Baboleli ba ’Muso Baa Tlaleha

Ho Pakela Batho Moo ba Sebetsang Teng

MOAPOSTOLA Matheu, Petrose, Andrease, Jakobo le Johanne ba ne ba tšoana ka eng? Kaofela ha bona ba ile ba bitsoa ke Jesu ba le moo ba sebetsang teng. Petrose, Andrease, Jakobo le Johanne ba ne ba phathahane khoebong ea bona ea ho tšoasa litlhapi ha Jesu a ba bitsa, a re: “Ntšaleng morao.” Matheu o ne a le ofising ea lekhetho ha a bitsoa hore e be morutuoa oa Jesu.—Matheu 4:18-21; 9:9.

Ho pakela batho libakeng tseo ba sebetsang ho tsona e ka ba ho putsang. Lipaki Tsa Jehova Japane, li ile tsa hlokomela sena ’me morao tjena tsa etsa boiteko bo matla ba ho kopanela karolong ena ea tšebeletso. Ka liphello life? Ka mor’a likhoeli tse seng kae feela, li ne li entse maeto a ho boela a likete, li bile li qalisitse lithuto tsa Bibele tse ka bang 250. Nahana ka liphihlelo tse latelang.

Mosebeletsi e mong oa nako e tletseng Tokyo o ile a kopana le mookameli oa reschorente e ’ngoe ea neng a kile a buisana le Paki e ’ngoe lilemong tse ka bang 30 tse fetileng e sa le ngoan’a sekolo. Le hoja mookameli eo a ne a sa ka a utloisisa seo e se buang hakaalo nakong eo, o ile a thahasella Bibele. Ka mor’a hore thahasello ea hae e tsosolosoe, o ile a amohela thuto ea Bibele ho sebelisoa buka ea Tsebo e Isang Bophelong bo sa Feleng.a Ho feta moo, o ile a iketsetsa kemiso ea ho bala Bibele mantsiboea a mang le a mang pele a robala.

Pula-maliboho e mong ea khethehileng o ile a etela ofising e ’ngoe. Le hoja mookameli a ne a le sieo, mosetsana ea ileng a araba fono ea mookameli o ile a botsa a re, “Na u ka rata ho buisana le ’na?” Ka mor’a ho buisana ho se hokae fonong, mosetsana eo o ile a hlahella ’me a re o rata ho bala Bibele. Pula-maliboho eo ea khethehileng o ile a lokisetsa ho khutla a nkile Bibele ’me a qalisa thuto ea Bibele le eena, eo ba neng ba e tšoarela serapeng se haufi sa boikhathollo hoseng pele mosetsana eo a ea mosebetsing.

Ofising e ’ngoe, monna e mong o ile a bona mosebetsi-’moho le eena a amohela makasine ea Molula-Qhooa le ea Tsoha! ’me eare ha Paki eo e qeta ho tsamaea a li nka a li tjebela koana. Ha monna eo a fihla hae, o ile a bolella mosali oa hae eo e leng Paki se etsahetseng a ba a re eena bonyane a ka be a ile a mamela ho se hokae. Morali oa hae, ea ileng a utloa ha a bua seo, o ile a bolella Paki e sebetsang sebakeng seo sa khoebo. Ka potlako Paki eo e ile ea etela monna eo ofising ’me ea qalisa thuto ea Bibele le eena. Ka mor’a nakoana monna eo o ile a qala ho ba teng kamehla libokeng ka Sontaha.

Ho pakela batho moo ba sebetsang teng ho bile le melemo e meng. Bahoeletsi ba bangata Japane ba se ba khona ho etsa maeto a ho boela libakeng tsa mabenkele, lifekthering le liofising. Ho phaella moo, ka ho paka ka tsela ena, ho buisanoe le ba bangata ba neng ba se ba sa kopanele tšebeletsong ’me ho qalisitsoe lithuto le bona. Liphello e bile tse babatsehang. Phutheho e ’ngoe e bohareng ba Tokyo e sa tsoa tlaleha lithuto tsa Bibele tsa lehae tse 108, e leng palo e menang habeli ea tse tlalehiloeng selemong se fetileng.

[Mongolo o botlaaseng ba leqephe]