‘Li Bua ka Molemo le Lerato’

LILEMONG tsa morao tjena, Lipaki tsa Jehova tsa Fora li ’nile tsa hlaseloa ka matla ka letoto la liketselletso. Bahanyetsi ba tsona ba ’nile ba sebelisa ’nete e tsoakiloeng le leshano le boitsebiso bo fosahetseng ho li senya lebitso sechabeng. Mathoasong a 1999, Lipaki tsa Jehova tsa Fora kaofela li ile tsa aba likopi tse limilione li 12 tsa pampitšana eo sehlooho sa eona se reng People of France, You Are Being Deceived! Pampitšaneng ena, li ne li nyatsa lipolelo tse li senyang lebitso.

Matsatsi a seng makae ka mor’a letšolo lena, Monghali Jean Bonhomme, eo e leng ngaka ea meriana, eo hape e kileng ea e-ba setho sa Paramente, o ile a romela lengolo la boipelaetso ba phatlalatsa koranteng ea moo. O ile a ngola: “Nako le nako, Lipaki tsa Jehova li tla ha ka. Li tlela ho tla bua le ’na ka molemo le lerato lefatšeng lohle. . . . Ha li itšohlometse. Li bua ka bonolo ’me ka mosa li mamela lipelaelo tsa ka.”

Ha Monghali Bonhomme a bua ka maikutlo a Lipaki tsa Jehova ka lintho tsa moea, o itse: “Ho se hlalefele ha tsona lintho tsa lefatše, ho ke ke ha ntša kotsi. Ka lehlakoreng le leng, ho hloka bohlale ha bo-ralipolotiki ba bang ke tšokelo e khōloanyane khotsong ea baahi le kutloanong ea sechaba.”