“O Mong oa Mesebetsi e Meholo ka ho Fetisisa ea Boenjiniere”
HA HO ne ho hahuoa tempele ea Jehova Jerusalema pusong ea Morena Solomone lilemong tse ka bang 3 000 tse fetileng, ho ile ha etsoa letamo le letle la metsi la koporo eaba le behoa ka ntle monyako oa tempele. Boima ba lona e ne e le lithane tse fetang tse 30 ’me le ne le tšela lilithara tse ka bang 40 000 tsa metsi. Sekotlolo sena se seholo se ne se bitsoa leoatle le entsoeng ka ho qhibilihisoa. (1 Marena 7:23-26) Ho Biblical Archeologist, Albert Zuidhof, ofisiri ea mehleng ea tsa elektronike ea National Research Council of Canada o re: “Ha ho pelaelo hore e ne e le o mong oa mesebetsi e meholo ka ho fetisisa ea boenjiniere e kileng ea etsoa sechabeng sa Baheberu.”
Leoatle lee le ile la etsoa joang? Bibele e re: “Morena a . . . etsa [lisebelisoa tsa koporo] ka foromo ea letsopa Seterekeng sa Jordane.” (1 Marena 7:45, 46) Zuidhof o re: “E tlameha ebe le ile la qhibilihisoa ka mokhoa o tšoanang le o ntseng o sebelisoa ha ho etsoa litšepe tse khōlō tsa boronse.” Oa hlalosa: “Ha e le hantle, sena se ne se tla hloka hore ho etsoe sampole ea boka ea leoatle lena ka foromo e kubutiloeng holim’a lehlabathe le ommeng leo ho foromeloang ho lona. . . . Ha ho entsoe sena, baqhibilihisi ba ne ba lokela ho etsa foromo holim’a sampole e bitielletsoeng ka boka ebe ba e tlohela hore e ome. Bohato ba ho qetela e ne e tla ba ho qhibilihisa boka le ho tšela mokelikeli oa boronse ka foromong eo.”
Kaha leoatle lena le entsoeng ka ho qhibilihisoa le ne le le leholo haholo le bile le le boima haholo, ho ne ho hlokahala bokhoni bo boholo ba ho le haha. Bokahare le bokantle bo ne bo tlameha ho jara boima ba lithane tse ka bang 30 tsa koporo e qhibilihisitsoeng, ’me koporo ena e ne e lokela ho tšeloa ka lekhetlo le le leng ho sa khaotsoe e le hore e se ke ea petsoha kapa ea tletlerana. Mohlomong sena se ne se hloka hore ho besoe libōpi tse ’maloa tse kolokileng hore ho tšeloe tšepe e qhibilihisitsoeng ka foromong. E ne e le mosebetsi o moholo haholo!
Thapelong eo Morena Solomone a ileng a e etsa ha ho ne ho khakoloa tempele, o ile a isa tlotla ho Jehova Molimo bakeng sa mosebetsi oohle oa tempele, a re: ‘U ile ua etsa tšepiso ka molomo oa hao, ’me u e phethahalitse ka letsoho la hao.’—1 Marena 8:24.