosuoetsana eo a bua ka Lipaki tsa Jehova, o ile a bolella tlelase hore: “Bonang kamoo tumelo ea tsona e li susumeletsang ho ba le bonngoe le ho hlophiseha kateng. Rōna Mak’hatholike re sa ntse re lokela ho ithuta ho hongata ho tsona.” Video eo le puisano ea tlelase e ileng ea latela li entse ho hongata ho khothalletsa hore Lipaki tsa Jehova li utloisisoe hamolemonyana.