Bohlale ba ho ‘Bona Esale Pele se Tla Etsahala’
“KE BATHO ba lahlehetsoeng ke monahano oa bona o nepahetseng ’me ha ba na kutloisiso. Haeba ba ne ba le bohlale, ba ne ba tla utloisisa sena ’me ba bone esale pele se tla etsahala.”—Deuteronoma 32:28, 29, Beck.
Mantsoe ana a builoe ke Moshe ho Baiseraele ha ba ne ba eme moeling oa Naha e Tšepisitsoeng. Moshe o ne a bua esale pele ka nako eo ka eona ba neng ba tla furalla Jehova ’me ba sa nahane ka ho teba ka liphello tsa liketso tsa bona. Makholong a lilemo a ileng a latela, batho ba Iseraele—ho kopanyelletsa le marena a mangata—ba ile ba hlokomoloha litemoso tsa Molimo.
Ka mohlala, Solomone o ne a tseba molao oa Molimo oa ho se nyale barapeli ba melimo e meng ntle le ba Jehova. (Deuteronoma 7:1-4) Leha ho le joalo, o ile a ba le “basali ba bangata ba balichaba.” Phello e bile efe? Tlaleho ea Bibele ea bolela: ‘Solomone, hobane a tsofale, basali bao ba hae ba khelosetsa pelo ea hae melimong esele, ’me pelo ea hae ha ea ka ea hlola e e-ba ea Jehova, Molimo oa hae, kaofela ha eona, joalo ka pelo ea ntat’ae Davida.’ (1 Marena 11:1, 4) Le hoja e ne e le monna ea bohlale, Solomone o ile a haelloa ke monahano o nepahetseng oa ho ‘bona esale pele se neng se tla etsahala’ haeba a ne a sa mamele molao oa Molimo.
Ho thoe’ng ka rōna? Re ka qoba bohloko bo boholo haeba re nahana ka tsela e nepahetseng esale pele ka liqeto tseo re li etsang bophelong. Ka mohlala, Bakreste ba khothalletsoa hore ba ‘itlhoekise tšilafatso e ’ngoe le e ’ngoe ea nama le moea.’ (2 Bakorinthe 7:1) Ena ke keletso e bohlale, empa ba bangata ha ba be le monahano o nepahetseng oa ho bona esale pele se ka etsahalang haeba ba hlokomoloha keletso eo e bohlale ea Pauluse. Ka mohlala, bacha ba bangata ba silafatsa ’mele ea bona ka ho tsuba koae, moo ba nahanang hore e ba etsa ba hlalefileng le ba baholo. Joale e ba bohloko bo bokaakang ha neng-neng bophelong, boholo ba bona bo tšoaroa ke lefu la pelo, kankere ea matšoafo kapa lefu la emphysema (lefu la matšoafo) ka lebaka la ho tsuba!
Ke habohlokoa ho nahanisisa ka liphello tsa liqeto tsa rōna le liketso tsa rōna. Pauluse o ile a ngola a e-na le lebaka le utloahalang: “Leha e le sefe seo motho a se jalang, sena ka ho tšoanang o tla se kotula; hobane ea jalang ka sepheo sa ho jalla nama ea hae o tla kotula ho bola nameng ea hae, empa ea jalang ka sepheo sa ho jalla moea o tla kotula bophelo bo sa feleng moeeng.”—Bagalata 6:7, 8.