Baboleli ba ’Muso Baa Tlaleha
“Bahlaseluoa ba Lebetsoeng” Baa Hopoloa
MAQALONG a 2001, Paki ea Jehova e lilemo li 15 e bitsoang Haykaz e ile ea etela “Bahlaseluoa ba Lebetsoeng,” pontšong ea Bern, Switzerland, e neng e bontša ho hlorisoa ha Lipaki Tsa Jehova ke Manazi. Qetellong ea leeto la hae, Haykaz o ile a re: “Ke ’nile ka utloela ka tšoaro e sehlōhō le mahlomola ao Lipaki Tsa Jehova li bileng ho ’ona pusong ea Manazi, empa lena e bile lekhetlo la pele ke bona litokomane le litšoantšo tsa sebele tsa nako eo. Lipontšuoa, litlaleho tsa lipaki tse boneng ka mahlo le litlhaloso tsa bo-rahistori pontšong eo li ile tsa nkama maikutlo le pelo ka ho tebileng.”
Nakoana hamorao, ha Haykaz a ne a fuoe mosebetsi oa ho ngola tlaleho bakeng sa barutoana-’moho le eena ba sekolong se phahameng, o ile a khetha sehlooho se reng, “Lipaki Tsa Jehova—Bahlaseluoa ba Manazi ba Lebetsoeng.” Mosuoe oa hae o ile a se chaela monoana empa a bolella Haykaz hore ho hlokahala hore a kopanyelletse le libuka tseo e seng tsa bolumeli e le mehloli ea taba ea hae. Haykaz o ile a lumela ho etsa joalo ka pelo e tšoeu. O re: “Ke ile ka ngola tlaleho e khutšoanyane ea libuka tse ling tseo ke ileng ka li hlahloba tse buang ka Lipaki Tsa Jehova nakong ea Bonazi. Ke ile ka boela ka hlalosa maikutlo a ka ka pontšo eo ea ‘Bahlaseluoa ba Lebetsoeng.’ Tlaleho eo e maqephe a 43 e ne e akarelletsa mehlala le litšoantšo.”
Ka November 2002, Haykaz o ile a pheta tlaleho ena ka pel’a barutoana-’moho le eena, mesuoe, lelapa le metsoalle ea hae. Ka mor’a moo, ho ile ha e-ba le nako ea lipotso le likarabo, e ileng ea mo fa monyetla oa ho hlalosa tumelo ea hae e thehiloeng Bibeleng. Ha ngoanana e mong ea neng a le har’a bamameli a mo botsa hore na ke hobane’ng ha a ne a khethile sehlooho seo, Haykaz o ile a hlalosa hore libuka tse ngata tsa histori ha li bue ka Lipaki Tsa Jehova le hore o ne a batla hore batho ba tsebe kamoo Lipaki li ileng tsa sireletsa tumelo ea tsona ea Bokreste kateng. Phello ea puo ea hae e bile efe?
Haykaz o re: “Barutoana-’moho le ’na ba ne ba hloletsoe. Ba ne ba sa tsebe hore Lipaki Tsa Jehova e le sehlopha li ’nile tsa hlorisoa ka sehlōhō joalo. ’Me ba bangata ba ne ba sa tsebe hore Lipaki tse neng li tšoeroe likampong tsa mahloriso tsa Manazi li ne li qhoaela letšoao le khethehileng—e leng lesela le pherese le likhutlo li tharo.”
Ka mor’a puo ea hae, Haykaz o ile a ba le menyetla e eketsehileng ea ho bua le liithuti-’moho le eena le ho tšohla boemo ba Lipaki bo thehiloeng Bibeleng litabeng tsa ho tšela mali, lino tse tahang le boitšoaro. Haykaz o ile a re: “Ha ho le ea mong oa bana bao ke kenang sekolo le bona ea ileng a ntšoma kapa a ntšeha.” Ho feta moo, hona joale tlaleho ea hae e bolokiloe pokellong ea libuka ea sekolo. Seo se tla tiisa hore boemo ba Lipaki Tsa Jehova bo sebete bo ke ke ba lebaloa.