Ho Finyella se Hlokahalang Macedonia

“TŠELELA Macedonia ’me u re thuse.” (Liketso 16:9) Mantsoe ana a monna ea ileng a hlaha ponong ho moapostola Pauluse a ne a bontša hore ho hlokahala ho bolela litaba tse molemo tsa ’Muso oa Molimo tšimong e ncha, metseng eo hona joale e leng Greece.

Sechabeng sa kajeno sa Macedonia, ho na le Paki ea Jehova e le ’ngoe feela ho baahi ba bang le ba bang ba 1 840. Batho ba bangata ha ba e-s’o utloe letho ka Jehova Molimo. Ruri ho na le tlhokahalo e potlakileng ea hore batho ba sechaba sena ba utloe molaetsa oa khotso.—Matheu 24:14.

Molimo o butse tsela ea ho hlokomela tlhokahalo eo. Ka letsatsi le leng ka November 2003, ofisi ea Macedonia ea Lipaki Tsa Jehova e Skopje e ile ea fumana molaetsa oa fono oo e neng e sa o lebella. O ne o tsoa Setsing sa Macedonia sa Tšebelisano-’moho ea Machaba, o memela Lipaki ho ea hloma lephephe lipontšong hore li hlalose tumelo ea tsona pontšong ea matsatsi a mararo e neng e lokela ho qala ka la 20 November. Ruri oo e ne e le monyetla o babatsehang hakaakang oa ho buisana le batho ba likete ba neng ba e-s’o ka ba utloa litaba tse molemo tsa ’Muso!

Baithaopi ba ile ba ikakhela ka setotsoana ho lokisetsa le ho hlophisa lipontšo tsa lingoliloeng tse sa tšoaneng tsa Lipaki Tsa Jehova ka puo ea Semacedonia. Tse ling tsa lingoliloeng tseo li ne li behiloe lipontšong e le hore baeti ba ka inkela tse ling ha ba rata. Pontšo eo e ile ea fa ba bangata monyetla oa ho fumana metsi a khathollang a moea ntle ho tefo.—Tšenolo 22:17.

Haholo-holo baeti ba ne ba batla libuka tse amang bophelo ba bona, tse kang Lipotso Bacha Baa Botsa—Likarabo tse Sebetsang le Lekunutu la Thabo ea Lelapa.a Batho ba 98 ba ile ba fana ka liaterese tsa bona, ba kōpa hore Lipaki Tsa Jehova li ba etele. Ba bangata ba ile ba bua hantle ka mosebetsi o motle oa Lipaki Tsa Jehova le boleng ba lingoliloeng tseo.

Monna e mong o ile a tla lephepheng a tšoere moranyana oa hae ka letsoho. Ntate o ile a botsa hore na ho na le lingoliloeng tsa bana. Lipaki li ile tsa mo bontša Buka ea ka ea Lipale tsa Bibele.b O ile a e phetla-phetla ho se hokae eaba ka cheseho o botsa hore na ke bokae. Eitse ha a utloa hore mosebetsi oa ho ruta oa Lipaki Tsa Jehova o tšehetsoa ka ho feletseng ka menehelo ea boithatelo, o ile a thaba le ho feta. (Matheu 10:8) O ile a bontša mor’a hae buka eo eaba o re: “Buka ee ke e ntle hakaakang! Ntate o tla u balla pale e le ’ngoe tsatsi le leng le le leng!”

Moprofesa e mong oa filosofi o ile a atamela lephepheng leo. O ne a thahasella bolumeli ka kakaretso haholo, empa haholo-holo o ne a thahasella seo Lipaki Tsa Jehova li se lumelang. Ha a ntse a sheba ka bukeng ea Moloko oa Batho o Batla Molimo,c moprofesa eo o ile a re: “Ruri boitsebiso bona bo ngotsoe ka tsela e utloahalang! Bo ngotsoe hantle ka tsela eo ke nahanang hore litaba li lokela ho tšetlehoa ka eona.” Hamorao liithuti tse tsoang sekolong sa moprofesa eo li ile tsa tla lephepheng ’me tsa ikōpela libuka tse tšoanang le eo moprofesa a neng a e fumane. Li ne li batla ho ithuta buka eona eo. Li ne li lumela hore e tla sebelisa boitsebiso boo ha e ruta.

Pontšo eo e ile ea fa batho ba bang monyetla oa ho bala linnete tsa Mangolo le ho li utloa ka lekhetlo la pele. Sehlopha sa bacha ba sa utloeng litsebeng se ile sa tla ho tla sheba. Paki e ’ngoe e ile ea ba fa puo e khutšoanyane, e thusoa ke ngoanana e mong ea neng a e toloka ka puo ea matsoho. E sebelisa litšoantšo tse bukeng ea Motho e Moholo ka ho Fetisisa ea Kileng a Phela,d e ile ea hlalosa hore Jesu o ne a phekola ba kulang, ho akarelletsa le ba sa utloeng litsebeng. Ba ne ba thabile ha ba “utloa” tšepiso ea Bibele ea hore haufinyane Jesu o tla etsetsa batho ba phelang lefatšeng kajeno se tšoanang. Bongata ba bona ba ile ba thabela ho amohela lingoliloeng tse buang ka Bibele, ’me ha lokisetsoa hore Paki e tsebang puo ea matsoho e ba etele.

Ho kopanyelletsa puong ea Semacedonia, lingoliloeng li ne li fumaneha le ka Sealbania, Senyesemane le Seturkey. Monna e mong ea neng a sa bue Semacedonia o ile a kōpa lingoliloeng ka Senyesemane. Ka mor’a hore a fumane limakasine tsa Molula-Qhooa le Tsoha!, o ile a bolela hore o bua Seturkey. Eitse ha a bontšoa lingoliloeng ka puo ea habo, a makala haholo! O ile a hlokomela hore Lipaki Tsa Jehova li batla ho thusa motho e mong le e mong.

Ruri ho ile ha fanoa ka bopaki bo botle ketsahalong eo, ’me ho ne ho khothatsa hakaakang ho bona batho ba bangata ba bontša hore ba thahasella ’nete ea Bibele! Ka sebele Jehova o ile a bula tsela ea hore litaba tse molemo tsa ’Muso li phatlalatsoe haholoanyane Macedonia.

[Mongolo o botlaaseng ba leqephe]

[Lebokose/Litšoantšo tse leqepheng la 9]

KETSAHALO EA BOHLOKOA!

Ka la 17 May, 2003, ho ile ha nkoa bohato bo boholo ba ho phatlalatsa litaba tse molemo tsa ’Muso oa Molimo Macedonia. Ofisi ea Lipaki Tsa Jehova e Skopje e ile ea neheloa. Mosebetsi oa kaho o ne o nkile lilemo tse peli, ho atolosoa mehaho ea pele ka makhetlo a mane.

Ho na le mehaho e meraro e arohaneng eo ho eona ho nang le liofisi tsa tsamaiso le tsa phetolelo hammoho le libaka tsa bolulo, kichine le sebaka sa ho hlatsoetsa liaparo. Guy Pierce, eo e leng setho sa Sehlopha se Busang sa Lipaki Tsa Jehova, o ile a fana ka puo ea nehelo. Baeti ba tsoang linaheng tse sa tšoaneng tse leshome ba ne ba le teng lenaneong la nehelo. Kaofela ba ne ba thabile haholo ha ba bona mehaho e mecha e metle.

[’Mapa o leqepheng la 8, 9]

(Ha u batla ho bona boitsebiso bo hlophisitsoeng hantle, sheba sengoliloeng)

BULGARIA

MACEDONIA

Skopje

ALBANIA

GREECE

[Setšoantšo se leqepheng la 8]

Skopje, Macedonia